Tarif Şurasının uğursuz qərarına Prezident vetosu böyük dəstək reaksiyaları doğurdu

Tarix: 15.01.2015 / 02:40
Bölmə: İqtisadiyyat

Əli Məsimli: "Prezidentin yanacağın qiyməti ilə bağlı təklif etdiyi variant daha ədalətlidir"

Azər Mehtiyev: "Prezidentin benzinin qiymətini endirməsi doğru və yerində verilmiş qərardır"

Azərbaycan Respublikası Prezidentinin tapşırığına uyğun olaraq, 14 yanvar 2015-ci il tarixində Tarif Şurasının növbədənkənar iclası keçirilib. İclasda neft məhsullarının qiymətlərinə yenidən baxılıb və tariflərin tənzimlənməsi barədə yeni qəbul edilən qərara əsasən, Azərbaycan Respublikası Tarif Şurasının "Ölkə daxilində neft məhsullarının tariflərinin tənzimlənməsi barədə" 12 yanvar 2015-ci il tarixli, 1 nömrəli qərarı ləğv edilib.
Qərara əsasən, ölkə ərazisində istehsal edilərək daxili istehlaka yönəldilən avtomobil benzini, dizel yanacağı və maye qazın hər litri üzrə 2 qəpik yol vergisi şirkətdaxili tariflərin azaldılması hesabına tətbiq edilməklə, əvvəl olduğu kimi, "Aİ-92" markalı avtomobil benzininin pərakəndə satış qiyməti 1 litr üçün 70 qəpik, dizel yanacağının pərakəndə satış qiyməti isə 1 litr üçün 60 qəpik səviyyəsində müəyyən edilib. Həmçinin, maye qazın topdansatış qiyməti 1 ton üçün 300 manatdan 263,6 manata endirilib və yol vergisi ilə birlikdə topdansatış qiyməti 1 ton üçün 300 manat müəyyənləşdirilib.
İqtisadçılar ölkə başçısının benzinin satış qiymətini aşağı endirməsini müsbət qarşılayır.
İqtisadçı Azər Mehtiyev Prezidentin məlum qərarının doğru addım olduğunu bildirdi: "Bu addımın atılması doğru qərardır. Təbii ki, dünya bazarlarında neftin qiymətinin aşağı düşdüyü bir dövrdə Azərbaycanda yol vergisi adı altında enerji daşıyıcılarının qiymətinin artırılması yolverilməzdir. Ən azı, əhali neft məhsullarının qiymətinin aşağı salınmasını gözləyirdi. Bu fonda benzinin qiymətinin artırılması əhalinin haqlı narazılığına səbəb olmuşdu. Milli Məclis tərəfindən qanun qəbul olunanda yol vergisi benzinin gömrük qiymətində nəzərə alınmalı idi. Onsuz da enerji daşıyıcılarının qiyməti Azərbaycanda, demək olar ki, digər ölkələrə nisbətən bahadır. Ona görə də əhali indiki məqamda benzinin qiymətinin aşağı salınmasını gözləyirdi. Belə olan halda, Prezidentin qərarını doğru hesab edirik və atılan addım vaxtında verilən düzgün qərardır. Dövlət qurumları arasındakı əlaqənin kifayət qədər təmin olunmaması əhalinin inamını azaldan bir haldır".

Millət vəkili Əli Məsimlinin sözlərinə görə də, Prezidentin yanacağın qiyməti ilə bağlı təklif etdiyi variant daha ədalətlidir: "Benzinin qiymətinin 2 qəpik qaldırılmasına münasibət bildirərkən qeyd etmişdim ki, 1 il 2 ay bundan öncə, 2013-cü il dekabrın əvvəllərində benzinin qiyməti qaldırılanda aidiyyəti qurumlar bunu əsasən dünya bazarında neftin qiymətinin xeyli artması ilə izah edirdilər. 2014-cü ilin ikinci yarısından başlayaraq dünya birjalarında neftin qiyməti "Azəri-Layt" markalı neft üçün 113 dollardan tədricən 50 dollardan da aşağıya enib. Ona görə də cəmiyyətdə belə bir fikir, gözlənti var idi ki, neftin qiyməti qalxanda benzinin də qiyməti qaldırıldısa, indi neftin qiyməti kəskin surətdə aşağı düşdüyü şəraitdə benzinin qiyməti də aşağı salınmalıdır.
Amma əhali bunun əksini gördü, benzinin qiyməti hər litr üçün 2 qəpik artırıldı. Bu elə bir ciddi rəqəm olmasa da, hansı məqsəd daşımasından asılı olmayaraq, əhali səbəbinin açıqlanmasını istədi. Bunu nəzərə alaraq bildirmişdik ki, həmin sualın izahı açıq qaldıqca narazılıq da qalacaq və ona görə aidiyyəti qurumlar həmin suala açıqlama verib aydınlıq gətirsələr, daha yaxşı olar. Belə də oldu, suala aydınlıq gətirildi. Bu gün ölkə başçısının tapşırığına uyğun olaraq Tarif Şurasının qəbul etdiyi qərarı Azərbaycan üçün ən məqbul variant hesab edirəm. Prezidentin tapşırığına əsasən, yanvarın 14-də Tarif Şurasının növbədənkənar iclasında neft məhsullarının qiymətlərinə yenidən baxıldı və "Ölkə daxilində neft məhsullarının tariflərinin tənzimlənməsi barədə" yanvarın 12-də verilən 1 nömrəli qərar ləğv edildi. Ölkə ərazisində istehsal edilərək daxili istehlaka yönəldilən avtomobil benzini, dizel yanacağı və maye qazın hər litri üzrə 2 qəpik yol vergisi şirkətdaxili tariflərin azaldılması hesabına tətbiq edilməklə, əvvəl olduğu kimi, "Aİ-92" markalı avtomobil benzininin pərakəndə satış qiyməti 1 litr üçün 70 qəpik, dizel yanacağının pərakəndə satış qiyməti isə 1 litr üçün 60 qəpik səviyyəsində müəyyən olunub.
Yol vergisinin ləğv edilməsi müqabilində benzinin qiymətinin artırılmasından bu ilin büdcəsinə cəmi 78 milyon manat vəsait daxil olması nəzərdə tutulduğunu nəzərə alsaq, belə kiçik məbləğdən ötrü bu qədər böyük narazılığa nə ehtiyac vardı? Yeni variantda büdcə heç nə itirmir, yəni yeni variantda da büdcə həmin məbləği götürəcək, amma məsələ bundadır ki, Prezidentin təklif etdiyi variant daha ədalətlidir. Çünki qeyd etdiyimiz kimi, bu variantda həm büdcə uduzmur, həm də əhali 78 milyon manat uduşlu olur. Ona görə də yeni variantı daha məqbul və ədalətli hesab edirəm".
Prezidentin qərarına MM-dən də qətiyyətli dəstək gəlib. "Prezident İlham Əliyev, hər zaman olduğu kimi, bu dəfə də Azərbaycan vətəndaşlarını narahat edən, onların sosial vəziyyətlərinə təsir göstərən məsələdə həssaslıq və diqqət göstərdi". Bunu "Trend"ə açıqlamasında Milli Məclis sədrinin müavini Bahar Muradova deyib. Vitse-spikerin fikrincə, Prezidentin bu addımı yanacaq istehlakçılarının çətinliklərini, xüsusilə də onunla əlaqədar sahələrdə ortaya çıxa biləcək müəyyən problemləri aradan qaldırdı: "Hesab edirəm ki, cənab Prezident, hər zaman olduğu kimi, yürütdüyü daxili siyasətdə onun sosial mahiyyətinin, xüsusilə də ümumilikdə yeridilən siyasətin mərkəzi fiquru kimi Azərbaycan insanının və onun rifahının dayanması mövqeyinə bu dəfə də sadiqlik göstərdi. Bu, Azərbaycan Prezidentinin yürütdüyü siyasətin mahiyyəti və məzmunudur ki, hər şey insan üçün, onun rahatlığı, rifahı, daha yaxşı təminatı üçündür. Prezidentin Tarif Şurasının qərarını ləğv etməsi münasibətilə bütün yanacaq istifadəçilərini təbrik edirəm! Hesab edirəm ki, bu qısa müddətdə onların büdcəsinə elə bir ciddi ziyan dəymədi. Lakin bu faktın özü cənab Prezidentin nə qədər xeyirxah, nə qədər humanist, nə qədər Azərbaycan insanının qayğıları ilə yaşayan dövlət başçısı olduğunu bir daha ortaya qoydu. Bütün vətəndaşlar kimi mən də öz adımdan ona təşəkkür edirəm!".

DİGƏR XƏBƏRLƏR

Tarix: 29.10.2026 / 13:45

"Sahibkar olmayan şəxsin kartına hər gün 5 dəfə pul daxil olması normal deyil" - – Mərkəzi Bankın sədri

Tarix: 29.10.2026 / 13:07

“Bank Melli İran” Azərbaycandan gedir? - Mərkəzi Bankdan açıqlama...

Tarix: 29.10.2026 / 11:49

Azərbaycanın strateji valyuta ehtiyatları 89,4 milyard dollara çatdı...

Tarix: 29.10.2026 / 10:43

Mərkəzi Bank illik inflyasiya ilə bağlı proqnozunu açıqladı...

Tarix: 29.10.2026 / 10:04

Mərkəzi Bank uçot dərəcəsini sabit saxladı...

Tarix: 28.10.2026 / 18:30

Tramp "Şimal axını" qaz kəmərini Rusiyadan satın ala bilər...

Tarix: 28.10.2026 / 18:22

İpoteka kreditlərinin verilməsi qaydalarına dəyişiklik edildi

Tarix: 28.10.2026 / 16:15

Ətin qiymətinə görə Ermənistandan da geridəyik - hesabatı kim yayıb?

Tarix: 28.10.2026 / 12:23

Azərbaycanın strateji valyuta ehtiyatları xarici dövlət borcunu 20 dəfə üstələdi...

Tarix: 28.10.2026 / 12:10

Azərbaycanın dövlət borcu açıqlandı

Tarix: 28.10.2026 / 10:11

Azərbaycan nefti ucuzlaşdı - 122 dollar...

Tarix: 27.10.2026 / 18:56

Azərbaycan Rusiya ilə təbii qaz alışı sazişi imzalayacaq...

VİDEO

Tarix: 17.10.2026 / 17:10

Aydın Quliyev Mətbuat Şurasında seçkilərə qatılmamasının səbəblərini qurultayda açdı... - VİDEO

Tarix: 27.11.2025 / 11:10

Biri ermənini öpür, biri sovet bayrağı qaldırır... Günümüzə baxın! - VİDEO

Tarix: 12.11.2025 / 11:05

Lavrov işdən kənarlaşdırılır, yoxsa oyun qurulur? - VİDEO

Tarix: 22.10.2026 / 19:54

Orta Dəhliz Avropa ilə Asiya arasında ən təhlükəsiz marşrut seçildi...

Tarix: 22.10.2026 / 19:30

Azərbaycanda şirin su ilə bağlı vəziyyət pisləşir - ümid Xəzərə qalıb…

Tarix: 22.10.2026 / 16:56

15 temmuz “FETÖ darbesində” bircə nəfər siyasətçi-deputatın adı çıxmadı...

Milli kimliyə bağlı gənclər uğurlu gələcəyin əsas təminatçılarıdır...