ABŞ prezidenti Donald Tramp xəbərdarlıq edib ki, jurnalist Camal Kaşıqçının Səudiyyə Ərəbistanının İstanbuldakı konsulluğunda öldürüldüyü sübuta yetirilsə, Səudiyyə Ərəbistanına qarşı “ağır cəza” tətbiq ediləcək.
Baki-xeber.com xəbər verir ki, Tramp bu barədə CBS televiziya kanalının “60 Minutes” verilişinə müsahibəsində deyib.
ABŞ prezidenti bildirib ki, “biz bunun dərinliyinə qədər gedəcəyik və ağır cəza olacaq”.
Prezident hazırda qətlin arxasında Səudiyyə Ərəbistanı şahzadəsi, vəliəhd Məhəmməd bin Salmanın dayanıb-dayanmadığını heç kimin bilmədiyini, lakin bunu çox güman ki, müəyyən ediləcəyini deyib. Tramp əlavə edib ki, “bu sübuta yetirilsə, ABŞ çox məyus və qəzəbli olacaq”.
ABŞ prezidenti məsələ ilə bağlı Səudiyyə rəsmiləri ilə təmasda olduqlarını da deyib.
Səudiyyə Ərəbistanı ilə biznes əlaqələrinin mövcud olduğunu dəfələrlə qürurla bildirmiş Tramp, müsahibə zamanı həm də bildirib ki, ABŞ silahlarının Səudiyyə Ərəbistanına satışının dayandırılması müzakirə mövzusu deyil. ABŞ prezidenti bunu, ölkədəki iş yerlərinə zərbə vurmamaq istəməsilə əsaslandırıb.
