Azərbaycanın strateji tərəfdaşı olan Gürcüstanda parlament seçkilərindən sonra ölkəyə kənar müdaxilələrin ola biləcəyi haqqında məlumatlar yayılır. Özü də söhbət hərbi müdaxilədən gedir. Xatırladaq ki, elə bu günlərdə Ukrayna tərəfində müharibədə iştirak edən "Gürcüstan Legionu" üzvləri Gürcüstana qayıtmağa hazır olduqlarını bəyan ediblər.
Ukrayna Silahlı Qüvvələrinin tərkibində döyüşən "Gürcüstanın Birliyi" partiyasının lideri Lado Qamsaxurdiya "X" sosial şəbəkəsindəki səhifəsində məsələəy münasibət bildirib: "Qafqaz İttifaqının Hərbi Komitəsinə daxil olan gürcü bölmələrinin komandirləri fövqəladə iclasda Gürcüstana qayıtmaq qərarına gəliblər və hazırda Gürcüstan prezidenti Salome Zurabişvilidən siqnal gözləyirlər. Onlar Gürcüstan əhalisini "hər hansı bir yolla" qorumağa hazır olduqlarını bildiriblər". Ancaq Salome Zurabişvili özü bu barədə fərqli bir mövqe sərgiləyib: "Ukrayna Silahlı Qüvvələrinin tərəfində döyüşən gürcü muzdlularının TİFLİSƏ müxalifətin etiraz aksiyalarında planlaşdırılmış iştirakı ilə bağlı xəbərlər təxribat xarakterlidir. Mən müxtəlif formada mesajlar aldım ki, guya gürcü hərbçiləri Ukraynadan gəliblər və bu etiraz aksiyasına hərbi qulluqçu kimi qoşulmağa hazırlaşırlar. Bu, birbaşa təxribatdır, bu baş vermir, buna inanmayın". Onun sözlərinə görə, bu şayiələr hakim "Gürcü Arzusu" partiyasını çox narahat edən aksiyanı gözdən salmaq üçün yayılır. Zurabişvili qeyd edib ki, mitinqlərin öz-özünə təşkil olunması və tərəflərin heç birinin onlara müdaxilə etməməsi vacibdir. O, vətəndaş cəmiyyəti və qeyri-hökumət təşkilatlarının Konstitusiya Məhkəməsinə təsir göstərməsini və parlament seçkilərinin qeyri-legitimliyi ilə bağlı iddiasına baxmağa məcbur etməsini vacib hesab etdiyini vurğulayıb. Amma bütün bunlara baxmayaraq, Şərqi Avropa ölkələri, eləcə də Baltikyanı ölkələrdən də "rəngli inqilab" üzrə hazırlanmış xüsusi qrupların Gürcüstana göndərildiyi xəbərləri yayılır. Hakimiyyətin devrilməsi məqsədilə Tiflisə qruplar göndərən ölkələr arasında "publika.az" poratlının məlumatına əsasən, Ermənistanın da adı çəkilir. Məlumatlara görə, iğtişaşlara dəstək vermək üçün ermənilərin göndərilməsi tapşırığını Ermənistanın baş naziri Nikol Paşinyan verib. Ermənistanda "Demokratik Alternativ" partiyasının sədri Suren Surenyants da bildirib ki, onda bununla bağlı məlumatlar var: "Paşinyan Gürcüstanda hakimiyyətin dəyişməsini ürəkdən istəyir. Məndə olan məlumata görə, Gürcüstanda keçirilən etiraz aksiyalarında Ermənistandan göndərilən 400-500 nəfərlik qrup da iştirak edir". Qeyd edək ki, Paşinyan hakimiyyətinin həqiqətə də Gürcüstana münasibəti birmənalı deyil və burada Qərb faktoru da mühüm rol oynayır. Qərb Ermənistan vasitəsilə də Gürcüstana təsir eməyə çalışır. Hələ bir müddət öncə Belarusdan olan hərbi-siyasi analitik Aleksandr Tixanski bunun səbəbləri barədə çox maraqlı açıqlamalr vermişdi. O qeyd edir ki, bu gün bir çox erməniY millətçiləri, o cümlədən gürcü pasportu olanlar həm Rusiyaya, həm də "ruspərəst" adlandırdıqları Gürcüstan hökumətinə nifrət edirlər. Ekspert bu vəziyyəti erməni millətçilərinin Gürcüstanı Qərblə Rusiya arasında döyüş meydanına çevirmək istəyi ilə izah edib: "Gürcüstanda gedən proseslər, qonşu ölkədə siyasətin necə davam edəcəyi Ermənistan üçün önəmlidir. Belə ki, Ermənistanın ixrac və idxalının təxminən 70 faizi Gürcüstan ərazisindən keçir. Ermənilərin Gürcüstandakı iğtişaşlara verdiyi dəstək siyasi elitanın qonşu ölkədə hakimiyyəti dəyişməyə yönəlmiş hərəkətləri ilə izah olunur. Erməni elitası Mixeil Saakaşvilinin "Vahid Milli Hərəkat" partiyası ilə xarici agentlər haqqında qanunun qəbuluna qarşı birgə müraciət imzalayanda hamını təəccübləndirib. Ermənistanın siyasi elitasının bir hissəsinin Gürcüstan hakimiyyətinə qarşı çıxması, bu ölkənin daxili işlərinə qarışması ilə bağlı vəziyyətin özü unikaldır. Aydındır ki, erməni millətçiləri Gürcüstan müxalifəti illə eyni komandada işləyir. Siyasi elitanın bu hissəsi müəyyən ölkələrdə birləşərək bir-birini dəstəkləməyi xoşlayır. Onlar qarşılıqlı əlaqədə olur və postsovet dövlətlərini Rusiyadan ayırmaq üçün fəal işləyirlər.
Beləliklə, Ermənistan iqtidarı və müxalifəti göstərdi ki, onlar da Qərbin sifarişi ilə hərəkət edirlər. Gürcüstanda seçkilərdən sonra vəziyyətin sabitliyini pozmaq üçün təxribatçılara, o cümlədən vicdan əzabı çəkmədən digər Gürcüstan vətəndaşlarını öldürməyə başlaya bilənlərə ehtiyac var. Çox təəssüf ki, həm Qərbdə, həm də qərbyönlü müxalifətdə belə insanlar var. Onların arasında etnik ermənilər və ikili vətəndaşlığı olanlar - erməni və gürcülər də var. O cümlədən Ermənistan Respublikasında daimi yaşayanlar və Qarabağdan olan zərərsizləşdirilməmiş yaraqlılar seçkiyə qədər Gürcüstana köçürülə bilər". Ekspert bununla bağlı xatırladıb ki, oxşar ssenari artıq NATO-nun Brüsseldəki mənzil-qərargahında müzakirə olunub və burada Ermənistan Təhlükəsizlik Şurasının katibi Armen Qriqoryanla alyans nümayəndələri arasında görüşlər keçirilib. Görüşdə Ermənistan xüsusi xidmət orqanlarının Gürcüstanda yaşayan etnik ermənilər arasında yaradılmış agent şəbəkəsinin köməyi ilə "aktiv tədbirlər" hazırladığı açıqlanıb: "Gürcüstanda münaqişənin alovlanmasında bu cür təxribatçıların rolunu lazımınca qiymətləndirməmək olmaz. Bu baxımdan 2019-cu ilin yayında rusiyalı deputat Qavrilovun spiker kürsüsündə əyləşdirilməsindən sonra yaranmış emosional vəziyyətdən istifadə edən müxalifətin parlament binasını ələ keçirməyə cəhd etməsini xatırlatmaq yerinə düşər. Daha sonra Ermənistan vətəndaşları da saxlanılıb". Tixanskinin fikrincə, əvvəllər Rusiyaya sevgi və ümid bəsləmiş bir çox erməni separatçıları indi ümidlərini Qərbə bağlayırlar: "Öz xalqından dəfələrlə geosiyasi oyunlarda istifadə edən erməni millətçiləri Gürcüstanı Qərblə Rusiya arasında döyüş meydanına çevirmək istəyirlər. "Rusiyayönlü" erməni lobbisi qeyri-sabit vəziyyətdən sui-istifadə edərək Rusiya ordusunun Gürcüstana yenidən girməsini təhrik etməyə çalışır. Öz növbəsində, İrəvan yeni revanşist müharibənin baş verəcəyi təqdirdə Gürcüstana Qərbin hərbi tranziti üçün ərazi kimi baxır. Bu, Tiflisdə qərbyönlü müxalifətin hakimiyyətə gələrək Rusiyaya qarşı "ikinci cəbhə" açacağı halda baş verə bilər. Hər iki ssenari gürcü dövlətçiliyi üçün faciəli ola bilər. Ona görə də Gürcüstanda sabitlik və əmin-amanlıq yalnız Rusiya deyil, Türkiyə və Azərbaycanın da maraqlarına cavab verir". Qərbin Cənubi Qafqaz regionunda gərginliyi körükləmək cəhdləri Azərbaycan üçün xüsusilə qəbuledilməzdir. Gürcüstanda cərəyan edən proseslər bu ölkənin daxili işidir. Kənar qüvvələr və dövlətlərin bu hadisələrə müdaxiləsi demokratik dəyələrə nümayişkar sayğısızlıqdır. Yaranmış vəziyyət həm də demokratik əsaslarla keçirilmiş seçkilərin nəticələrinə hörmətlə yanaşmağı tələb edir. Amma Qərbdə bunu nəzərə almaq istəmirlər.
Ramil QULİYEV
