ABŞ-da ara seçkilərdən sonra prezident Donald Trampın ilk qərarı miqrantlarla bağlı olub. ABŞ prezidenti ölkəyə qeyri-qanuni yollarla daxil olan miqrantlara sığınacaq verilməsinin qarşısını alacaq bəyannaməni imzalayıb.
Baki-xeber.com xarici mediaya istinadən xəbər verir ki, Tramp miqrantlara sığınacağın rədd edilməsinə icazə vermək üçün qeyri-adi milli təhlükəsizlik səlahiyyətindən istifadə edib.
ABŞ-dakı mövcud qanunlara görə, zorakılıqlardan qaçan miqrantların sığınacaq üçün müracətləri qəbul edilir.
Tramp Ali Məhkəmənin qüvvədə saxladığı səyahət qadağasını da həyata keçirmək üçün eyni səlahiyyətdən istifadə etmişdi. Bəyannamə miqrantların ölkəyə hansı yolla daxil olmalarından asılıq olmayaraq sığınacaq üçün müracət etməyə haqlarının olduğunu bəyan edən qanundan yan keçmək üçün qəbul edilən nizamnamələri həyata keçirir. “Bizim ölkədə insanlara ehtiyacımız var, amma onlar qanuni yolla gəlməlidir və hər hansı kvalifikasiyaları olmalıdır”- deyə, Tramp bildirib.
Administrasiya rəsmiləri deyir ki, bu tədbirlər azı üç ay qüvvədə qalacaq, amma uzadıla da bilər. Onlar şənbə günü qüvvəyə minəcək və artıq ölkədə olan insanlara şamil olunmur.
Milli Təhlükəsizlik və Ədliyyə nazirliklərinin daha öncəki müvəqqəti yekun qərarında deyilirdi ki, prezidentin sığınacaq üçün uyğun insanları məhdudlaşdırmaq səlahiyyəti var və o bunu rəsmi bəyanatla edə bilər.
Amerika Vətəndaş Azadlıqları Birliyinin Texas üzrə siyasi müşaviri Şau Dreyk “Amerikanın Səsi”nə bildirib ki, o bu addımı Meksika vasitəsilə ABŞ sərhədinə istiqamət alan mühacirlərdən ibarət karvanın qarşısını almaq cəhdi olaraq görür. Karvan məsələsi uzun müddətdir prezident Donald Trampın diqqət mərkəzindədir. Prezident karvanın ABŞ sərhədlərinə gəlməsini "işğal" və "fövqəladə vəziyyət" adlandırıb. O, seçkilərdən öncə dəfələrlə karvan və onun yaradacağı təhlükədən bəhs edib.
