Faiq Ələkbərli: "Qərbi Azərbaycan məsələsinin beynəlxalq aləmə daşınması baxımından bunun əhəmiyyəti misilsizdir"
Dekabrın 5-də Qərbi Azərbaycan mövzusunda beynəlxalq tədbir keçiriləcək. Bunu Qərbi Azərbaycana təhlükəsiz və ləyaqətli qayıdış" mövzusunda dinləmədə Milli Məclisin Səhiyyə komitəsinin sədri Əhliman Əmiraslanov deyib.
O bildirib ki, tədbirdə 50-dən artıq ölkədən akademik, ictimai, siyasi xadimlər iştirak edəcək: "Belə tədbirlərin keçirilməsi də Qərbi Azərbaycana qayıdışımızla bağlı uğurlu addım olacaq. Almaniya, Rusiyadan da çox tanınmış insanlar olacaq. Ağsaqqallar Şurasının üzvləri burada iştirak edirlər. Biz də çalışacağıq ki, yeni yaranmış təşəbbüs qrupuna yeni insanlar daxil olsunlar".
"İstəyimizə nail olana qədər bütün istiqamətlərdə, bütün platformalarda fəaliyyətimizi davam etdirməliyik"
AMEA Fəlsəfə və Sosiologiya İnstitutunun "Türk xalqlarının fəlsəfi fikir tarixi və müasir fəlsəfəsi" şöbəsinin müdiri, fəlsəfə üzrə fəlsəfə doktoru, dosent Faiq Ələkbərli "Bakı-Xəbər"ə bildirdi ki, Qərbi Azərbaycan mövzusunda belə bir tədbirin keçilməsi və burda 50-dən artıq ölkənin alimlərinin iştirakı bu məsələnin genişlənməsində xüsusi əhəmiyyət daşıyır. F.Ələkbərli qeyd etdi ki, bu, Qərbi Azərbaycan mövzusunun daha geniş miqyasda təbliği deməkdir. "Əlbəttə, Qərbi Azərbaycanla bağlı elmi tədbirlərin keçirilməsi çox zəruridir. Qərbi Azərbaycan Göyçə, Qərbi Zəngəzur, Dərələyəz, Amasiya, İrəvan və digər mahallarımızı, ərazilərimizi özündə birləşdirir. Qərbi azərbaycanlıların təhlükəsiz şəraitdə, beynəlxalq təminat altında öz tarixi yurdlarına, ev-eşiklərinə qayıtması məsələsi çox aktualdır. Amma təəssüf ki, Ermənistan onları qaytarmamaq üçün min-bir bəhanə uydurur, onların haqqı olan qayıdışlarını ləngidir. Əlbəttə, Ermənistan hökuməti nə qədər cəhdlər etsə də, Qərbi azərbaycanlıların qayıdışının qarşısını almaq üçün saxta kampaniyalar aparsa da, prosesin qarşısını ala bilməyəcək. Çünki ədalət get-tez bərqərar olacaq".
F.Ələkbərli vurğuladı ki, 50-dən artıq ölkənin akademiklərinin, ictimai, siyasi xadimlərinin sözügedən tədbirə qatılması təqdirəlayiq haldır: "Bu o deməkdir ki, Qərbi azərbaycanlıların geri qayıdış prosesinin gerçəkləməsinə həmin ölkələrin nüfuzlu akademikləri, ictimai və siyasi xadimləri də dəstək verə bilər. Onların bu tədbirə qatılması onu deməyə əsas verir ki, onlar da bu işdə aktiv iştirak edirlər. Qərbi Azərbaycan bizim üçün həssas məsələlərdən biridir. O bizim keçmiş tariximizi, mədəniyyətimizi, fəlsəfəmizi, ədəbiyyat və incəsənətimizi, tarixi yurd anlayışımızı, geri qayıtmaq haqqımızı özündə qoruyub saxlayan bir bölgəmizdir. Qərbi Azərbaycanın ədəbiyyatı, mədəniyyəti, incəsənəti və sair bütöv Azərbaycan tarixini ayrılmaz parçasıdır. Bu alimlərin də keçiriləcək tədbirdə iştirakı, müzakirələrə qatılması bu məsələnin bütün yönlərdən - tarixi, coğrafi, iqtisadi, fəlsəfi, mədəni, ədəbi, elımi, tibbi baxımdan dəyərləndirilməsi deməkdir. Bunu yüksək dəyərləndiririk. Ümid edirik ki, bu məsələ daim diqqət mərkəzində olacaq. Güney Azərbaycan kimi, Qərbi Azərbaycan məsələsi də hər zaman diqqət mərkəzində olmalıdır. Bizlər bu işdə birgə əməyimizi ortaya qoymalıyıq".
F.Ələkbərlinin fikrincə, xarici ölkə alimlərinin, ictimi-siyasi xadimlərinin diqqətinin Qərbi Azərbaycan məsələsinə cəlb edilməsinin ən mühüm əhəmiyyətindən biri də odur ki, biz bu məsələni ölkə hüdudlarından kənara çıxarmağa nail oluruq. "Qərbi Azərbaycan məsələsinin beynəlxalq aləmə daşınması baxımından bunun əhəmiyyəti misilsizdir. Nəzərə alsaq ki, söhbət yüzlərlə azərbaycanlının öz tarixi yurdlarına qayıtmasından gedir və bu zaman prosesə daha çox ölkələri cəlb etməliyik. Çünki bu elə bu elə önəmli bir məsələdir ki, daim gündəmdə olmalı və istəyimizə nail olana qədər bütün istiqamətlətdə, bütün platformalarda fəaliyyətimizi davam etdirməliyik.
Sonuncu dəfə keçən əsrin 80-ci illərinin sonlarında yüzlərlə azərbaycanlı indi Ermənistan adlandırılan Qərbi Azərbaycandan, öz tarixi yurdlarından amansızlıqla, zorakılıqla deportasiya ediliblər. Bu tədbirin əhəmiyyəti həm də ondadır ki, Qərbi azərbaycanlıların silsilə deportasiya tarixi bir daha qeyd ediləcək və onların geri qayıdış hüququnun tanınması bəyan ediləcək. Əlbəttə, tədbirdə iştirak edəcək həmin alimlər, ictimai-siyasi xadimlər bu məsələni öz ölkələrində də aktuallaşdıra bilərlər" - deyə müsahibimiz vurğuladı.
İradə SARIYEVA
