Sahil Kərimli: "Bu, daha çox Makronun qətiyyətsizliyinin göstəricisidir"
İsrailin Baş naziri Benyamin Netanyahu, Beynəlxalq Cinayət Məhkəməsinin (BCM) qərarına baxmayaraq, Fransa ərazisində həbs olunmayacaq. Bu barədə Fransa Xarici İşlər Nazirliyinin (XİN) məlumatında bildirilir.
"Fransa Roma Statutundan irəli gələn öhdəliklərinə əməl edir və BCM ilə tam əməkdaşlıq edir. Eyni zamanda, Fransa qanunlarına görə, İsrailin Baş naziri Benyamin Netanyahu və digər nazirlər toxunulmazlığa malikdirlər. Əgər BCM onun həbsini və ekstradisiyasını tələb edərsə, bu da nəzərə alınacaq", - məlumatda vurğulanıb.
Qeyd edək ki, noyabrın 21-də BCM Netanyahu və İsrailin keçmiş müdafiə naziri Yoav Qallantın 2023-cü il oktyabrın 8-dən 2024-cü il mayın 20-dək Fələstin ərazisində törətdikləri hərbi cinayətlər və insanlığa qarşı cinayətlər ittihamı ilə həbsə orderlər verdiyini açıqlayıb.
Məlum olduğu kimi, Makron əvvəlcə deyirdi ki, BCM-nin hökmünə uyğun olaraq Netanyahu Fransaya gəlsə həbs olunacaq. Keçən həftənin cümə günü isə Fransa XİN bəyan etdi ki, Netanyahu Fransaya gələrsə həbs olunmayacaq, çünki onun toxunulmazlığı var.
Görsənən odur ki, Makron Netanyahudan qorxdu, əvvəlcə dedi ki, həbs olunacaq, sonra isə sözünün əksini dedi.
"Netanyahu ilə bağlı BCM-nin hökmünün Fransada yerinə yetirilib-yetirilməyəcəyi ilə bağlı Makronun tutduğu qeyri-sabit mövqe də bu naşı siyasətin davamıdır"
Makronun geri çəkilməsinin səbəblərinə şərh verən siyasi ekspert Sahil Kərimli "Bakı-Xəbər"ə bildirdi ki, ümumiyyətlə, Makron son dövrlərdə yarıtmaz beynəlxalq siyasəti, heç bir məntiqi olmayan naşı xarici xarici siyasət yürütməklə dünyada ad qazanan bir prezidentdir: "Biz Fransanın son illərdə həm daxili, həm xarici siyasətində tənəzzülün, sürətli geriləmənin, ümumiyyətlə qeyri-peşəkar yanaşmaların şahidi oluruq. İlk növbədə Fransanın beynəlxalq aləmdə nüfuzunun durmadan geriləməsi, bu ölkənin siyasi hakimiyyətinin, Fransa rəhbərliyinin beynəlxalq arenada öz nüfuzunu ciddi şəkildə itirməsi buna dəlalət edir ki, Makron çox naşı siyasətçidir və ölkəni konkret olaraq idarə edə bilmir. Bununla paralel olaraq, bəli, İsrail prezidenti Netanyahu ilə bağlı BCM-nin hökmünün Fransada yerinə yetirilib-yetirilməyəcəyi ilə bağlı Makronun tutduğu qeyri-sabit mövqe də bu naşı siyasətin davamıdır. Burda Netanyahunun həbs olunacağı, yaxud olunmayacağından söhbət getmir, sadəcə əsas məsələ ondan ibarətdir ki, Makron əvvəlki açıqlamalarında İsrail prezidentinin Fransaya gələcəyi təqdirdə həbs olunacağını demişdi, amma sonradan nədənsə bu mövqeyindən əl çəkdi və əksini söylədi. Yəni Fransanın Xarici İşlər Nazirliyi bəyan etdi ki, Netanyahunun toxunulmazlığı var və o, Fransada həbs olunmayacaq".
S.Kərimlinin sözlərinə görə, bütün bunlar deməyə əsas verir ki, Fransada birmənalı, vahid, konkret xətt üzrə siyasət yürüdülmür. Siyasi ekspert hesab edir ki, bu, daha çox Makronun qeyri-peşəkarlığından və öz reputasiyasını günü-gündən itirməyə doğru getməsindən xəbər verir. "Beynəlxalq arenada bu cür siyasi qətiyyətsizlik, təbiidir ki, qəbul edilmir. Bu, daha çox Makronun qətiyyətsizliyinin göstəricisidir. Yəni bir müddət əvvəl başqa bir bəyanat vermək, üstündən bir qədər keçəndən sonra tamam ayrı bir açıqlama ilə çıxış etmək Fransa dövlətinin Makronun timsalında bugünkü simasıdır"-deyə S.Kərimli bildirdi.
İradə SARIYEVA
