Səudiyyə Ərəbistanının XİN rəhbəri Adel əl-Cübeyri jurnalist Camal Kaşıkçının qətl olayını şərh edərkən deyib ki, bu olayı törədənlər səlahiyyət həddini aşıb, yanlış iş görüb və bunu ört-basdır etməyə cəhd edib.
Baki-xeber.com bu barədə RİA”Novosti”yə istinadən xəbər verir.
Xatırladaq ki, daha öncə sözügedən ölkənin baş prokuroru Saud əl-Muacib Kaşıkçının İstanbul səfirliyində çıxan dava nəticəsində həyatını itirdiyini açıqlayıb və onun ölüm faktının araşdırılmasını siyasiləşdirməməyə çağırıb. Onun sözlərinə görə, iş üzrə 18 nəfər Krallıq nümayəndəsi saxlanıb və varis şahzadənin əsas köməkçiləri – ümumi kəşfiyyat xidməti başçısının müavini Əhməd Əsiri və Krallıq Dəftərxanasının məsləhətçisi Saud əl-Kaxtani vəzifədən çıxarılıb.
“Fox News” telekanalına açıqlamasında o, baş verənləri yanlış və cinayət adlandıraraq deyib ki, məsuliyyət daşıyanlar cəzalarını alacaq. “Bu nəzarətdən çıxmış əməliyyatdır və bu əməliyyatda ayrı-ayrı şəxslər onlara verilən səlahiyyət həddini aşaraq Kaşıkçını konsulluqda qətlə yetiriblər. Sonradan isə bu əməli ört-basdır eləməyə səy göstəriblər”- Saud əl-Muacib deyib.
Səudiyyə XİN başçısı bildirib ki, konsulluqda baş verənlərin təfərrüatlarını bilmir və Kaşıkçının meyitinin harda olduğundan da xəbərsizdir. Saud əl-Muacib onu da əlavə edib ki, Ər-Riyadda Türkiyə tərəfinin qətlin səs yazıları barədə iddialarından xəbərsizdirlər.
Telekanala açıqlamasında medianı spekulyasiyalardan uzaq durmağa çağıran Saud əl-Muacib Səudiyyə Ərəbistanı və Türkiyənin olayla bağlı təhqiqatının nəticələrini gözləməyi tövsiyə edib.
Səudiyyənin XİN rəhbəri ABŞ Konqresinin Səudiyyə Ərəbistanına sanksiyaların tətbiqini təklif edən üzvlərinə də çağırış edib, onları öncə faktları gözləməyə, daha sonra nəticələr əsasında mövqe tutmağa çağırıb. Özəlliklə qətli törətmək üçün İstanbul konsulluğuna 15 nəfərlik dəstənin gəlməsi versiyasına münasibət bildirən Saud əl-Muacib həmin versiyanı qəbul etmədiyini deyib, bildirib ki, bu komandanın hər bir üzvünü diqqətlə araşdırır, onların harda toplaşdığını, hara yerləşdirildiyini öyrənirlər və bununla konsulluqda əslində nə baş verdiyini aydınlaşdırmağa çalışırlar.
Xatırladaq ki, “Washington Post” qəzetinin müxbiri Camal Kaşıkçı 2017-ci ildən ABŞ-da yaşayıb və bu il oktyabrın 2-də Səudiyyə Ərəbistanının İstanbuldakı Baş konsulluğuna getdikdən sonra yoxa çıxıb. İlk günlərdə Səudiyyə hökuməti onun Konsulluq binasını tərk etdikdən sonra yoxa çıxdığında israr edib. Lakin Türkiyə prezidenti Rəcəb Tayyib Ərdoğanın Səudiyyə dövlətindən jurnalistin yoxa çıxması olayı ilə bağlılığı olmadığını sübut etməsini istəməsi məsələnin üzərinə gedilməsinə və bir çox mətləblərin üzə çıxmasına səbəb olub.
