Ramil Hüseynov: "Necə ki, Gürcüstan "Xarici agentlər" haqqında qanun qəbul edərək Qərbdən maliyyələşən..."
Gürcüstandakı seçkilərdən sonra, maraqlıdır ki, Rusiya Ermənistana münasibətdə də bu və ya digər formada təzyiq dilini işə salıb və bu, son vaxtlar özünü daha çox göstərir. Bu baxımdan Rusiya Dövlət Dumasının sədr müavini Pyotr Tolstoyun Ernənistana ünvanladığı fikirlər diqqət çəkir.
Tolstoy bəyan edib ki, Rusiya olmasa, Ermənistan da olmayacaq. O, həmçinin, Ermənistanı Qərbin diqtə etdiyi qaydalar çərçivəsində və erməni xalqının iradəsinə zidd addımlar atmaqda da günahlandırıb: "Erməni xalqı onu əsrlər boyu hansı dövlətin müdafiə etdiyini çox yaxşı bilir. Nə Qərbin addımları, nə də Avropa ailəsinə üzv olmaq arzusu Ermənistanın gənclərində antirusiya mövqeyinin formalaşmasına imkan verəcək. Duma da Rusiya ilə Ermənistan arasında münasibətlərin yaxşılaşmasının lehinədir. Lakin Ermənistan kursunu dəyişir. Əlaqələrimizin normallaşması üçün Ermənistan orada fəaliyyət göstərən və qeyri-konstruktiv mövqedə olan 2500 təşkilatın fəaliyyətini dayandırmalıdır. Ermənistanın bir nömrəli problemi Qərb və Avropa ilə əməkdaşlığın ölkəni xilas edəcəyi barədə xəyallarıdır. Bu mövqeyi həm Nikol Paşinyan, həm də onun tərəfdarları dəstəkləyir".
Maraqlıdır, Tolstoy 2500 təşkilatın fəaliyyəti dayandırılmalıdır deyəndə nəyi nəzərdə tutur?
"Rusiya eynən buna bənzər qanunun Ermənistanda da qəbulunu istəyir"
Sözügedən məsələni "Bakı-Xəbər"ə şərh edən "Yeni Xətt" Siyasi Tədqiqatlar Mərkəzinin rəhbəri Ramil Hüseynov hesab edir ki, burada söhbət QHT şəbəkəsindən gedir: "Məsələ ondadır ki, son vaxtlara qədər Gürcüstandan sonra Qərbdən ən çox maliyyələşən Ermənistan QHT-ləri olub. Qərb həm Ermənistanda hakimiyyətə, həm də QHT-lərə böyük yardım edir. Qərbin maraqlarından çıxış edən bir neçə partiya Rusiyaya qarşı ciddi təbliğat aparır. Ancaq ictimai rəyin anti-Rusiya ovqatında köklənməsində məhz bu QHT-lərin rolu böyükdür. Onlar həm müəyyən media resurslarına malikdilər, həm də bir sıra layihələr həyata keçirirlər. Bu səbəbdən Ermənistan cəmiyyətində Rusiyaya qarşı ciddi etimatsızlıq müşahidə olunur. Ona görə də Tolstoy bu təşkilatları hədəf alır. Necə ki, Gürcüstan "Xarici agentlər" haqqında qanun qəbul edərək Qərbdən maliyyələşən QHT-lərin fəaliyyətini məhdudlaşdırdı. Rusiya eynən buna bənzər qanunun Ermənistanda da qəbulunu istəyir. Ancaq nə qədər ki Paşinyan hakimiyyətdədir, Ermənistan buna getməyəcək. Çünki Paşinyanı hakimiyyətə gətirən, onu qoruyan Qərb olub. Paşinyan buna getsə, bu ona baha başa gələ bilər. Yalnız Rusiyapərəst qüvvələr hakimiyyətə gələndən sonra Ermənistan həmin QHT-ləri sıradan çıxaracaq. Bu isə real görünmür. Çünki həmin müxalif qüvvələr zəifdilər".
Vidadi ORDAHALLI
