Rusiyanın Qarabağdakı sülhməramlılarının yeni rəhbəri, general-polkovnik Aleksandr Lentsovun arvadı milliyyətcə ermənidir.
Bu barədə Rusiyada yaşayan azərbaycanlı professor Kamran Rüstəmov yazıb:
“Rusiya 67 yaşlı general Lentsovu Qarabağdakı sülhməramlıların komandiri təyin edib. Ən diqqətçəkən məqam isə onun həyat yoldaşının milliyyətcə erməni olmasıdır”.
Bu, Rusiyanın təsadüfi seçimidir, yoxsa erməni amili mütləq nəzərə alınıb? Bu faktor yeni komandanın ermənilərə meyillənməsinə əsas yarada bilərmi?
Hərbi ekspert Ədalət Verdiyev “Bakı-Xəbər”ə açıqlamasında bildirdi ki, Rusiyanın Qarabağ və Ermənistan məsələlərində Azərbaycanla münasibətləri fərqli platformalar üzərində qurulub: “ Ermənistan-Azərbaycan münasibətlərində Rusiya Azərbaycanı dəstəkləyir, eləcə də Zəngəzur və dəhlizin açılması məsələsində. Amma Qarabağda olan separatçıların məsələsində Rusiya daha çox silahlıların yanındadır. Bu da onların ərazidə daha çox ləngiməsi ilə əlaqədardır. Lentsov elə bir böyük fiqur deyil ki, Rusiya siyasətini təyin edə bilsin. Orada Rüstəm Muradov da, Volkov da var idi. İndi də Lentsov gəlib. Arvadının erməni olub-olmamasından asılı olmayaraq, hər bir komandan öz Müdafiə Nazirliyinin və ümumilikdə Rusiyanın yeritdiyi siyasətin ərazidə tədbiqinə çalışacaq. O özünəməxsus bir mövqe tuta bilməz, lakin ola bilsin ki, arvadı erməni olduğuna görə daha çox ermənipərəst mövqe sərgiləsin. Rusiyada baş nazirin də, xarici işlər nazirinin də erməni kökləri haqqında bilirik. Ona görə də, burada təəccüblü bir şey gözləmirəm. Hesab edirəm ki, belə bir vəzifəli şəxsi, yəni üç ordulu generalı cəmi 2000-ə qədər heyətə komandan etmək artıq Rusiyanın da zəiflədiyinin göstəricisidir. Azərbaycan ordusunda iki minlik kontingenti maksimum polkovnik-leytenant və ya polkovnik edarə edir. Rusiyada isə general-polkovnik. Bu onu göstərir ki, Rusiya Qarabağda baş verən proseslərdən, o cümlədən Laçın dəhlizindəki fəaliyyətlərimizdən, orada nəzarət buraxılış məntəqəsi və gömrük postunun quraşdırılmasından çox narahatdır. Çox böyük ehtimalla, daha üstün vəzifədə olan bu general da baş verən prosesləri sakitləşdirmək, gərginliyi azaltmaq, mümkün toqquşma ehtimalını sıfıra endirmək üçün əraziyə göndərilib. Rusiya Xarici İşlər Nazirliyindən də nəzarət buraxılış məntəqəsi ilə əlaqədar səslənən bəyanat kifayət qədər neytraldır. Yəni orada Rusiya həm narahatlığını bildirir bu proseslərdən, həm də tərəflərdən heç birinin adını çəkmir. Əvvəllər də erməni silahlılarına rus kontingentinin kuryerlik etməsinə nə Rusiyanın müdafiə naziri, nə də xarici işlər naziri diqqət yetirib. Odur ki, gələn generalın kim olmasından asılı olmayaraq, Azərbaycan ərazidə imzalanan birgə Bəyanatın şərtlərinə uyğun olaraq öz fəaliyyətlərini davam etdirəcək. Əsas diqqət isə Qarabağın erməni silahlılarından təmizlənməsinə və Zəngəzur dəhlizinin açılmasına yönələcək”.
Aydındır ki, indiki məqamda Aleksandr Lentsovun Qarabağ bölgəsindəki sülhməramlıların komandanı vəzifəsinə gətirilməsinin hansısa dəyişikliklərə səbəb olacağı haqqında fikir səsləndirmək tezdir. Volkov kimi Lentsov da özü haqqında düşüncələri öz fəaliyyəti ilə formalaşdıracaq. Lakin istənilən halda, Volkovun Aleksandr Lentsovla əvəzlənməsinin ümidverici dəyişiklik olduğu şübhəsizdir. Bu dəyişiklik, ilk növbədə, rəsmi Moskvanın Azərbaycanın etirazına ciddi yanaşdığını, onunla razılaşmağı zəruri saydığını göstərir. Volkov hansısa ikinci dərəcəli, “növbətçi” generalla deyil, hərbçilər arasında böyük nüfuza sahib olan Rusiyanın Müdafiə nazirinin müşaviri Lentsovla əvəzlənib.
Məhəmmədəli QƏRİBLİ
