Səudiyyə Ərəbistanının Baş Prokurorluğu bütün dünyada əks-səda doğurmuş jurnalist Camal Kaşıqçı cinayətilə bağlı açıqlama yayıb. Baki-xeber.com Türkiyə mediasına istinadən xəbər verir ki, Səudiyyə prokurorluğu Camal Kaşıqçı cinayətilə bağlı 11 şübhəlidən 5-nə edam cəzası istəyib.
C.Kaşıqçının ölüm səbəbinin boğuşma və öldürücü dozada dərman verilməsi olduğu açıqlanıb. Kaşıqçı əvvəlcə boğulub, sonra isə bədəni hissələrə ayrılaraq konsulluq binasından çıxarılıb.
Prokurorluğun açıqlamasına görə, Səudiyyə vəliəhdi şahzadəsi Məhəmməd ibn Salmanın müşaviri Kahtaniyə Kaşıqçını ölkəyə gətirmək əmri verilib.ancaq onu ölkəyə gətirmək mümkün olmadığından öldürülüb. Ölüm əmrini isə İstanbula göndərilən sui-qəsd timinin rəhbəri verib.
Kahtani haqqında da cinayət işi açılıb və onun ölkədən çıxarılması qadağan olunub. Kaşıqçının cəsədini parçalayan 5 nəfərə isə edam tələb olunur.
Prokurorluq Kaşıqçının cəsədini təslim alan sui-qəsd timi ilə işbirliyində olan yerli şəxsin görüntülərini də əldə etdiklərini deyib. Onlara görə, Kaşıqçının cəsədi konsulluqdan kənar bir yedə basdırılıb.
Prokurorluq Kaşıqçını öldürənlərdən birinin konsulluqdakı kamera görüntülərini sildiyini açıqlayıb.
Səudiyyə prokurorluğu Kaşıqçının öldürülməsi üçün sui-qəsd timinin qurulması əmrinin də kəşfiyyatın keçmiş rəhbər müavininin verdiyini bildirib.
Bundan başqa Səudiyyə prokurorluğu Türkiyədən də dəlilləri və səs yazılarını istəyib.
Türkiyə isə Səudiyyə Ərəbistanı Baş Prokurorluğunun Camal Kaşıqçı cinayətilə əlaqəli açıqlamalarının qaneedici olmadığını bildirib. Xarici İşlər naziri Mövlud Çavuşoğlu açıqlamalara baxmayaraq yenə də cavabsız sualların qaldığını deyib.
“Kaşıqçının cəsədi haradadır? Təlimat verənlərin, bu işə onları cəlb edənlərin ortaya çıxması lazımdır, bu proses belə başa çatdırılmamalıdır. Prosesi izləyəcəyik. 11 nəfər yaxalandığını başa düşürük. Daha əvvəl 18 nəfər tutulmuşdu. 11 nəfərdən beşinin edamı istənir. Digərləri nə üçün azadlığa buraxıldı? Bu şəxsin ölkəsinə geri aparılması qarşısında müqavimət göstərdiyi üçün öldürüldüyü söylənir, halbuki bu əvvəlcədən planlaşdırılıb. Meyitin parçalanması bir anlıq bir iş deyil. Əvvəldən öldürülüb parçalanması üçün lazım olan materiallar konsulluğa gətirilib” - deyə Çavuşoğlu qeyd edib.
Qeyd edək ki, rəsmi Ankara əlindəki səs yazıları və sübutlara söykənərək dəfələrlə bəyan edib ki, Kaşıqçının qətlinin sifarişçiləri Səudiyyə Ərəbistanı hakimiyyətində təmsil olunanlardır. ABŞ və Böyük Britaniya kəşfiyyatı isə jurnalistin qətlində Səudiyyənin vəliəhd şahzadəsi Məhəmməd bin Salmanın birbaşa əli və marağı olduğunu üzə çıxarıb.
Camal Kaşıqçının oktyabrın 2-də evlilik üçün sənədləşdirmə işləri üçün getdiyi Səudiyyə Ərəbistanının İstanbul Baş Konsulluğunda qətlə yetirilib.
