Səudiyyə Ərəbistanı kralı Salman səudiyyəli jurnalist Camal Kaşıqçının qətlində adı hallanan şahzadə Məhəmməd bin Salmanı vəzifədən uzaqlaşdırmağa hazırlaşır.
Baki-xeber.com Türkiyə mediasına istinadən xəbər verir ki, bunu İngiltərənin Səudiyyə Ərəbistanı və Yəməndəki hərbi attaşesi polkovnik Brian Lis deyib.
Onun iddiasına görə, Səudiyyə kralı, Kaşıqçı cinayətinə görə, ölkənin zədələnmiş nüfuzunu bərpa etmək üçün vəliəhd şahzadə Salmanı vəzifədən kənarlaşdıracaq.
Lis, səudiyyəlilərin şahzadənin Kaşıqçı cinayətindən xəbərsiz olduğunu söyləməsinə baxmayaraq, kral Salmanın xaricdən ciddi təzyiqlərlə üz-üzə qaldığını deyib. O, kralın bir müddətdən sonra şahzadəni postundan uzaqlaşdıracağına inandığını söyləyib.
Bu arada, Türkiyə polisi İstanbuldakı Səudiyyə Konsulluğunda qətlə yetirilən jurnalist Camal Kaşıqçının cəsədinin axtarışları davam etdirir. Dünən konsulluq bağçasındakı quyuda axtarış aparılmasına icazə verən Səudiyyə bu gün türk polisinə quyudan yalnış su nümunəsi götürməyə icazə verib. Iddialara görə, səudiyyəlilər quyuya baxılmasına və quyunun suyunun çəkilməsinə qarşı çıxıblar.
Digər tərəfdan, Səudiyyə Ərəbistanı səudiyyəli jurnalist Camal Kaşıqçının Riyadın İstanbuldakı konsulluğunda qətli ilə bağlı açıqlamasını yenidən dəyişib və indi Türkiyədən aldığı məlumata əsasən, qətlin öncədən planlaşdırıldığını qənaətinə gəlib. Bununla bağlı bəyanatı Səudiyyə Ərəbistanının baş prokuroru yayıb. Lakin bu açıqlamadakı naməlum hissə qətli kimin planlaşdırdığıdır. Bəyanatda deyilir ki, baş prokurorluq ədaləti bərqərar etmək üçün şübhəlilərlə bağlı istintaqını davam etdirir. Səudiyyəlilər qətlin öncədən planlaşdırıldığını etiraf etsə də, Türkiyə xarici işlər naziri Mövlud Çavuşoğlu deyib ki, hələ də cavablandırılmalı olan suallar qalır. Buna səudiyyəlilərin nə üçün 18 şübhəlini həbs etdikləri daxildir: “Onlara kim göstəriş verib. Siz onların bunu etdiyini etiraf edirsiniz, amma nə üçün onlar cəsədin harada olduğunu söyləmir? Onun ailəsi bunu bilmək və onu son mənzilə yola salmaq istəyir”.
Nazir həmçinin prezident Rəcəb Tayyib Ərdoğanın həbs olunanların İstanbulda məhkəmə çıxarılmaları ilə bağlı tələbini yenidən səsləndirib.
Qeyd edək ki, səudiyyəlilər qətllə əlaqəsi olan beş rəsmini vəzifələrindən azad edib, 18 şübhəlini isə həbs edib.
ABŞ prezidenti Donald Tramp daxil olmaqla, beynəlxalq tənqidçilər deyib ki, Kaşıqçının qətlinə görə, ölkənin de-fakto lideri vəliəhd Məhəmməd bin Salman məsuliyyət daşıyır.
Türkiyənin hökumət tərəfdarı mediası və The Washington Post-un verdiyi məlumata görə, Kaşıqçının qətlini təhqiq etmək üçün Türkiyəyə səfər edən ABŞ Mərkəzi Kəşfiyyat Agentliyinin direktoru Gina Haspelin Kaşıqçının işgəncəsi və öldürülməsini qeydə alan səsyazmanı dinlədiyi bildirilir.
Kaşıqçı ilk gündən yoxa çıxdığı vaxt Səudiyyə rəsmiləri onun üç həftə öncə konsulluğu tərk etdiyini və onun harda olduğuna dair məlumatlarının olmadığını söyləmişdilər. Daha sonra onlar Kaşıqçının konsulluqda əlbəyaxa döyüş nəticəsində öldüyünü etiraf etdilər. Bu yaxınlarda isə səudiyyəlilər onun konsulluğu tərk etməyə çalışarkən boğularaq öldürüldüyünü söyləyiblər.
