Türkiyə istintaqı Mübariz Mənsimovun FETÖ ilə ortaqlığını sübuta yetirir...

Tarix: 19.06.2020 / 08:57
Bölmə: Gündəm

Bir müddət əvvəl, hələ həbs edilmədən öncə Azərbaycan əsilli oliqarx Mübariz Mənsimovun siyasətə meyllənmək cəhdlərindən yazmışdıq. Onun siyasətlə məşğul olmaq istəməsi bizim üçün təəccüblü deyildi. Ancaq maraqlıydı ki, M.Mənsimov, başqa iş adamları kimi, öz hobbisini vətəndaşı olduğu ölkədə deyil, Azərbaycanda həyata keçirməyə çalışırdı. Son zamanlar, xüsusilə də sosial şəbəkələrdə aktivləşən M.Mənsimov Azərbaycan hakimiyyətinə qarşı radikal mövqedə dayanan müxalif liderlərindən heç nəyi ilə fərqlənməyən mövqelər sərgiləməyə başlamıdı. Bu fəaliyyətin yeni başladığı zamanda adamda sual yaranırdı: milyarder kimi qələmə verilən bir adamın sosial şəbəkələrdə vaxt keçirməyə bu qədər zamanı hardandır? Güman edilirdi ki, yəqin onun adından yaradılan saxta profillər bu işlə məşğuldur. Sonra işin arxsından Mənsimovun özü çıxanda, adamda ilk olaraq belə təəssürat yarandı ki, onun işləri heç də yaxşı getmir. Çünki yalnız nəyi var əlindən çıxan biri sosial şəbəkələrdə belə kin-küdurət, qəzəb püskürə bilərdi.

Son ildəki onun virtual fəaliyyətini təhlil etdikdə görünür ki, Mübariz Mənsimov Azərbaycan dövlətinə qarşı hansısa kampaniyaçılığın aparıldığı dönəmdə aktivləşməyə başlayıb. Bizim radikal müxalif dairələr isə ona pullu şikar gözündə baxaraq, hər vasitə ilə özünə cəlb etmək istəyiblər. Mənsimov, əslində bütün Azərbaycan hakimiyyətini hədəf alan açıqlamalarını SOCAR üzərindən edirdi. Hədəf olaraq SOCAR-ı seçir və həmin mövzuda sadə vətəndaşların psixikasına hesablanan populist çıxışları ilə yadda qalırdı. Çox maraqlıdır ki, Mübariz Mənsimovun yaşadığı, fəaliyyət göstərdiyi Türkiyədəki həbsini də məhz SOCAR-la bağlamağa çalışanlar oldu. Xüsusilə də iş adamının son vaxtlar xitab etdiyi radikal kəsim bu istiqamətdə fəallıq etməyə başladı.

Əslində soydaşlarımız olan iş adamlarının qanun çərçivəsindəki fəallığı bizi sevindirməlidir. Çünki həmin adamlar xaricdəki Azərbaycan diasporunun fəxri nümayəndələri sırasında yer alırlar. Ancaq bəzən görürsən ki, əsasən də xarici ölkələrin vətəndaşlığını qəbul edən həmin varlı soydaşlarımızdan öz ölkəmizə qarşı siyasi məqsədlər üçün də istifadə etmək niyyətləri ortaya çıxır. Bunun ən bariz nümunəsini biz 2013-cü il prezident seçkilərində Rusiyada söydaşlarımızın “dəstəyi” ilə ərsəyə gələn “Milyarderlər İttifaqı”nın timsalında gördük. Mübariz Mənsimov nümunəsi isə daha təhlükəlidir. O bir tərəfdən Azərbaycanla bağlı qənaətbəxş olmayan mövqe səriləyirdi, digər tərəfdən isə Türkiyə dövlətinə qarşı olan fəaliyyətilə qismən də olsa iki qardaş ölkənin münasibətlərinə kölgə salmağa çalışırdı. Ortaya çıxan konkret dəlillər bunu deməyə əsas verir. Qeyd edək ki, Mübariz Mənsimov bu ilin mart ayında həbs olunub. Onun həbs edilməsi ölkəmizdə bəzi dairələrin də etirazına səbəb oldu. Hətta Mənsimovun azadlığa çıxması üçün kampaniyalar belə təşkil edildi.

İddia olunurdu ki, güya iş adamının həbsində siyasi motivlər var. Bu səbəbdən, Türkiyənin hüquq sisteminə qarşı ciddi ittihamlar səsləndirilmişdi və Mübariz Mənsimovun siyasi sifarişlə həbs olunduğu qeyd olunurdu. Aydındır ki, hər bir vətəndaş kimi Mübariz Mənsimov da qanun qarşısında cavab verməlidir. Çünki qanun hamı üçündür. Mənsimovun həbs olunmasında, məhkəmə qarşısına çıxarılmasında qeyri-adi nə var? Yüzlərlə belə fakt var ki, milyardlarla dollar pulu olan iş adamları hüquqi məsuliyyətdən yayına bilməyib. Düzdür, onlar əllərindəki maliyyə imkanları və əlaqələrindən istifadə etməklə cinayətlərini ört-bastır etməyə çalışsalar da, fakt öz faktlığında qalır. Gec-tez ittihamlar sübuta yetirilir və cinayətkar cəzasını alır. Əlbəttə ki, Mübariz Mənsimov da öz cinayətlərini ört-basdır etmək üçün bir çox variantlardan istifadə etdi. O, həbsini hər vəchlə siyasiləşdirməyə çalışırdı. Hətta Azərbaycanın daxilində bəzi qrupların maraqlarına xidmət edən paylaşımlar etməklə animilli qüvvələrin mövqelərini gücləndirməyə cəhd göstərirdi. Müxtəlif oyunlar quruldu, sosial şəbəkələrdə “Mənsimovun qəhrəmanlıq səlnaməsi”nə dair kütləvi paylaşımlara rast gəlindi. Hətta ölkə mətbuatını da bu oyunlara alət etməyə hesablanmış gedişlər də az olmadı. Lakin İstanbul Cümhuriyyət Baş Prokurorluğu ortaya təkzibolunmaz dəlillər qoyaraq Mənsimovun FETÖ ilə əlaqələrinə işıq salmış oldu. Yəqin ki, Mənsimov bundan sonra da Türkiyədə və Azərbaycandakı havadarları vasitəsilə həbsini siyasiləşdirmək cəhdlərini davam etdirəcək. Amma nəticə verəcəyi inandırıcı deyil. Çünki cəmiyyət də gördü ki, Mübariz Mənsimovun FETÖ ilə əlaqələri tam şəkildə sübuta yetirilib. Yəni ki, açıq qalan suallar yoxdur. Artıq “Fətullahçı Terror Təşkilatına üzv olmaq” ittihamı ilə həbs olunan azərbaycanlı iş adamı Mübariz Mənsimov barəsində istintaq prosesi başa çatıb. İstanbul Baş Prokurorluğu tərəfindən 3 bölümdən ibarət 26 səhifəlik ittiham verilib. İttiham aktında şübhəlinin FƏTO-ya aidiyyəti tək-tək izah edilib və təşkilatın rəhbərinin əşyalarını muzeydə nümayiş etdirdiyi də qeyd edilib.

İstintaqın nəticəsinə görə, azərbaycanlı iş adamının FETÖ-nun ən yaxşı menecerlərindən olan Akın İpək, Suat İldırım, Süleyman Uysal ilə sıx telefon əlaqəsində olduğu məlum olub. Mənsimovun Təşkilatın Rus imamı Əhməd Hamdi Vural ilə iş yerində görüşdüyü və müəyyən edilib. Onun təşkilatın rəhbəri Fətullah Gülənlə üz-üzə görüşdüyü, hətta şəxsi əşyalarını alıb muzeydə sərgiləməsi, xaricdəki məktəb və dərnəklərin fəaliyyətlərini davam etdirməsi üçün maddi yardım göstərdiyi bildirilib.

İttiham aktında Mənsimovun FETÖ/PDY silahlı terror təşkilatı ilə intensiv təmasının dekabrın 17-dən 25-dək olan dövrdən sonra da davam etdiyi və təşkilatın idarəçiləri ilə sıx təmas və əməkdaşlığın 2016-cı ilə qədər davam etdiyi qeyd edilib. Təşkilatın xarici struktur quruluşuna cavabdeh olan Ahmet Hamdi Vural ilə gizli bir görüş və əlaqənin olduğu, qeydlərin və müsahibələrin aşkarlanmasının qarşısını almaq üçün "Cammer" adlı danışıq cihazlarından istifadə olunduğu qeyd edilib.

Prokurorluq tərəfindən Mübariz Mənsimovun "Silahlıterror qruplaşmasına üzv olmaq" cinayətindən cəzalandırılması istənilib. O, yaxın günlərdə İstanbul Ağır Cəza Məhkəməsində mühakimə olunacaq.

Türkiyənin nüfuzlu media nümunələri Mənsimovun işində adı keçən şahidlərin istintaqa verdikləri ifadələri də ictimailəşdirib. Verilən ifadələrlə tanış olduqda Azərbaycan əsilli iş adamının qardaş ölkədə bu cür fəaliyyətlə məşğul olduğu təəccüb doğurur. M. E. adlı gizli şahid İstanbul Baş Prokurorluğunda verdiyi ifadədə bildirib ki, Mənsimov 15 İyul çevriliş cəhdindən bir neçə həftə əvvəl ofisdə olarkən bir neçə dəfə əlini ürəyinə vurub və "bunların hamısı müvəqqətidir, Xoca Əfəndi gələcək” deyib. "Yəni bunu ürəkdən istəyirmiş kimi danışdı. Bu sözləri o, ofisdə bir vəkillə söhbət edərkən söylədi. Qısa müddətdən sonra çevriliş cəhdinin olduğunu biləndə Mənsimovun əvvəlcədən nələrisə bildiyini düşünərək şirkətdən ayrıldım”.

İfadə verən digər bir şahid A.Ç. isə 2014-cü ilin sonu, 2015-ci ilin əvvəlində şirkətin demək olar ki, bütün rəhbər əməkdaşlarının Rusiyanın Rostov şəhərindəki "Palmali” şirkətinə baş çəkərkən yaşananları prokurorluqla paylaşıb: "Şam yeməyi üçün bir restorana gedildi. Yemək əsnasında Mənsimov FETÖ rəhbərinə işarə ilə "Xoca Əfəndi gələcək ” deyərək o zaman baş nazir olan Rəcəb Tayyib Ərdoğanla bağlı açıqlama verdi.

A.Ç. həmçinin bildirib ki, Mənsimov hazırda ölkədən qaçan FETÖ idarəçilərindən olan İhsan Kalkavanla birlikdə FETÖ rəhbərini ziyarət edib və orada Mənsimova Gülənin pijama və araqçını hədiyyə olaraq təqdim edilib. Şahid qeyd edib ki, bu hədiyyələr daha sonra Mənsimovun şirkətinin girişindəki Dəniz Muzeyində sərgilənib. Prokurorluq bu ifadələr əsasında müəyyən edib ki, təşkilat rəhbəri bəzi üzvlərin təşkilatdakı mövqeyini yüksəltmək məqsədilə onlara öz şəxsi əşyalarını hədiyyə verir. Mənsimov da bu baxımdan təşkilatın yüksək mövqe tutan üzvlərdən biri kimi qiymətləndirilir.

Təbii ki, Mübariz Mənsimovla bağlı son sözü Türkiyə məhkəməsi deyəcək. Ancaq ortada olduqca ciddi dəlillər var və bu sübutlar Azərbaycan əsilli iş adamının terror qruplaşması kimi qəbul olunan bir təşkilatla əlaqələrinin ən üst səviyyədə olmasına şübhə yeri qoymur.

Məhəmmədəli QƏRİBLİ