Ceyhun Məmmədov: "Hesab edirəm ki, Ukrayna Azərbaycanın, cənab prezidentin təcrübəsindən istifadə edə və bu istiqamətdə real addımlar ata bilər"
Bildiyiniz kimi, Rusiya-Ukrayna müharibəsi ilə bağlı atəşkəsə çağırışlar edilir. ABŞ da, bəzi Avropa ölkələri də, Ukrayna prezidenti Volodimir Zelenski də atəşkəsə nail olmaqdan danışır.
Bu məsələni qeyd edək ki, Avropadan da, ABŞ-dan da əvvəl bu məsələni Azərbaycan Prezidenti İlham Əliyev qaldırıb.
Belə ki, ötən il Şuşa Media Forumunda Prezident İlham Əliyev Ukrayna ilə bağlı suala cavabında atəşkəsin vacibliyi haqda fikir bildirib: "Elə bir dövr var idi ki, biz atəşkəsə razı olmalı olduq. Bu, 1994-cü ildə baş verdi. Bu, çox çətin qərar idi… mənim atam Azərbaycanı məndən az sevmirdi və ya hər hansı bir azərbaycanlıdan az sevmirdi. Ancaq o, məcburən 1994-cü ildə bu atəşkəsə razı oldu, çünki ölkəni xilas etməli idi. O zaman Azərbaycanın faktiki olaraq ordusu yox idi. Biz ordumuzu hələ yeni qururduq və bu proses sonra davam etdi və bu gün biz qürur duya biləcəyimiz ordu qurmuşuq. Təkrar edirəm, bəzən biz çətin qərarlar verməli idik ki, əsas məqsədimizə çataq. Yəni bu, uzun bir hekayədir. Ancaq bu baxımdan Azərbaycanın təcrübəsi maraqlı ola bilər" .
Ukraynaya atəşkəs tövsiyəsi edirlər, Makron da bu haqda danışıb, Zelenski deyib ki, biz də atəşkəs istəyirik.
Atəşkəs doğrudan da çox vacibdir və qeyd etdiyimiz kimi, İlham Əliyevin Ukraynada atəşkəslə bağlı tövsiyələri var. Bildiyimiz kimi, Prezident İlham Əliyev çıxışlarında dəfələrlə Ukraynada sülh üçün atəşkəsin vacibliyini qeyd edib.
Azərbaycanın 1994-cü il atəşkəs təcrübəsi ilə Ukrayna atəşkəsi təcrübəsi arasında nə kimi bağlılıq ola bilər? Azərbaycanın atəşkəs təcrübəsi Ukraynanın köməyinə necə çata bilər?
Millət vəkili Ceyhun Məmmədov "Bakı-Xəbər"ə bildirdi ki, bu olduqca ciddi bir məsələdir:"Əslində bu məsələ önəmli və ciddi bir məsələdir. Söhbət ondan gedir ki, illər öncə Azərbaycanı da bu prosesə cəlb etmək istəyirdilər, Azərbaycan bu prosesə qoşulmadı, çox ağıllı, uzaqgörən bir siyasəti həyata keçirdi. Əslində cənab Prezident İlham Əliyev dəfələrlə bu məsələyə toxunaraq bildirib ki, Ukraynada mütləq sülhə nail olunmalıdır və bu istiqamətdə davamlı olaraq addımlar atılmalıdır, tədbirlər həyata keçirilməlidir...
Yəni bu oyunları Azərbaycanda da həyata keçirmək istəyirdilər və Azərbaycan buna imkan vermədi, bu prosesin qarşısını cənab Prezidentin rəhbərliyi ilə ala bildik. Proseslər onu göstərir ki, tərəflərin heç biri qələbə qazana bilmir, ona görə də doğru yol, doğru addım sülh istiqamətində real işlərin görülməsidir.
Azərbaycan keçən əsrin 90-cı illərinin əvvələrində bunu etdi, özü də bu prosesi uğurla həyata keçirdi, atəşkəsi elan etdi. Sonrakı dövrdə biz uzun müddət beynəlxalq təşkilatlar vasitəsilə məsəlinin həllinə çalışdıq. Məsələnin həllinə nail olmadıqda isə Azərbaycan digər yolla məsələni həll etməyə çalışdı. Bütün hallarda münaqişənin həlli yolu müharibənin dayandırılmasından keçir, ən qısa vaxtda müharibə dayandırılmalıdır. Hesab edirəm ki, Ukrayna Prezident İlham Əliyevin təcrübəsindən istifadə edə və bu istiqamətdə real addımlar ata bilər".
C.Məmmədovun sözlərinə görə, müharibədən çıxış yolu da budur, başqa bir yol, başqa bir istiqamət görsənmir.
C.Məmmədov qeyd etdi ki, bunun üçün mütləq addımlar atılmalıdır: "Qərarlar qəbul edilməli və işlər görülməlidir ki, bu proses öz töhfəsini versin. İndiki halda isə proseslərdə yalnız insanların həyatını itirdiyinin, bu proseslərin mənfi istiqamətdə getdiyinin şahidiyik. Bu proses yalnız və yalnız müəyyən çətinliklər və müəyyən qarşıdurmalara aparıb çıxara bilər".
İradə SARIYEVA
