Elşad Həsənov: “Sabah bir narahatlıq olanda rusları köməyə çağırmaq üçün bunu edirlər”
Xankəndidəki 8 saylı orta məktəbin həyətində rus fizik, hidrogen bombasının yaradıcılarından biri, siyasətçi Andrey Saxarova heykəl düzəldiblər.
Fizikin 101 illiyi ilə bağlı hazırlanan heykəlin bu günlərdə açılışı da keçirilib.
Qeyd edək ki, son vaxtlar Azərbaycanın Qarabağ bölgəsinin rus sülhməramlılarının nəzarətində olan hissəsində rus klassik və alimlərə heykəllər qoymaq “adəti” getdikcə genişlənir.
Elə bu arada məlumat verilib ki, Moskvanın açıq səma altında heykəltəraşlıq parkı olan “Muzeon”da Andrey Saxarovun abidəsi yoxa çıxıb.
Bu barədə publisist Nikolay Podosokrski Telegram kanalında yazıb. Heykəlin yoxa çıxmasını mayın 21-də Saxarovun doğum günü şərəfinə “Abidələr arasında insan” tematik gəzintisi keçirən “Memorial”ın bələdçiləri aşkar ediblər.
Heykəlin yoxa çıxması barədə daha əvvəl Memorialda keçirilən “Andrey Saxarov – Vicdanın akademiki” adlı sərginin müəllifi rəssam Katya Quşçina məlumat yayıb.
Andrey Saxarovun heykəli “Muzeon” Parkında gəzinti marşrutunun nöqtələrindən biri olmalı idi. Ora gələn gəzinti təşkilatçıları və iştirakçıları ehtiyatla Muzeyin ətrafında gəzsələr də, abidəni tapa bilməyiblər. Qorki parkının məlumat mərkəzi heykəlin harada olduğu ilə bağlı informasiyası olmadığını bildirib.
Daha sonra abidənin müəllifi Qriqori Pototski Saxarovun heykəlinin Moskvadan çıxarılaraq Qarabağda, Azərbaycanın qədim şəhəri olan Xankəndidə qoyulduğunu bildirib.
Heykəltəraşın sözlərinə görə, abidənin açılışında Qarabağdakı qondarma rejimin “rəhbərliyi” və oradakı rus sülhməramləları da iştirak edib.
Alimin heykəlini Moskvadan oğurlayıb Xankəndidə qoymaqla ermənilər hansı məqsədi güdüblər?
Siyasi şərhçi Elşad Həsənov “Bak-Xəbər”ə açıqlamasında bildirdi ki, ermənilər belə bir abidənin açılışı tanınmış alimin 101 illiyi ilə əlaqələndiriblər: “Akademik Saxarovun ikinci həyat yoldaşı Yelena Boner miliyyətcə erməni olub. Saxarovu da Ermənistana yönəlik tədbirlərə həmişə o aparırdı. Elə həmin vaxtdan Saxarovun özü də erməni təbliğatının təsiri altına düşmüş oldu. Harda bir adlı-sanlı alimin ermənilərlə əlaqəsini tapırlarsa, onun adını əbədiləşdirmək yolunu tuturlar. Son vaxtlar isə bu işləri Qarabağda görməyə başlayıblar. Səbəbsiz addımlar deyil. Bilirsiniz ki, Brüsseldə keçirilən son görüşdə vacib məsələlərlə bağlı razılıqlar əldə olunub. Buna görə də Qarabağdakı ermənilər bərk təşvişdədirlər, özlərinə arxa-dayaq axtarırlar. Bundan əvvəl isə biz məlumat aldıq ki, Qarabağda rus icması yaradılıb. Heç orada rus yaşamır, ancaq bu addımı atırlar. Bakıda rus icması fəaliyyət göstərirsə, Qarabağda bu ola bilməz. Bir ölkədə neçə dənə rus icması olmalıdır? Bütün bunlar ermənilərin məkrli niyyətindən xəbər verir. Sabah bir narahatlıq olanda rusları köməyə çağırmaq üçün bunu edirlər. Artıq Ermənistan başa düşür ki, Qarabağ məsələsi Azərbaycanın daxili problemidir. Ona görə də, oradakı ermənilərə əlavə dayaq axtarırlar. Ancaq bu cür biabırçı addımlarla heç nəyə nail ola bilməyəcəklər. Yeganə çıxış yolları Azərbaycanın yurisdiksiyası altında yaşamaqdan keçir. Heç bir heykəl və ya “icma” oyunu onları vəziyyətdən çıxara bilməyəcək”.
Məhəmmədəli QƏRİBLİ
