Tiflisdəki proseslərin başında duran Qərb rezidenti məlumdur...
Elşən Manafov: "Bu, Qərbin "Qızılgül 2" inqilabının həyata keçirilməsi üçün göstərdiyi növbəti cəhddir"
Cənubi Qafqazda dayanıqlı sülh və təhlükəsizliyin təmin edilməsi hər zaman vacib çağırışlardan biri olub. Lakin Qərb ölkələri müxtəlif zamanlarda regiona müdaxilə edərək vəziyyəti daha da gərginləşdirib.
Gürcüstanda son parlament seçkilərindən sonra müşahidə edilən siyasi proseslər bir daha sübut edir ki, Qərb bu ölkədə öz maraqlarını təmin etmək məqsədilə yenidən "rəngli inqilab" ssenarisi planlaşdırır.
Gürcüstanın mövcud siyasi gərginliyində prezident Salome Zurabişvilinin rolu danılmazdır. Bəzi ekspertlər onun fəaliyyətini Qərbin, xüsusilə Fransa prezidenti Emmanuel Makronun maraqlarına xidmət edən siyasət kimi qiymətləndirir. Salome Zurabişvili Fransa siyasi elitasında yetişmiş şəxsdir. O, uzun illər Fransa diplomatiyasının üzvü olub və bu, onun qərarlarının və baxışlarının formalaşmasında mühüm rol oynayıb. Prezident kimi fəaliyyəti müddətində onun qərarları və bəyanatları çox vaxt Gürcüstan hökumətinin strategiyası ilə ziddiyyət təşkil edib. Hətta bəziləri onun Makronun casusu olduğumu da iddia edir.
O baxımdan bütün bunları ekspertlər necə dəyərləndirir?
"Hadisələrdə katalizator rolunda çıxış edən Fransa vətəndaşlığı olan rezident Salome Zurabişvilidir"
Sözügedən məsələ ilə bağlı fikirlərini "Bakı-Xəbər"lə bölüşən politoloq Elşən Manafov hesab edir ki, Gürcüstanda yaşanan hadisələr Qərbin bu ölkədə "Qızılgül 2" inqilabının həyata keçirilməsi üçün göstərdiyi növbəti cəhddir: "Ukraynada Maydan hadisələrində olduğu kimi, etiraz aksiyalarında iştirak edən qərbyönümlü müxalifət, habelə, onunla iş birliyində olan QHT-lər Qərbin donor institutlarının maliyyə dəstəyi ilə birgə hərəkət edirlər. Məqsəd isə Gürcüstanda çoxluğun siyasi iradəsi ilə formalaşmış parlament və hökumətə təzyiqləri gücləndirərək onları növbədənkənar seçkilərə getməyə məcbur etməkdir. Bu da legitim hakimiyyəti tanımamaq istəyindən irəli gəlir. "Gürcü arzusu" ölkənin Qərbə inteqrasiya olunmasının heç vaxt əleyhinə olmayıb. Sadəcə olaraq, bu inteqrasiyanın gürcü xalqının milli adət və dəyərlərinə uyğun şəkildə aparılması, Qərb dəyərləri adı altında Gürcüstanın mental dəyərlərini hədəfə ala biləcək qanunlarının qəbul olunmasının əleyhinədir. ABŞ və Avropa İttifaqının Gürcüstanla əməkdaşlıq siyasətinə qlobalistlərin maraqları konteksindən yanaşması Gürcüstanın müstəqilliyi və suverenliyinə təhdid olduğundan, "Gürcü arzusu" bərabər hüquqlu münasibətlərin qurulmasının, onların qarşılıqlı maraq və mənfəət prinsiplərinə nəzərən genişləndirilməsinin tərəfdarı olub. Qərbin Gürcüstanda maliyyələşdirdiyi bəlli QHT-lərə dövlət nəzarəti, xüsusilə onların fəaliyyəti ilə bağlı maliyyə hesabatı üzərində şəffaflığın təmin edilməsi üçün gürcü hökumətinin qəbul etdiyi qərarlar Qərbin təsir agentlərinin fəaliyyətini məhdudlaşdırdığından, ABŞ və Aİ bu kimi qanunların qəbul olunmasında Rusiyanın rolu olduğunu iddia edir. Kobaxidze hökumətini milli maraqlara xəyanətdə günahlandırırlar. Halbuki, məlum qanunlar ABŞ və Aİ ölkələrində çoxdan qüvvədədir. Bu mənada Xarici təsirlərin şəffalığı haqqında qanunun qəbulunun Rusiya sifarişi ilə qəbul olunduğunu iddia etmək absurddur. Məsələ kifayət qədər sadədir, Kollektiv Qərb yalnız onun maraqlarından çıxış edən satellit siyasi elitalarla əməkdaşlıq edir. Dövlətçiliyə və xalqa sadiq siyasətçilər isə Qərb tərəfindən "persona non qrata" elan olunurlar. Rəsmi Tbilisiyə olan təzyiqin arxasında onun milli maraqlardan çıxış edərək ölkədə Rusiyaya qarşı cəbhə açmaması, Qərbin təhdid və təzyiqlərinə baxmayaraq Rusiyaya qarşı sanksiyalara qoşulmamasıdır. Qərb ciddi cəhdlə Gürcüstanda onun maraqlarına xidmət edəcək siyasi qüvvələrin iqtidara gəlməsində maraqlıdır. Buna görə də, rəsmi Tbilisiyə təzyiqlər həm ölkə daxilində beşinci kolona daxil olan 4 siyasi partiyanın və QHT-lərin vasitəsilə gücləndirilir, cəmiyyət faktiki olaraq vətəndaş qarşıdurmasına sürüklənir. Kiyevdə Meydan hadisələrində olduğu kimi, polis və hüquq-mühafizə orqanlarına münasibətdə güc tətbiq edilir. Xarici təsirlər kimi isə Aİ qrantları dayandıracağını, maliyyə institutları tərəfindən güzəştli kreditlərin verilməyəcəyini, Gürcüstanla əməkdaşlıqdan imtina edəcəyini bildirir. Ən nəhayət, ABŞ birtərəfli şəkildə Gürcüstanla strateji tərəfdaşlıq haqqında qanunundan kənarlaşdırdığını bəyan edib. Hadisələrdə katalizator rolunda çıxış edən isə Fransa vətəndaşlığı olan Gürcüstan prezidenti Salome Zurabişvilidir. Makron və Bayden, habelə Paşinyan kimi Rotşildlərin adamı olan bu xànım ABŞ-dakı seçkilərdə ultraqlobalistlərə məğlub olmuş komandanın - qlobalistlərin tərəfdarıdır. Hazırda bütün postkommunist və postsovet məkanında qızışan rəqabətdə tərəf tutan siyasətçilərdəndir. Ukraynada legitimlik müddəti bitmiş Zelenskini və ya inzibati resurslar hesabına Moldovada prezident seçkilərində qalib gələn Sandunu müdafiə etməsi bu xanıma bəlli maliyyə klanları tərəfindən olan sifarişlərlə bağlıdır".
Vidadi ORDAHALLI
