Elşən Manafov: “ABŞ Konqresində yenidən sözügedən məsələnin bir qədər fərqli formada gündəmə gəlməsi bununla bağlıdır”
ABŞ Konqresinin Nümayəndələr Palatasının demokrat üzvü Adam Şiff və respublikaçı Qas Biliraks “erməni soyqırımı”nın Amerika rəhbərliyi səviyyəsində rəsmən tanınması üçün yeni qətnamə layihəsi təqdim ediblər. Bu barədə Amerika Erməniləri Milli Komitəsi məlumat yayıb. Məlumatda qeyd olunur ki, Şiff və Biliraksın müəllifi olduqları yeni qətnaməni 70 konqresmen dəstəkləyib.
Sənəddə tarixi faktlara zidd olaraq ortaya atılan saxta erməni soyqırımının tanınması məqsədilə konkret tədbirlərin görülməsi və Vaşinqtonun siyasətinə yeni müddəaların salınması təklif olunub. Ermənipərəst konqresmenlər, həmçinin, ABŞ hakimiyyətini uydurma soyqırımı rəsmən tanımağa və onun “tarixi”nin tədris olunmasına çağırıblar. Müəlliflər, ABŞ səlahiyyətlilərini "erməni soyqırımı"nı rəsmən tanımağa çağırmaqla bərabər, bunu inkar etmək cəhdlərinin qarşısını almağa çağırırlar. Həyasızlığın dərəcəsinə bax ki, qondarma soyqırımla bağlı qətnamə layihəsinə yeni tələblər daxil ediblər. İndiyə qədər saxta erməni soyqırımının qəbul olunmasına nail ola bilməyən erməni lobbisi müxtəlif yeni əlavələri ora daxil etmək istəyir. Onların bu istiqamətdə bir sıra səyləri fiaskoya uğrasa da, hər dəfə sözügedən məsələni gündəmdə saxlamağa çalışırlar. Müxtəlif ağlagəlməz tələblərlə çıxış edirlər.
Məlum məsələdir ki, ermənilərin qondarma soyqırım iddiaları həqiqətdən tamamilə uzaqdır. Belə cəfəng iddialar Türkiyənin Ermənistana münasibətini yumşaltmağa yönəlib. Yəni sərhədləri açmağa məcbur etmək, habelə qardaş ölkənin nüfuzuna xələl gətirmək, onun Avropa İttifaqına gedən yolunu bağlamaq məqsədini güdür. Bütün bu deyilənlərlə yanaşı, ermənipərəst konqresmenlərin qondarma soyqırımla bağlı yeni tələblərlə çıxış etməsini ekspertlər necə dəyərləndirirlər?
Sözügedən məsələni “Bakı-Xəbər”ə şərh edən politoloq Elşən Manafovun sözlərinə görə, qondarma erməni soyqrımının hər il müxtəlif vasitələrlə gündəmə gətirilməsi təsadüfi deyil: “Bütün bunlar ermənilərin “Böyük Ermənistan” layihəsinin tərkib hissəsidir. Dünyada müəyyən beynəlxalq güclərin buna bu və ya digər şəkildə siyasi, maliyyə dəstəyi verməsi Türkiyəni zəiflətmək məqsədi daşıyır. Etiraf etmək lazımdır ki, qondarma soyqırım hadisələrinin tədrisinin vacibliyi və bu hadisələrin inkar edilməsinin yolverilməzliyi ilə bağlı qanun layihəsi illər əvvəl Fransa Senatında müzakirəyə çıxarıldı. O zaman bununla bağlı Fransada bənzər qanun da qəbul olundu. Türkiyənin bu məsələyə son dərəcə ciddi müdaxiləsindən sonra Fransa Ali Məhkəməsi bunun Fransa qanunvericiliyinə zidd olduğunu bəyan etdi. Bununla belə, Fransa Senatı, Avropa dövlətlərinin əksər parlamentləri 100 il əvvəl baş verən hadisələrə məhz “soyqırım” kontekstindən yanaşırlar. Belə çıxır ki, guya Osmanlı imperiyası etnik erməniləri hədəfə alıb. Ancaq Birinci Dünya Müharibəsini araşdıran, obyektiv mövqe sərgiləyən bir sıra Qərb tarixçiləri bəyan edirlər ki, baş verən hadisələrin səbəbkarı ermənilərdir. Osmanlı imperiyası öz əhalisinin təhlükəsizliyini təmin etmək üçün bəzi sərt tədbirlər görüb. Erməni əhalisinin köçürülməsinə qərar verilib. Bu zaman bəzi itkilər olub, amma ermənilərin iddia etdikləri kimi, bu rəqəm 1 milyon 500 min nəfər deyil. Bu tamamilə cəfəng iddiadır. Qərb dövlətləri bütün bu gerçəklikləri bilə-bilə, qondarma soyqırım amilindən Türkiyəyə qarşı siyasi təzyiq vasitəsi kimi istifadə edirlər. ABŞ Konqresində yenidən sözügedən məsələnin bir qədər fərqli formada gündəmə gəlməsi bununla bağlıdır. O üzdən, ermənilərdən bir vasitə kimi istifadə edirlər. Qərbdəki müəyyən dairələr bununla Türkiyəni cəzalandırmaq, bu ölkənin gerçəkdən bir Avropa dövləti olmasının qarşısını almaq istəyirlər. Bu minvalla, Türkiyəni Avropa İttifaqına yaxın buraxmaq istəmirlər. Fikrimcə, bu dəfə də ABŞ Prezidenti ənənəvi çıxışında soyqırım ifadəsini işlətməyəcək. Sadəcə, bu məsələni gündəliyə gətirməklə Türkiyəyə təzyiq edirlər”.
Vidadi ORDAHALLI
