Fövqaladə Hallar Nazirliyində (FHN) baş verən Zaur Mirzəyev olayından sonra sosial şəbəkələrdə, eləcə də cəmiyyətdə ürəkbulandıran söhbətlər gəzib-dolaşır. Bir sıra sosial şəbəkə istifadəçiləri, eləcə də ictimaiyyət nümayəndələri iddia edirlər ki, belə hallar yalnız FHN-də deyil, başqa dövlət qurumlarında da yaşanır, dövlət orqanlarında çalışan qadınlar arasında seksual qısnamaya məruz qalanlar çoxdur və onlar buna məcbur edilirlər.
Guya ki, bu kimi hallar bütün dövlət qurumlarında var. Əslində bu səhv yanaşmadı və bunun bütün dövlət qurumlarına, o cümlədən də FHN-nin bütün əməkdaşlarına aid etmək olmaz. Bir neçə nəfərin əxlaqdan kənar hərəkətlərinə görə dövlət qurumlarında işləyən qadınlarımızın təhqir edilməsi birmənalı olaraq yolverilməzdir. Dövlət qurumlarımızla bağlı belə yanlış rəy yaratmaq yaxsi deyil. Dövlət qurumlarında minlərlə əxlaqlı qadın çalışır, dövlətə, cəmiyyətə fayda verirlər.
“Belə bir yanaşma kökündən yanlışdır”
Dövlət qurumlarında çalışan qadınların qaralanmasına yönəlik fikirlərə ekspertlərin münasibəti necədir?: “Müasir İnkişaf” Birliyinin sədri Mübariz Göyüşlü bizimlə söhbətində qeyd etdi ki, dövlət qurumlarında işləyən qadınlara ləkə atılması qətiyyən doğru deyil və bu yolverilməzdir. “Hesab edirəm ki, belə bir yanaşma kökündən yanlışdır. Çünki bir, beş nəfərə görə dövlət və qeyri-dövlət qurumlarını, orada işləyən qadınları, kişiləri günahlandırmaq olmaz, hətta hadisə baş verən qurumunda işləyənlərin hamısını ittiham etmək, qınamaq doğru deyil. Dövlət və qeyri-dövlət qurumlarında çalışan qadınların bu şəkildə qaralanması qətiyyən yolverilməzdir. Həm dövlət, həm də özəl sektorda çox mədəni, savadlı, əxlaqlı, öz işinin peşəkarı olan qadınlar çalışır və onlara da münasibət yüksək səviyyədir. Odur ki, dövlət qurumlarda işləyən, əmək verən qadınlara qarşı təxribat xarakterli fikirlərin əsası yoxdur, bu yanlış yanaşmadır”.
M.Göyüşlü hesab edir ki, nadir hallarda son olaylar kimi neqativlər baş verə bilir, amma bu kimi hallar ümumi müsbət sutuasiyalara, məsələlərə, fədakar, ziyalı, ismətli-namuslu qadınlarımızın əl əməyinə, beyninlərinin məhsuluna, çalışmalarına, zəhmərtlərinə kölgə sala bilməz. “Baş verən hadisəyə cəmiyyət həssas münasibət göstərdi, biz o cür münasibətlərə həssas yanaşmalıyıq. Biz həmçinin rüşvətxor, korrupsioner, dövlətin qanunlarını pozan məmurların davranışlarına da sərt yanaşmalıyıq. Yəni təkcə seksual qısnamalarla bağlı məsələlərdə sərt mövqe göstərməməliyik, həm də buna yol açan, şərait yaradan hallarla mübarizə aparmalıyıq”-deyə M.Göyüşlü qeyd etdi.
Leyla QARAXANLI
