ABŞ-ın Mərkəzi Kəşfiyyat Agentliyi (CIA) səudiyyəli jurnalist Camal Kaşıqçının İstanbulda öldürülməsinə Səudiyyə Ərəbistanı vəliəhd şahzadəsi Məhəmməd bin Salmanın göstəriş verdiyinə dair nəticəyə gəlib. Baki-xeber.com xarici mediaya istinadən xəbər verir ki, bu barədə “Washington Post” qəzeti məlumat yayıb.
Qəzet mənbələrə istinadən CİA-nın Kaşıqçının öldürülməsi əmrini şahzadə Salmanın verdiyi qənaətinə gəldiyini yazıb. CIA-nın qiymətləndirmələrinə görə, bu, bu günə qədər Salmanın qətllə əlaqəsinə dair ən dəqiq məlumatdır.
Qəzet bildirib ki, ABŞ rəsmilər CIA-in bu qiymətləndirməsinə etimad edir və bu, prezident Donald Trampın ABŞ-ın regiondakı ən yaxın müttəfiqlərindən biri olan Səudiyyə Ərəbistanı ilə əlaqələrini qoruyub saxlamaq səylərini çətinləşdirəcək.
“Washington Post” məsələ ilə yaxından əlaqəsi olan insanlara istinadən bildirib ki, CIA bir sıra kəşfiyyat mənbələrini nəzərdən keçirəndən sonra bu nəticəyə gəlib. Buna şahzadənin qardaşı, Səudiyyənin ABŞ-dakı səfiri Xalid bin Salmanın Kaşıqçı ilə telefon danışığı da daxildir. ABŞ kəşfiyyatının əldə etdiyi telefon danışığına görə, səfir Kaşıqçıya sənədlərini almaq üçün Səudiyyənin İstanbuldakı konsulluğuna getməli olduğunu söyləyib və onu bunun təhlükəsiz olduğuna inandırıb.
Telefon zəngindən xəbərdar olan şəxslər, Xalidin Kaşıqçı öldürüləcəyini bilib-bilmədiyindən əmin deyil, ancaq onun Kaşıqçıya qardaşının göstərişi ilə zəng etdiyini bildirirlər.
Səudiyyənin ABŞ-dakı səfirliyinin sözçüsü isə Xalidin Kaşıqçı ilə telefon danışığının olmadığını, CİA-nın əldə etdiyi məlumatların da “yalan” olduğunu deyib. Səfir Xalid bin Salman da Twitter hesabında bildirib ki, o, son dəfə Kaşıqçı ilə onun ölümündən təxminən bir il öncə, 2017-ci ilin oktyabrın 26-da mesajla əlaqə saxlayıb: "Mən heç vaxt onunla telefonla danışmamışam və hər hansı səbəbdən Türkiyəyə getməsini təklif etməmişəm. Mən ABŞ hökumətini bu iddia ilə bağlı bütün məlumatları açıqlamağa çağırıram".
Bundan əvvəl şahzadə Məhəmməd bin Salmanın statusunu nəzərə alan ABŞ yetkililəri onun bu cinayətdən xəbərsiz olması barədə açıqlamalara şübhə ilə yanaşdıqlarını bildirirdilər.
Iddialara görə, şahzadəsi bin Salmanın işin içində olduğuna dair dəlillər ABŞ prezidenti Donald Trampa da göstərilib, ancaq Tramp buna şübhə ilə yanaşıb. Iddia edilir ki, CİA Salmanın cinayətdəki rolu ilə bağlı araşdırmalarda xarici ölkələrin əlindəki məlumatlardan da istifadə edib.
Bu arada, “Associated Press” (AP) agentliyi “Washington Post”un iddialarını təsdiqləyərək, ABD rəsmilərindən birinə istinadən, ABŞ kəşfiyyatının jurnalisti Camal Kaşıqçının öldürülməsi əmrini şahzadə Məhəmməd bin Salmanın verdiyinə dair nəticəyə gəldiyini bildirib.
“Reuters” isə bu məlumatın doğruluğunu təsdiqləyə bilməsə də, ABŞ kəşfiyyatının dəyərləndirmələrinə bələd olan mənbə “Reuters”a bildirib ki, ABŞ hökumətinin ekspertləri əminliklə Kaşıqçının qətli ilə nəticələnən əməliyyata vəliəhdin göstəriş verdiyinə dair nəticəyə gəlib.
Ağ Ev “Washington Post”un xəbərini şərh etməkdən imtina edib və bunun kəşfiyyat məsələsi olduğunu bildirib. Dövlət Departamenti də məsələ ilə bağlı şərh verməyib.
“Washington Post” qəzetinin köşə yazarı olan Kaşıqçı oktyabrın 2-də türkiyəli qadınla evlənməsi üçün tələb olunan səndələri almaq məqsədilə Səudiyyənin İstanbuldakı konsulluğuna daxil olandan sonra öldürülüb.
Səudiyyə hökumətini tənqid edən Kaşıqçı Ər-Riyadın onun geri dönməsinə dair təzyiqlərinə müqavimət göstərib. Səudiyyə rəsmiləri bildirib ki, 15 səudiyyəli Kaşıqçını geri gətirmək üçün konsulluğa göndərilib, amma daha sonra onlar qarşıdurma yaşayıb və nəticədə Kaşıqçı boğularaq öldürülüb.
Türkiyə rəsmiləri qətlin qabaqcadan planlaşdırıldığını bildirib və Kaşıqçının ölümünə görə cavabdeh olanları məsuliyyətə cəlb etməsi üçün Səudiyyə Ərəbistanına təzyiq göstərib. Türkiyə prezidenti Rəcəb Tayyib Ərdoğanın müşaviri Səudiyyə Ərəbistanını qətli ört-basdır etməyə çalışmaqda ittiham edib.
Onun sözləri Səudiyyə Ərəbistanının baş prokuroru Kaşıqçının ölümündə şübhəli bilinən beş şəxsin edam olunmasını tələb etdiyini deməsidnən sonraya təsadüf edib. Prokuror Şalaan Əl-Şalan müxbirlərə bildirib ki, Səudiyyə vəliəhdi Kaşıqçının öldürülərək, cəsədinin hissələrə bölünüb, konsulluqdan çıxarıldığı əməliyyatdan xəbərdar olmayıb.
