Dəyanət Osmanlı: "Qərbin Gürcüstandakı siyasəti, təxribatçı hərəkətləri təkcə Gürcüstan məsələsi deyil, bütövlükdə Cənubi Qafqaz, o cümlədən də Azərbaycan məsələsidir"
Qərbin Gürcüstanda hakimiyyəti dəyişmək, devirmək üçün hazırladığı planı həyata keçirmək üçün müxalif qüvvələr, QHT-lər dağıdıcı addımlar atır və qonşu ölkədə vəziyyəti gərginləşdirirlər.
Qərbin Gürcüstanda hazırladığı qarşıdurma və qeyri-sabitlik ssenarilərinin Azərbaycan üçün nə təhlükəsi var? Bizim üçün də hər hansı bir təhlükə ola bilərmi?
"Gürcüstanda təxribatla, qarışdırıcılıqla məşğul olan Qərb dairələri Azərbaycana da təsir göstərmək məqsədi güdürlər"
"Borçalı" İctimai Birliyinin İdarə Heyətinin sədri Dəyanət Osmanlı "Bakı-Xəbər"ə şərhində bildirdi ki, Qərbin əsas niyyətlərindən biri də bu yolla Cənubi Qafqazda qarışıqlıq yaratmaqdır.
"Qərb və Avropa Gürcüstanda öz maraqlarının təminatı yönündə müxtəlif siyasi və ictimai təzyiqlərdən istifadə edir. Eyni zamanda müşahidə olunan odur ki, qanunvericilik sahəsində bu ölkəninin ictimai, sosial həyatına, milli-mənəvi dəyərlərinə uyğun olmayan dəyişikliklər etməyə çalışan xarici qüvvələr fəaliyyətə keçiblər. Gürcüstan dövləti isə bu yad təsirlərə dayanıqlıq göstərərək müstəqil dövlətçilik yolunu, müəyyənləşdirdiyi siyasi kursu müdafiə edir.
"Xarici təsirlər haqqında" və "Ailə dəyərlərinin və yetkinlik yaşına çatmayanların müdafiəsi haqqında" qanunların qəbulundan sonra isə Qərbin Gürcüstan hakimiyyətinə qarşı təzyiqləri daha da artıb.
Əlbəttə ki, Gürcüstanda sabitliyi pozmaq yolu ilə hakimiyyət dəyişikliyinə nail olmaq və bundan sonra mövqe üstünlüyü qazanaraq Cənubi Qafqaz regionuna içəridən, daha yaxından diqtə etmək Qərbin əsas arzusudur. Zənnimcə, Gürcüstanda keçirilən parlament seçkiləri Qərbin və Avropanın regionda bölücülük xəttinə xalqın tutarlı cavabıdır. Seçkilərin nəticələri Qərbin Gürcüstan üzərində ayırıcı xətlər yaratmaq cəhdlərinə və regionda münaqişələri qızışdırmaq yönündə siyasətinə ciddi bir zərbədir. Borçalı türklərinin digər vətəndaşlar kimi sülhün və stabilliyin yanında yer almaları təbiidir. Qərbin təsirləri ilə ölkəni parçalamaq və onu müharibəyə sövq etmək cəhdləri bu seçkilərin nəticələri ilə iflasa uğradı".
D.Osmanlı qeyd etdi ki, Gürcüstandaki tarixi torpaqlarında yaşayan azərbaycanlılar bu ölkənin ictimai-siyasi, sosial, mədəni sferalarında, regionun sabitliyi və davamlı inkişaf proseslərində həlledici rola malikdir. "Builki seçkilərdə orada yaşayan soydaşlarımızın böyük aktivliyi və seçkilərin nəticələrinə təsirləri bunu sübut edir.
Eyni zamanda indiki seçkilər göstərdi ki, Gürcüstanın azərbaycanlı əhalisinin regiondakı proseslərin gedişatında və ölkənin gələcəyində əhəmiyyətli bir nüfuzu vardır. Bu, Azərbaycanın və Gürcüstanın dostluq münasibətləri timsalında Qərbin və eləcə də Ermənistanın regiondakı təxribatçı siyasətinə qarşı fəaliyyətdə və regional təhlükəsizlik məsələlərində eyni mövqedə olduqlarını bir daha sübut edir. Soydaşlarımız həmişə tutduqları mövqe ilə dağıdıcı siyasətə qarşı çıxaraq, sülh və sabitliyi müdafiə ediblər.
Bu gün regionda həyata keçirilən qlobal əhəmiyyətli layihələr məhz Gürcüstan-Azərbaycan tərəfdaşlığına əsaslanır. Ölkələrimiz arasında münasibətlər hər zaman qarşılıqlı etimad və inama əsasalanıb. Bu gün Gürcüstan və Azərbaycan arasında mövcud olan birlik, hər iki dövlətin gücünü artırmaqla yanaşı, onların regional və beynəlxalq arenalarda daha möhkəm mövqelərdən çıxış etmələrinə şərait yaradır. Bunu isə Qərbin gözü götürmür, çünki regionda bölücülük planlarının reallaşmasına imkan vermir.
Azərbaycan-Gürcüstan əməkdaşlığı tarixən regionun sabitliyinin təminatçısı sayılıb və bu gün də ölkələrimizin regional, beynəlxalq müstəvidə birliyi siyasi, iqtisadi sahədə inkişafa, müstəqilliyin möhkəmlənməsinə imkan yaradır. Gürcüstanın hazırkı hökuməti Azərbaycanla münasibətləri daha da inkişaf etdirmək üçün azərbaycanlı əhalinin təsirini və əhəmiyyətini yaxşı anlayır.
Azərbaycanlılar Gürcüstanın iqtisadi və sosial-mədəni həyatında, iki dövlət arasındakı əlaqələrdə fəal iştirak edərək həm öz milli maraqlarını, həm də hər iki ölkənin birgə maraqlarını təmin edir, qoruyurlar. Regionda mövcud təhlükələr fonunda Azərbaycan və Gürcüstan təhlükəsizlik sahəsində əməkdaşlığa böyük önəm verir. Bu əməkdaşlıqda hər iki ölkənin ərazi bütövlüyü və suverenliyinin qorunması əsas məqsədlərdən biridir. Həm Azərbaycan, həm də Gürcüstan bir-birinin ərazi bütövlüyünü dəstəkləyir və terrorizmə qarşı mübarizədə həmrəylik nümayiş etdirirlər. Gürcüstanın və Azərbaycanın birliyi regionda ikinci bir cəbhə açılması təhlükəsi qarşısında etibarlı səddir. Hər iki dövlət öz milli maraqlarını qorumağa davam etməyə qadir durumdadır".
D.Osmanlının sözlərinə görə, tarix də göstərir ki, bu birlik olduqda həm Azərbaycan, həm də Gürcüstan öz ərazilərinin, milli maraqlarının və təhlükəsizliyinin müdafiəsində daha güclü olurlar. "Ermənistan tərəfi regionda gedən proseslərdən nəticə çıxarmalı, sülh və inkşaf yolunu tutmalıdır.
Seçkilər sonrası Gürcüstandakı son etiraz aksiyaları da ölkəni qarşıdurma meydanına çevirmək xəttinin tərkib hissəsidir. Təxribatçı qüvvələr burada baş rolda çıxış edirlər. Etiraz iştirakçılarına qarşı silah işlətmək də həmin təxribatçıların işidir. Qərbin burada küçə döyüşləri ssenarisini həyat keçirmək niyyətləri açıq-aydın görünməkdədir. Və ümidvarıq ki, xalq bu proseslərdə milli dövlətçilik mövqeyində duracaq, Qərbin ölkəsini əlaltısına çevirməsinə imkan verməyəcək".
D.Osmanlı qeyd etdi ki, Qərbin əsas məqsədi Cənubi Qafqazda sabitliyi pozmaqdır və Gürcüstanda baş verənlər Qərbin çirkin, məkrli oyunlarındandır. Müsahibimiz vurğuladı ki, Azərbaycanın öz torpaqlarını işğaldan azad etməsi faktını qəbul etmək istəməyən, hər cür vasitələrlə Azərbaycanla Ermənistan arasında sülh müqaviləsinin bağlanmasına mane olan Qərb Cənubi Qafqazı öz əlinə almaq üçün ən iyrənc vasitələrdən istifadə edir. Gürcüstanda baş verən hadisələrin Azərbaycana təsirinə gəlincə, D.Osmanlı bildirdi ki, Qərbin təzyiqləri, antiazərbaycan addımları ölkəmizin nüfuzuna kölgə salmaq məqsədi daşıyır. O qeyd etdi ki, Azərbaycan və Türkiyə regionda mühüm gücə malikdir, Qərb isə bu gücü sarsıdıb regionda öz yerini müəyyən etmək istəyir, amma buna nail ola bilmir: "Bir məqamı nəzərə almaq lazımdır ki, Qərbin Gürcüstandakı siyasəti, təxribatçı hərəkətləri təkcə Gürcüstan məsələsi deyil, bütövlükdə Cənubi Qafqaz, o cümlədən də Azərbaycan məsələsidir. Gürcüstanda təxribatla, qarışdırıcılıqla məşğul olan Qərb dairələri Azərbaycana da təsir göstərmək məqsədi güdürlər. Onlar müxtəlif vasitələrlə Azərbaycana da təsir göstərmək istəyəcəklər. Amma bilirsiz ki, Azərbaycan Qərbin bu niyyətlərini yaxşı bilir və təhükəsizlik tədbirləri görür. Biz uzun müddətdir ki, Qərbin o təxribatçı qüvvələri, institutlarının bu əməllərindən xəbərdarıq. Qərb Ermənistan hökumətini öz əlinə alıb, indi də Gürcüstanı qarışdırır, emissarlarını ortaya atıb təxribatlar törədir. Amma hesab edirəm, Gürcüstan dövləti lazımı dirəniş göstərib o qüvvələri zərərsizləşdirəcək. Azərbaycanı isə o qüvvələr çoxdan hədəfə alıb və bizim ölkəmizdə onlar heç nəyə nail ola bilməyib, indən sonra da olmayacaqlar.
Bəziləri deyirdi ki, Azərbaycan quru sərhədləri açmalı idi. Amma görürsüz ki, dövlət quru sərhəddləri açmamaqla nə qədər müsbət iş görüb, bu təhlükəni əvvəlcədən gördüyü üçün bu şəkildə də qabaqlayıcı tədbirlər həyata keçirib. Təbii, quru sərhəd açıq olsaydı o qüvvələr Azərbaycana da sızmağa cəhd edərdilər. Amma sərhədin bağlı olması o qüvvələrin bizim daxilimizdə hansısa təxribatlar planlaşdırmasının qarşısını alır. Bütövlükdə, Azərbaycan dövləti onların bütün məkrli planlarını alt-üst etməyə qadirdir" - deyə D.Osmanlı qeyd etdi.
İradə SARIYEVA
