Azərbaycan dövləti yalnız paytaxtın sosial-iqtisadi inkişafına maraq göstərmir, eyni zamanda bölgələrin də bu istiqamətdə irəliləməsini, yüksəlməsini önə çəkir. Bakı ölkənin ürəyi olsa da, regionlarımız da onun inkişafına, tərəqqisinə təkan verən qan damarlarıdır.
Prezident İlham Əliyevin həyata keçirdiyi siyasətin əsasında dayanan məsələrdən biri regionların sosial-iqtisadi inkişadır ki, buna da nail olunmaq üçün çeşidli dövlət proqramlar qəbul edilir, layihələr həyata keçirilir. Son illər Azərbaycan dövləti sosial xidmət sahəsində də böyük irəliləyişlərə nail olub. Əlbəttə, burada Prezident İlham Əliyevin 2012-ci il 13 iyul tarixli 685 nömrəli Fərmanına əsasən yaradılan “ASAN xidmət” mərkəzlərini xüsusi qeyd etməliyik. Bilirik ki, “ASAN” Xidmət mərkəzləri vətəndaşların əlavə xərclərinin və vaxt itkisinin azalmasına, vətəndaşlara münasibətdə etik qaydalara, nəzakətli davranışa əməl edilməsinə nail olunması, peşəkarlıq səviyyəsinin artırılması, dövlət strukturlarına etimadın daha da gücləndirilməsi, şəffaflığın artırılması, korrupsiyaya qarşı mübarizənin gücləndirilməsi, elektron xidmətlərdən daha geniş istifadə olunması, bu sahədə aparılan institusional islahatların səmərəliliyinin artırılmasına böyük töhfədir.
Regionların sosial-iqtisadi inkişafında “ASAN” Xidmət mərkəzlərinin rolu...
Bildiyimiz kimi, regionlarımızda da “ASAN” Xidmət mərkəzləri fəaliyyət göstərir. Bu gün Sabirabad, Masallı, Mingəçevir, Şəki, İmişli, Quba, Şamaxı, Qəbələ, Quba, eləcə də başqa rayon və şəhərlərimizdə “ASAN” Xidmət mərkəzləri fəaliyyət göstərir.
Heç şübhəsiz, regionlarda “ASAN” Xidmət mərkəzlərinin açılması bölgələrimizin sosial-iqtisadi inkişafında mühüm rol oynayır. Bu mərkəzlərin açılması bir tərəfdən vətəndaşa xidmətdirsə, o biri tərəfdən yeni iş yerləridir. Burada regionlarda yaşayan onlarla vətəndaş iş yerləri ilə təmin olunublar. Bundan başqa, regionlarda da səyyar “ASAN” Xidmət fəaliyyətdə olur. Bu da vətəndaşların bütün mənalarda əlindən tutur.
Vurğulayaq ki, “Azərbaycan Respublikası regionlarının 2019–2023-cü illərdə sosial-iqtisadi inkişafı Dövlət Proqramı”nın təsdiq edilməsi haqqında Azərbaycan Respublikası Prezidentinin Fərmanında da “ASAN” Xidmət Mərkəzlərinin tikilməsi, əhalinin istifadəsinə verilməsi qeyd edilib. Fərmandan irəli gələrək bu sahədə çox işlər görülüb.
Sənəddə qeyd edilir ki, Azərbaycan Respublikası regionlarının inkişafı ölkədə uğurla həyata keçirilən davamlı sosial-iqtisadi inkişaf strategiyasının mühüm tərkib hissəsidir. Fərmanda vurğulanır ki, regionların inkişafı sahəsində qəbul edilmiş və uğurla həyata keçirilmiş dövlət proqramlarında, habelə regionların sosialiqtisadi inkişafına dair əlavə tədbirlərlə bağlı sərəncamlarda nəzərdə tutulmuş vəzifələrin icrası ölkədə qeyri-neft sektorunun davamlı inkişafına, regionlarda kommunal xidmətlərin və sosial infrastruktur təminatının keyfiyyətinin yüksəldilməsinə, sahibkarlıq mühitinin daha da yaxşılaşdırılmasına, investisiya qoyuluşunun artmasına, yeni müəssisələrin, iş yerlərinin açılmasına və nəticədə, əhalinin məşğulluğunun artırılmasına və yoxsulluq səviyyəsinin azaldılmasına təkan verir.
“Bunun sosial-iqtisadi inkişafla bağlı həddən artıq böyük əhəmiyyəti var”
“Altay” Sosial-İqtisadi Araşdırmalar Mərkəzinin rəhbəri Elçin Bayramlı “Bakı-Xəbər”ə şərhində bildirdi ki, “ASAN” Xidmət mərkəzlərinin sayının artırılması müsbət haldır: “Bu çox təqdirəlayiqdir. Xüsusən də regionlarda “ASAN” Xidmət mərkəzlərinin açılması müsbətdir. Yaxşı olardı ki, bütün şəhərlərdə və rayonlarda belə mərkəzlər açılsın. Bunun sosial-iqtisadi inkişafla bağlı həddən artıq böyük əhəmiyyəti var. Həm sadə vətəndaşların, həm də şirkətlərin sənədləşmə işindəki bürokratiya aradan qalxıb və vətəndaşlar vaxta, enerjiyə, vəsaitə qənaət olunur, insanlar dövlət xidmətlərindən daha rahat, yüksək səviyyədə bəhrələnirlər. Bu da çox müsbət bir haldır”.
“...özünü ölkənin sosial həyatında mütləq müsbət mənada göstərəcək”
E.Bayramlının sözlərinə görə, yaxşı olardı ki, bir çox başqa xidmətlər də “ASAN” Xidmət mərkəzlərinə verilsin. O qeyd edir ki, hazırda bəzi sahələrdə narazılıqlar var və sənədləşmə məsələsində bürokratik əngəllər var, bu sahələr də “ASAN” Xidmətə verilərsə daha müsbət olar. “Bu sahədə əhatə dairəsini daha da artırmaq lazımdır. Belə mərkəzlərin fəaliyyəti vətəndaşların dövlətə inamını artırır, korrupsiyanın qarşısını alır, məmur-vətəndaş təmaslarını minimum həddə endirir, nəticədə sosial narazılıq da azalır, sosial rahatlıq yaranır, iqtisadi baxımdan da daha səmərəli olur. Son vaxtlar korrupsiyaya qarşı mübarizə gücləndirilir. Korrupsiyaya qarşı Milli Fəaliyyət Planı qəbul olunub. Sözügedən strategiyada qəbul olunur ki, bütün sahələr üzrə elektron xidmətlərin sayı artırılsın, sənədlər üzrə elektron bazalar olsun, real təmaslar azaldılsın. Bir çox bunun kimi tədbirlər var, texnologiyalardan istifadə edərək şəffaf bir mühit yaradılması vacibdir. Bu korrupsiyanın, rüşvət hallarının aradan qaldırılması üçün ən yaxşı metodlardan biridir. Əgər bu daha geniş miqyasda tətbiq olunsa, bütün sahələri əhatə etsə korrupsiyanın səviyyəsinin maksimum dərəcədə azaltmaq olar. Bu isə təbii ki, özünü ölkənin sosial həyatında mütləq müsbət mənada göstərəcək. Sadəcə, bu işi davam etdirmək, miqyasını, əhatə dairəsini, xidmət sayını genişləndirməyə çox böyük ehtiyac var” - deyə E.Bayramlı vurğuladı.
İradə SARIYEVA Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
