Jurnalist Camal Kaşıkçının itkin düşməsi ilə bağlı Ər-Riyada təzyiqlərin artması səbəbindən kral ailəsi Səudiyyə Ərəbistanının vəliəhd şahzadəsi Məhəmməd bin Salman Əl Səud üçün varis axtarmağa başlayıb.
Baki-xeber.com xəbər verir ki, AZƏRTAC bu barədə TASS informasiya agentliyinə istinadla məlumat yayıb
Bildirilir ki, kral ailəsinin 7 əsas tayfasının nümayəndələrini birləşdirən “ağsaqqallar şurası” artıq bir neçə gündür bağlı qapılar arxasında bu məsələ ilə bağlı müzakirələr aparır. Bir çox ekspertlərin fikrincə, şura vəliəhd şahzadəyə müavin təyin edə bilər. Bu vəzifə 2017-ci ilin iyununda, Məhəmməd bin Salman Əl Səud taxt-tacın rəsmi varisi olduqdan sonra ləğv edilmişdi. “Le Figaro” qəzeti yazır ki, bu posta vəliəhd şahzadənin kiçik qardaşı, ötən həftə səfir işlədiyi ABŞ-dan vətəninə qayıdan 30 yaşlı Xalid bin Salman təyin oluna bilər. Əgər Xalid bin Salman müavin təyin edilərsə, bu o deməkdir ki, Məhəmməd bin Salman dərhal olmasa da, getməyə yaxındır. Bu həm də o deməkdir ki, Salmanlar qanadı hakimiyyəti əlində saxlayacaq.
Kaşıkçı işinə gəlincə, CNN telekanalının bu ərəfədə yaydığı məlumata görə, Səudiyyə Ərəbistanının hakimiyyət orqanları səudiyyəli jurnalistin dindirilmə zamanı öldüyünü etiraf etməyə hazırlaşır.
Bu arada jurnalist Camal Kaşıkçının Səudiyyə Ərəbistanının İstanbuldakı baş konsulluğunda qətlə yetirilməsində şübhəli bilinən şəxslərdən biri Ər-Riyadda müəmmalı yol-nəqliyyat hadisəsi nəticəsində həlak olub.
“Yeni Şafak” qəzeti xəbər verir ki, Səudiyyə Ərəbistanının Hərbi Hava Qüvvələrinin leytenantı olan sözügedən şübhəli Meşal Saad Əl Bostani oktyabrın 2-də Krallığın 14 vətəndaşı ilə birgə Türkiyəyə gəlib. Həmin qrup jurnalistin öldürülməsində şübhəli bilinir. Hələlik qəzanın baş verdiyi yer və zaman barədə məlumat verilmir.
Xatırladaq ki, Camal Kaşıkçı oktyabrın 2-də sənədləşmə işi ilə bağlı Səudiyyə Ərəbistanının İstanbuldakı baş konsulluğuna daxil olub və həmin vaxtdan itkin düşüb. Onun yoxa çıxması ilə əlaqədar təhqiqat aparılması üçün yaradılan Türkiyə-Səudiyyə Ərəbistanı işçi qrupu Krallığın İstanbuldakı baş konsulluğuna baxış keçirib və konsulun iqamətgahında axtarış aparıb. Təhqiqatın nəticələri hələlik açıqlanmır.
Bəzi KİV-lərin yaydığı məlumata əsasən, jurnalist diplomatik missiyanın binasında qətlə yetirilib. Bununla bağlı Türkiyə tərəfində səs və video yazılar olduğu iddia edilir.
