Səudiyyə Ərəbistanı hökuməti Vaşinqton Post qəzetinin jurnalisti Camal Kaşıqçının ölkənin İstanbuldakı Baş konsulluğunda öldürüldüyünü və iki yüksək rütbəli rəsminin vəzifəsindən azad edildiyini təsdiq edib. Baki-xeber.com xəbər verir ki, bu barədə ölkənin baş prokuroru bəyanat yayıb.
Hakimiyyət orqanları iddia edir ki, Kaşıqçı ilə konsulluq binasında onu qarşılayan şəxslər arasında dava düşüb və onun ölümü ilə nəticələnib.
“Səudiyyə Ərəbistanınından bir şübhəli Camal Kaşıkçı ilə görüşmək üçün İstanbula getdiyi müəyyənləşdirilib. Araşdırmalara görə, Kaşıqçı konsulluqda olduğu vaxt onunla şübhəli şəxslər arasında görüş istənilən istiqamətdə getməyib. Kaşıqçı ilə şübhəlilər arasında mübahisə davaya çevrilib və Kaşıqçı orada ölüb” - Səudiyyənin rəsmi açıqlamasında deyilir.
Səudiyyə Ərəbistanı kralı Salman ibn Əbdül Əziz əs-Səud ölkənin Ümumi Kəşfiyyat Xidməti rəhbərinin müavini general Əhməd Əsirini vəzifəsindən azad edib. O, kral sarayının müşaviri statusundan da azad olunub. Bundan başqa, vəliəhd şahzadənin müşaviri Səud ibn Abdulla əl-Kaxtani də vəzifəsindən kənarlaşdırılıb.
Həmçinin bildirilir ki, Qaşıqçının qətlə yetirilməsi ilə bağlı Səudiyyə Ərəbistanının 18 təbəəsi saxlanılıb. Jurnalistin ölümü ilə bağlı araşdırma davam edir.
Səudiyyəlilər Kaşıqçı yoxa çıxandan bəri ilk dəfədir ki, onun öldüyünü təsdiq edirlər. Amma onun hansı formada öldürüldüyü və həmin şəxslərin kim və neçə nəfər olduqları barədə suala aydınlıq gətirilmir. Digər tərəfdən onun cəsədinin harada olması sualı da açıq qalır. Səudiyyənın rəsmi açıqlamasında buna da aydınlıq gətirilmir. Digər tərəfdən, rəsmi açıqlamada Kaşıqçının cəsdindən bəhs edilməməsi onun meyitinin parçalanması ehtimalını da gücləndirir.
“Reuters” agentliyinə açıqlama verən bir Səudiyyə rəsmisi də Kaşıkçının cəsədi barədə heç nə bilmədiklərini deyib. Agentlik səudiyyəlilərə istinad edərək, Kaşıkçının cəsədinin şübhəlilərlə iş birliyi içində olan başqa şəxslərə təslim edildiyini iddia edib.
Türkiyə rəsmiləri onun binada ikən öldüyünü əvvəlcədən söyləyirdilər. Türklər onlarda Kaşıqçının öldüyünə dair video və audio dəlillərin olduğunu beynəlxalq mediaya bildirmişdilər. Lakin daha öncə Səudiyyə Ərəbistanı ittihamları rədd etmiş, Kaşıqçının konsulluğu tərk etdiyini söyləmişdilər.
Rəsmi açıqlamalara baxmayaraq, Kaşıqçının öldürülməsinin birbaşa şahzadə Məhəmməd bin Salmanın göstərişi olması fikri ortadan qalxmış deyil.
Səudiyyə Ərəbistanının etirafından qısa bir müddət sonra, vəliəhd şahzadənin müşaviri vəzifəsindən kənarlaşdırılan əl-Kaxtani Twitter-də kral və şahzadəyə təşəkkür edib. “Washington Post” isə onun işdən çıxarılmazdan əvvəl yazdığı tweetləri səhifəsinə daşıyaraq qətlin arxasında birbaşa kral ailəsinin dayandığına işarə edir. Kaxtani tweetlərində yazır: “Əmr və ya yönləndirmə olmadan öz başıma hərəkət edəcəyimi düşünürsüz? Mən bir işçiyəm, kral və şahzadənin əmrlərinin icraçısıyam".
Ümumiyyətlə Səudiyyə Ərəbistanı Kaşıqçının ölümü ilə bağlı bəyanatını təsdiq etmək üçün heç bir dəlil irəli sürməyib. Bu bəyanatın qətlin açılmasında maraqlı olan ölkələri və beynəlxalq təşkilatları qane edib-etməyəcəyi də bəlli deyil.
Qeyd edək ki, Səudiyyə şahzadəsi Məhəmməd bin Salmanın tənqidçisi oktyabrın 2-də evlənməsi üçün tələb olunan sənədləri almaq üçün nişanlısı Hatice Cengizlə konsulluğa getmişdi. Lakin sonradan konsulluq binasını tərk etməyb.
