Mübariz Göyüşlü: "BMT platformasında Qərbi azərbaycanlıların məsələsinin müzakirəyə çıxarılması mühüm bir göstəricidir"
İndiki Ermənistandan, tarixi Qərbi Azərbaycan ərazisindən deportasiya edilən soydaşlarımızla bağlı məsələ artıq beynəlxalq platformalara daşınır.
Belə ki, bu günlərdə Birləşmiş Millətlər Təşkilatının (BMT) İrqi ayrıseçkiliyin ləğv edilməsi üzrə Komitəsinin 114-cü sessiyası çərçivəsində Ermənistanın dövri məruzəsinə baxış keçirilir.
Dekabrın 2-də - baxışın ilk günündə Komitə üzvü Çunq Çinsunq Ermənistanın məruzəsində Azərbaycanla bağlı çox sayda iddiaların yer aldığına təəccüblənərək, Ermənistanda bir nəfər azərbaycanlı belə yaşamadığı halda sənəddə Azərbaycana bu qədər yer ayrılmasına aydınlıq gətirilməsini sorğu edib.
Ermənistan nümayəndə heyətinin rəhbəri, bu ölkənin xarici işlər nazirinin müavini Vahan Kostanyan suala cavab verməkdə çətinlik çəkərək, azərbaycanlıların Ermənistanda yaşamadığını təsdiq edib, sənəddə Azərbaycanla bağlı yazılanları məruzənin mahiyyətinə uyğun olmayan təhlükəsizlik və siyasi vəziyyətlə əlaqələndirməyə çalışıb.
BMT rəsmisi Ermənistan nümayəndəsini Qərbi azərbaycanlılar məsələsi ilə bağlı fakt qarşısında qoyub və Ermənistanın nümayəndəsi məcbur olub deyib ki, Ermənistanda azərbaycanlılar yaşamır. Bu, Ermənistanın monoetnik siyasət yürütdüyünün ifşası deyilmi?
"Hesab edirəm ki, bu onların ləyaqətli şəkildə beynəlxalq təminat altında geri qayıdacaqlarına ümidləri artırır"
Cross Media Təhlil Mərkəzinin analitiki, siyasi şərhçi Mübariz Göyüşlü "Bakı-Xəbər"ə şərhində bildirdi ki, Ermənistanın monoetnik dövlət olduğu, orada azərbaycanlıların, eləcə də digər xalqların nümayəndələrinin yaşamadığı beynəlxalq aləmə məlumdur. M.Göyüşlü hesab edir ki, bunun BMT tribunasından elan olunması Ermənistanın əsl simasını açıb ortaya qoyur: "Ermənistanın monoetnik dövlət olması, orada radikalizm, revanşizm və faşizm kimi məsələlərin olduğunu biz yaxşı bilirik. Çünki biz bunun şahidiyik. Amma BMT, digər beynəlxalq təşkilatlar, böyük dövlətlər, xalqlar ola bilsin, bundan məlumatsız idilər, onlar Ermənistanı normal bir dövlət kimi qəbul etmək istəyirdilər. Amma yaxın tarixdə baş verənlər, Qərbi azərbaycanlıların zorla öz ata-baba yurdlarından qovulması faktları dünyaya göstərdi ki, Ermənistan revanşizmin, radikalizmin ənənələrinə sahib olan monoetnik bir dövlətdir. Dünya bilməlidir ki, Ermənistan "dənizdən dənizə Böyük Ermənistan" mifi ilə öz mövcudluğunu saxlamağa çalışan bədbəxt, zəlil bir dövlətdir.
Bizə məlum olan bu faktın dünyaya da məlum olması çox müsbətdir".
M.Göyüşlü qeyd etdi ki, beynəlxalq aləmdə də, bəzi dövlətlərdə də Ermənistanın necə bir dövlət olduğunu bilirlər, oradan azərbaycanlıların deportasiya edildiyi barədə də məlumatlıdırlar, sadəcə özlərini korluğa, karlığa vururlar. "Biz də mümkün olan hər fürsətdə bu faktları dünya ictiamiyyətinə təqdim etməliyik. Bizim BMT-yə, digər beynəlxalq təşkilatlara təqdim etdiyimiz sənədlər, faktlar Qərbi Azərbaycan məsələsini sürətləndirir, daha da irəliyə doğru aparır. Bu məsələnin gec-tez gerçəkləşəcəyi şübhə doğurmur, çünki onun real əsası var".
M.Göyüşlü vurğuladı ki, Qərbi azərbaycanlıların problemlərinin BMT-də qaldırılması, müzakirəyə çıxarılması çox müsbət haldır və bu, irəlyə doğru atılmış növbəti addımdır: "BMT platformasında Qərbi azərbaycanlıların məsələsinin müzakirəyə çıxarılması mühüm bir göstəricidir. Hesab edirəm ki, bu onların ləyaqətli şəkildə beynəlxalq təminat altında geri qayıdacaqlarına ümidləri artırır. Çünki proses ona doğru gedir və bu məsələyə daha geniş səviyyədə beynəlxalq dəstəyin veriləcəyinə şübhə etmirəm".
İradə SARIYEVA
