Azərbaycan orta ümumtəhsil məktəblərində Azərbaycan bölmələri ilə yanaşı ənənəvi olaraq rus bölmələri də fəaliyyət göstərir, bundan başqa sırf rus dilində tədris həyata keçirən məktəblərimiz də çoxdur. Respublikamızda rusdilli təhsil geniş yayılıb və bu istiqamətdə təhsil alanlarımız da çoxdur.
Bizim cəmiyyətdə belə bir təsəvvür formalaşıb ki, orta və ali məktəblərin rus bölməsini bitirənlər daha savadlı, daha dünyagörüşlü olur. Onlara dərs deyən müəllimlərin də biliyini, tədris metodunu, təlim üsullarını o ki var tərifləyirlər. Şübhəsiz, rus bölməsində də, Azərbaycan bölməsində də savadlı müəllimlə az deyil və bu müəllimlər savadlı vətəndaşlar yetişdirirlər.
Bilirik ki, artıq neçə ildir müəllimlərin işə qəbulu test üsulu ilə həyata keçirilir. Bəzi ekspertlər bilir ki, ölkə məktəblərinin rus bölmələrinin müəllimləri adətən MİQ imtahanlarında çox aşağı nəticə əldə edirlər. Yəni onlar üstün nəticələr əldə edə bilmirlər.
Doğrudanmı, rus bölmələrinin müəllimləri MİQ imtahanlarından aşağı bal toplayırlar? Belədirsə, bunun səbəbi nədir?
“Aşağı nəticə göstərmələrinin müxtəlif səbəbləri var”
Təhsil ekpserti Məzahir Məmmədli “Bakı-Xəbər”ə açıqlamasında qeyd etdi ki, bu iddia deyil, həqiqətən də belədir. “İndiyə qədər ola bilsin ki, rus sektorlarında tədrislə məşğul olan müəllimlərin özünün intellekti, bilik səviyyəsi, savadı standatlara cavab verirdi. Amma təəssüflər olsun ki, bu gün belə deyil. Bizim ən az son on ilin təcrübəsində müəllimlərin işə qəbulu müsabiqə ilə keçirilir. MİQ imtahanlarında rus bölməsi üzrə imtahan verən müəllimlərin balı minimum həddədir. Yəni onların balları 50-60 belə ola bilmir. Bunun özü ondan xəbər ki, bu gün bizim rus bölmələrində tədris aparan müəllimlərimizin bilik səviyyəsi çox aşağıdır. Burada bir neçə istisna ola bilər, amma ümumilikdə kütləvi şəkildə bu cürdür. Sosial şəbəkələrdən də görə bilərsiz, bu gün savadlı rus dili müəllimlərinin axtarışları ilə bağlı təşəbbüslər var. Bu hər halda, ürəkaçan mənzərə deyil. Səbəbə gəlincə, onların aşağı nəticə göstərmələrinin müxtəlif səbəbləri var. Bu ayrı-ayrı məsələlərlə bağlıdır”-deyə ekspert bildirdi.
İradə SARIYEVA
