Kirayə mənzil bazarında ciddi qıtlıq yaşanır. Elə buna görə də artıq bəzi ev alqı-satqısı və kirayəsi ilə məşğul olan şəxslər ofislərinin girişinə “Kirayə mənzil yoxdur” elanları vurublar. Rieltorlar deyir ki, qıtlığın əsas səbəblərindən biri Bakıda söküntülərin çox olmasıdır. Digər səbəb isə tələbə faktorudur. Artıq tələbələr əvvəlki illərdəki kimi kirayə qaldıqları mənzilləri yay aylarında təhvil vermirlər.
Rieltorlar bildirir ki, bazarda kirayə mənzil təklifi az olduğundan qiymətlər də günü-gündən artır. İndi mərkəzdənkənar sayılan Sabunçu, Yasamal, Xətai və Nizami rayonlarının bəzi ərazilərində 300 manatdan aşağı ev yoxdur. Mərkəzə yaxın yerlərdə isə qiymətlər xeyli yüksəkdir. Məsələn, “Nərimanov”, “Gənclik” və “Elmlər Akademiyası” metro stansiyalarının yaxınlığında ikiotaqlı mənzillər 500 manatdan bahadır.
Elşad Məmmədov: “Yeni tikili binalardakı mənzillərin həm satış, həm də kirayə qiymətləri çox yüksəkdir, yüksəlməyə doğru da gedir”
İqtisadçı ekspert Elşad Məmmədov bildirdi ki, hazırda inflyasiyanın sürətlənməsi kirayə mənzillərin bahalaşmasına səbəb olur. Əsasən də yay aylarında nisbətən ucuz olan kirayə bazarında hazırda elə də ucuzlaşma müşahidə olunmur: “Sovet dövründən qalan mənzil fondu olmasaydı, bu gün Azərbaycanda kirayə bazarındakı vəziyyət ümumiyyətlə, bərbad olardı. Çünki yeni tikili binalardakı mənzillərin həm satış, həm də kirayə qiymətləri çox yüksəkdir. Yüksəlməyə doğru da gedir. Çox insanın bu binalardakı məzilləri kirayələməyə gücü çatmır. Hazırda həm dünyada, həm də ölkədə inflyasiya o qədər sürətlənib ki, qiymətlərin hansısa seqment üzrə azalması mümkün deyil. Yəni mövsümi amil kirayə qiymətlərinə o qədər də təsir etmir".
Elnur Fərzəliyev: “Yaxın 10 ildə mərkəzə yaxın ərazilərdə ucuz kirayə evlər tapmaq mümkün olmayacaq”
Əmlak eksperti Elnur Fərzəliyev bildirdi ki, ənənəvi olaraq avqustun sonundan sentyabrın sonuna qədər tələbələr çox ciddi problemlərlə üzləşir: “Həm satış, həm də kirayə bazarında hər il qiymət artımı olur. Təxminən 5-6 il bundan əvvəl tələbələr şəhərin mərkəzinə yaxın ərazilərdə 100-150 manata fərdi həyət evləri tapa bilirdilər. Artıq həmin evlərin böyük hissəsi sökülüb və kirayələrdə də artımlar müşahidə olunur. Binalar sökülən zaman orada yaşayan sakinlər məcburən kirayəyə çıxmalı olurlar. Sökülən binalarda ən azı 3-5-10 mənzil sırf kirayəlik olurdu. Artıq o mənzillər kirayə bazarından çıxıb. Nə baş verir? İki-üç ildən sonra yeni tikilən binadakı qiymətlər köhnə qiymətlərdən təxminən 2 dəfə baha olur. Əgər köhnə tikilidə mənzil 300 manat idisə, yeni binalarda bir otaqlı kirayə mənzil ortalama 500 manatdır”.
Ekspert hesab edir ki, yaxın 10 ildə mərkəzə yaxın ərazilərdə ucuz kirayə evlər tapmaq mümkün olmayacaq: “Paytaxtdakı köhnə binalar mərhələli şəkildə sökülməlidir. Çünki onların bir hissəsi qəzalıdır, digərlərinin isə istismar müddəti bitib. Bu o deməkdir ki, yaxın 10 ildə Bakıda mərkəzə yaxın ərazilərdə ucuz qiymətə kirayə mənzil tapmaq əlçatan olmayacaq. Bu da tələbələr üçün çox ciddi problem yaradır. Çünki tələbələrin böyük əksəriyyəti bölgələrdən gəlir, əksəriyyəti də aztəminatlı ailələrdəndir. Bu üzdən tələbələr məcburən şəhər ətrafına, yəni Abşeron, Xırdalan və digər ərazilərdə ucuz ev tuturlar. Bu zaman da onlar yolda 2-3 saat vaxt itirirlər”.
Günel CƏLİLOVA
