Son günlər Xankəndidəki separatçıların bir-biri ilə didişməsi, Azərbaycandan göndərilən humantitar yardım karvanına qarşı çirkin və populist çıxışlar, əslində, Qarabağdakı prosesləri neçə onilliklərdir qanlı müharibə formasında davam etdirən qüvvələrin “əl izləridir.” Hər kəsə artıq gün kimi aydındır ki, sülh müqaviləsinin baş tutmaması üçün, Azərbaycanın ədalətli mövqeyinin möhürlənmiş zəfərlə taclanmaması üçün qanlı ssenarilər dövrədədir.
Açıq-aşkar görünür ki, daima Ermənistandan bölgədəki proseslər üçün “qanlı yaba” şəklində istifadə edən beynəlxalq güclər bu gün daha təhlükəli və qanlı oyunlar hazırlayıblar. Onların separatçılara açıq şəkildə dəstək vermələri, orada yaşayan erməni əhalisini psixolji və hədə təhlükəsi altında qoyaraq öz maraqları üçün qalxana çevirmələri tam şəkildə dediklərimizi təsdiqləyir. Qondarma separatçı rejimin keçiriyi “seçkiləri” tanımayıb, daha sonra yeni “seçilmiş” separatçıbaşına dair məlumat və tanıtımlar paylaşan Avropa İttifaqı, üstəlik, Fransa və digərləri elə hesab edirlərmi ki, quyruqları kola soxulmuş, heç kimin görmədiyi “xoruzdurlar”? Belə görünür ki, avropalı “xoruzlar” quyruğu tez ələ verəndirlər. Ya da heç gizlətməyə ehtiyac da duymurlar. Onsuz da onların mövqeləri neçə əsrlərdir ki, bəllidir...
Bu siyasətin ən bariz “davamçısı” isə Beynəlxalq Qırmızı Xaç Komitəsidir. Bu beynəlxalq təşkilat açıq-aşkar öz görməli olduğu işi, daşımalı olduğu missiyanı bir kənara buraxıb, Xankəndidəki separatçıların təbliğat ruporuna, açıq şəkildə onların “müdafiəçisinə” çevrilib. Sözsüz ki, Avropa İttifaqındakı, Fransadakı “xoruzların” əmri ilə. Görəsən, 30 illik münaqişə dövründə işgəncə ilə öldürülən, əsirlikdə daxili orqanları diri-diri çıxarılıb orqan mafiyasına satışa çıxarılan azərbaycanlılar barədə bircə dəfə də olsun BQXK haqq səsini niyə ucaltmadı? Niyə vəhşiliyə və zülmə məruz qalan insanların yanında yer almadı?
Müharibə zamanı əsirlərin dəyişdirilməsini biznesə çevirən BQXK-dan gözləntilər elə separatçılarla bir cərgədə dayanması olardı ki, bu da baş verdi. İsrarla Laçın yolu ilə “yardım daşımaq” işində israr edən bu BQXK, əslində, humanitar yardımdan daha çox, Azərbaycana və Türkiyəyə qarşı düşmən siyasətin ruporuna çevrilib. Bu təşkilatın son dəfə əsl yırtıcı və təhlükəli siması bilirsiniz nə zaman açıldı? - hələ Ermənistan BQXK-nin adından istifadə edərək Qarabağa silah, mərmi və mina daşıdığı vaxt! Ortada olan fakt nədir, bilirsiniz? – bu, BQXK-nın da başıbatmış Araik Arutunyanla bir ağızdan danışması, bölgəyə humanitar yardım əvəzinə siyasi təxribatlar daşımasıdır. Avropadakı siyasətbazların “bölgədə acından ölən Xankəndi” şousu üçün təlimatlandırdıqları bu təşkilat indi daha təhlükəli və qanlı oyun üçün alovlu körpüyə çevrilib. Onlar, - Qarabağda sülh əvəzinə qan “xəritəsi” hazırlayan Qərbdəki anti -Azərabycan düşmənləri bu dəfə BQXK-ni seçiblər. BQXK-nin əsl üzü budur... Qarabağ ətrafındakı təhlükəli oyunlara ən bariz nümunə yenə qarşımızdadır. Qərbdəkilər Rusiyanı Qafqazdan, xüsusilə, Ermənistandan sıxışdırıb çıxartmaq üçün də BQXK-ni alətə çeviriblər. Artıq Türkiyə Prezidenti Rəcəb Tayyip Ərdoğanın Soçi səfərindən, Vladimir Putinlə açıq və gizli danışıqlarından sonra Rusiya da Azərbaycan və Türkiyənin cərgəsində göstərilir. Regionda oyunçular dəyişməsə də, cərgələr sanki yenilənir... Sübut? – buyurun: Rusiyadan Qarabağda yaşayan ermənilər üçün məhz Azərbaycanın təklif etdiyi yol ilə gələn humanitar yardım maşını artıq 2 gündür Bərdədə gözləyir. Həm separatçılar, həm də BQXK bu yardımın Ağdam- Xankəndi yolu ilə deyil, öz istədikləri variantda Xankəndiyə çatdırılmasını istəyirlər. Erməni separatçıları o dərəcədə “cürətləniblər” ki, artıq Kremlə də “kəllə atırlar.” Bəs Rusiyanın buna cavabı necə olacaq, onu da zaman göstərəcək. Sözsüz ki, ermənipərəst Sergey Lavrov bunu “görməməzlikdən” gəlsə, heç bir cavab olmayacaq. Həmişəki kimi... Mənə ən maraqlı olan cəhət odur ki, artıq BQXK artıq ermənilərin yerinə danışır, separatçılardan daha çox separatçılıq edir. Bu təşkilat həm də reinteqrasiya prosesinə maneə olmağa çalışır. Çünki Ağdam-Xankəndi yolunun açılmaması və bölgədəki uydurulmuş "blokada şousu"nun təşkilatçısı məhz BQXK-dır. Bir cümlə də yetər: Qarabağa humanitar yardım əvəzinə separatçılıq karvanı gətirən qırmızı xaç...
Mətləb Salahov
