Əli Orucov: "Gürcüstan Rusiyanı işğalçı dövlət kimi tanıyır və Moskva ilə hər hansı bir müzakirə aparmaq istəmir"
"3+3" formatı Rusiya, Türkiyə, İran, Azərbaycan, Ermənistan və Gürcüstandan ibarətdir. Gürcüstan bir neçə dəfə platformada iştiraka dəvət edilsə də, hələlik bu təşəbbüsə qoşulmayıb. Bu formatda indiyədək xarici işlər nazirlərinin Moskva, Tehran və İstanbulda üç görüşü keçirilib.
Rusiya xarici işlər nazirinin müavini Mixail Qaluzin Moskvada keçirilən 2-ci Rusiya-Ermənistan İctimai Forumunda bildirib ki, Rusiya Cənubi Qafqaz ölkələri arasında əməkdaşlıq və qarşılıqlı əlaqəni genişləndirmək məqsədi daşıyan "3+3" formatını hərtərəfli struktura çevirmək üzərində işləyir.
Qaluzin vurğulayıb ki, Rusiya Ermənistanla Azərbaycan arasında münasibətlərin bütün sahələrdə normallaşmasına sadiq qalır. O, artıq öz effektivliyini sübut edən "3+3" platformasının əhəmiyyətini vurğulayıb.
Gürcüstandakı proses, xüsusilə Qərbin bu ölkənin daxili işlərinə müdaxiləsi "3+3" formatında müzakirə oluna bilərmi?
Baki-xeber.com-a açıqlamasında politoloq Əli Orucov bildirdi ki, Gürcüstanda son parlament seçkilərindən başlanan gərginlik son günlər təhlükəli nöqtəyə gəlib: "Proseslərin gedişindən görünür ki, qarşı duran tərəflər hələ kimpromislərdən uzaqdır. Zorakılıq hallarının və hakimiyyətin güc nümayişi vəziyyəti daha da şiddətləndirib. Lakin bu proseslərin "3+3" formatında müzakirə edilməsi və hansısa müsbət nəticələr əldə edilməsi mümkün görünmür.
Çünki Gürcüstan Rusiyanı işğalçı dövlət kimi tanıyır və Moskva ilə hər hansı bir müzakirə aparmaq istəmir. Xüsusən də hakimiyyətin Rusiyameylli adlandırılaraq, ona qarşı kütləvi etiraz dalğasının ölkəni bürüdüyü indiki dönəmdə arzuolunmazdır. Bu, müxalifətin əlinə yeni arqument verilməsi, "Gürcü Arzusu"nun rusiyapərəst olması barədə ittihamların təsdiqi kimi qiymətləndirilə bilər.
Məlum olduğu kimi, Gürcüstanda etirazların başlamasının əsas səbəbi indiki hakimiyyətin Avropaya inteqrasiyadan üz döndərməsidir. Regional problemlərin həlli və müzakirəsi üçün "3+3" formatı məqbul platforma olsa da, burda Gürcüstanın Rusiya ilə eyni masada əyləşməsi gözlənilmir. Ümumiyyətlə, Tiflis "3+3" formatı barədə rəsmi mövqeyini açıqlayıb, Gürcüstanın ərazilərini işğal edən Rusiya ilə eyni masada oturmaq fikrində deyil. Bu format Rusiyanın da maraqlarına tam uyğundur. Kənar aktorları regiona buraxmaq istəməyən Moskva bu format çərçivəsində öz dominantlığını qoruyub saxlaya bilər. Doğrudur, bugünədək "3+3" format çərçivəsində Gürcüstandan başqa digər region ölkələri görünsələr də, hələ ki, regionun vacib problemlərinin həllində yaddaqalan bir iş görməyib".
Dəniz NƏSİRLİ
