Məhəmməd Əsədullazadə: "Mur demək istəyir ki, Rusiya qalib gəlsə, ABŞ fövqəldövlət statusunu itirəcək"
"Rusiya Ukraynada qalib gəlsə, dayanmayacaq". Bu barədə Britaniya kəşfiyyat rəhbəri Riçard Mur "Skay Nyus"a açıqlama verib.
"Rusiya Ukraynada qalib gəlsə, Çin nəticələrini ölçüb-biçəcək, Şimali Koreya cəsarətlənəcək və İran daha da təhlükəli olacaq", - o bildirib.
Mur Donald Trampa xəbərdarlıq edərək, Rusiya Ukraynada uğur qazanacağı təqdirdə, ABŞ-da təhlükəsizliyin risq altında olacağını qeyd edib.
Onu da nəzərə almaq lazımdır ki, Böyük Britaniya qədər Birləşmiş Ştatlara yaxın olan ikinci ölkə təsəvvür etmək çətindir. Əgər bu ölkənin kəşfiyyat rəhbəri belə xəbərdarlıq edirsə, deməli onlarda əminlik var ki, Tramp Ukraynanı güzəştə məcbur edəcək. O baxımdan, Murun xəbərdarlığı nə deməkdir?
"London Tramp səlahiyyətlərini icra etməyə başlayandan sonrakı proseslərdən narahatdır"
Sözügedən məsələni "Bakı-Xəbər"ə şərh edən politoloq Məhəmməd Əsədullazadə buna bir neçə aspektdən yanaşdı: "Məsələ ondadır ki, Böyük Britaniya Rusiyanın Ukraynada qalib gəlməsinə qarşıdır. O üzdən, Trampı xəbərdar edirlər. Çünki ABŞ-ın yeni administrasiyası ilə bağlı müəyyən qayğılar var. Düşünürlər ki, Tramp növbəti mərhələdə Ukraynaya yardımları kəskin azalda bilər. Ona görə də qayğıları artır. Mur bununla demək istəyir ki, Rusiya qalib gəlsə, ABŞ fövqəldövlət statusunu itirəcək. Rusiyanın Avropaya təsiri daha da artacaq. Nəticədə dünyanın siyasi arxitekturasını Rusiya müəyyən edəcək. Bu isə ABŞ-ın strateji cəhətdən məğlub olması deməkdir. O baxımdan hesab edirəm ki, Böyük Britaniyanın bu xəbərdarlığı məntiqlidir. Hesab edirəm bu, çox ciddi xəbərdarlıqdır. İngiltərə ilə ABŞ dünyada daim koordinasiyalı fəaliyyət göstərir. Ancaq Murun xəbərdarlığı onu göstərir ki, London Tramp səlahiyyətlərini icra etməyə başlayandan sonrakı proseslərdən narahatdır. Düzdür, Böyük Britaniya, Fransa və Almaniya Ukraynaya hərbi dəstəyi artırır. Almaniya kansleri Olaf Şolts Ukraynaya səfərində Rusiyaya qarşı yeni bir hərbi mərhələnin başlanması mesajını verdi. Almaniya ABŞ-dan sonra Ukraynaya ikinci ən böyük silah yardımı edən dövlətdir. 2025-ci ildə də Ukraynaya yeni silahlar, o cümlədən hava hücumundan müdafiə sistemləri, haubitsalar, hücum və kəşfiyyat pilotsuz uçuş aparatları, artilleriya mərmiləri veriləcək. Dekabr ayı üzrə Berlin Ukraynaya 650 milyon avro dəyərində silah tədarük edəcək. Artıq Rusiyaya qarşı üç ölkə birgə mübarizə aparmaq barədə razılığa gəlib. Həmçinin Polşa da prosesdə aparıcı mövqeyini qoruyub saxlayır. Ancaq ABŞ olmadan bütün bunlar yetərli deyil. Hesab edirəm, Böyük Britaniya və digər Avropa ölkələri çalışacaqlar ki, Trampı yola gətirsinlər".
Vidadi ORDAHALLI
