Məlum olduğu kimi, aprelin 25-də Ermənistanın paytaxtı İrəvan şəhərində “Nemezis” terror əməliyyatına həsr olunmuş abidənin açılışı olub. Təbii olaraq, Azərbaycan və Türkiyə Xarici İşlər Nazirliyi İrəvanda "Nemezis" terror əməliyyatına həsr olunmuş abidənin açılışını pisləyib.
Nazirlik İrəvanda 1920-ci illərin əvvəllərində Osmanlı İmperiyasının siyasi və hərbi rəhbərlərinin, eləcə də o dövrün Azərbaycan rəsmilərinin və hətta Osmanlı imperiyasının bəzi erməni əsilli vətəndaşlarının qətlini törədənlərə həsr olunmuş “Nemezis abidəsi”nin açılışına qarşı çıxıb.
Məlumdur ki, bu ölkə Türkiyə ilə münasibətləri normallaşdırmaq istəyirdi. Ancaq "Nemezis” abidəsinin açılışını həyata keçirir. Maraqlıdır, beynəlxalq ictimaiyyət terrorçuların adının əbədiləşdirilməsinə niyə lazımi reaksiya vermir?
“Dünya dövlətlərinin Ermənistan terror təşkilatına reaksiya verməməsi, görməzdən gəlməsi o deməkdir ki…”
AMEA-nın Fəlsəfə və Sosiologiya İnstitutunun aparıcı elmi işçisi, fəlsəfə doktoru Faiq Ələkbərli “Bakı-Xəbər”ə açıqlamasında qeyd etdi ki, İrəvanda "Nemezis" terror təşkilatına abidə qoyulması və rəsmi açılışının keçirilməsi ermənilərin əsl mahiyyətini ortaya qoyur. Terror təşkilatları sadəcə bir millət üçün deyil, bütövlükdə bəşəriyyət üçün ciddi təhlükə və bəladır: "Azərbaycanın və Türkiyənin nüfuzlu dövlət xadimlərinə sui-qəsdlər təşkil etmiş, onları terrora məruz qoymuş "Nemezis"ə abidə qoyulması göstərir ki, Ermənistan sülh niyyətində deyil və normal münasibətlərin qurulmasını istəmir. Ermənistanın terrorçuluğa meyl etməsinə, rəsmi dəstək verməsinə təkcə Azərbaycan və Türkiyə qarşı çıxmalı deyil. Biz onsuz da illərdir erməni terroruna, vandalizminə qarşı mübarizə aparırıq, bundan sonra da aparacağıq. Ancaq dünya da erməni terroruna səs etməlidir. Əks halda erməniləri haqq yoluna gətirmək üçün güc birliyi vacibdir. Azərbaycan-Türkiyə birliyi erməniləri yenidən terrora əl atmaqdan çəkindirir. Ermənistan anlamalıdır ki, "Nemezis" kimi təşkilatlara rəğbət göstərmək birbaşa ermənilərin öz ziyanınadır”. Həmsöhbətimiz hesab edir ki, belə məsələləri daim gündəmdə saxlamaqla, Ermənistanın terrora qucaq açdığını ifşa etmək lazımdır: “Beynəlxalq təşkilatlar bu məsələyə ciddi etiraz etməli idi. Xüsusilə insan haqlarını müdafiə edən beynəlxalq institutlar məlum məsələdə öz mövqelərini ortaya qoymalı idi. "Nemezis"in bir terror təşkilatı olması hər kəsə aydındır. Dünya dövlətlərinin Ermənistan terror təşkilatına reaksiya verməməsi, görməzdən gəlməsi o deməkdir ki, onlar terroru dəstəkləyir”.
Həmsöhbətimiz hesab edir ki, “Nemezis”in əsl fəaliyyətinin ortaya çıxarılmasında Türkiyə və Azərbaycan birgə şəkildə mübarizə aparmalıdır, çünki Avropa və Qərb dövlətlərinin ikiüzlü siyasətini daim müşahidə edirik: “İrəvanda “Nemezis” terror təşkilatına abidənin qoyulması Ermənistan dövlətinin terrorçu mahiyyətini ortaya qoyan növbəti faktdır”.
Günel CƏLİLOVA
