ABŞ müdafiə naziri Rusiyanın “Orta və kiçik mənzilli raketlərin ləğvi haqqında” konversiyanı pozduğunu iddia edərək Moskvanı hədələyib.
Baki-xeber.com xarici mediaya istinadən xəbər verir ki, bu barədə açıqlama verən müdafiə naziri Ceyms Mattis Rusiyanın “Orta və kiçik mənzilli raketlərin ləğvi haqqında” konversiyanı pozmasının qəbuledilməz olduğunu deyib.
"Rusiya “Orta və kiçik mənzilli raketlərin ləğvi haqqında” konversiyaya riayət etməlidir, əks halda Amerika Birləşmiş Ştatları buna cavab verəcək. Rusiya bu razılaşmaya riayət etmir və ancaq buna əməl etməsinin vaxtı gəlib çatıb" - deyə Mattis bildirib.
Bundan əvvəl NATO baş katibi Jens Stoltenberq də “Orta və kiçik mənzilli raketlərin ləğvi haqqında” konversiyanı pozumasını narahatlıqla qarşıladıqlarını deyib və Moskvadan anlaşmaya şəffaf bir şəkildə əməl etməyi tələb edib.
ABŞ müdafiə naziri Mattis Niderlanddakı Kimyəvi Silahların Qadağan edilməsi Təşkilatına (KSQT) kiberhücumla bağlı da açıqlama verib. O, Rusiyanın KSQT-yə kiberhücum cəhdinə görə məsuliyyət daşımalı olduğunu deyib. Onun sözlərinə görə, hücum cəhdi Rusiyanın beynəlxalq normalara hörmət etməməsinin göstəricisidir. Müdafiə naziri əlavə edib ki, baş verənlərə cəlb olunan ölkələr Moskvaya qarşı müxtəlif tədbirlər görmək hüququna malikdir.
Qeyd edək ki, Niderland bu ilin aprel ayında Kimyəvi Silahların Qadağan edilməsi Təşkilatına kiberhücuma cəhd edən dörd rusiyalını ölkədən çıxardıb. Niderland məmurlarının sözlərinə görə, ölkədən çıxarılan Rusiya vətəndaşları xüsusi xidmət orqanlarının əməkdaşlarıdır. Məlumatda vurğulanır ki, onların diplomatik pasportları olub.
"BBC"nin məlumatına görə, ruslar KSQT-nın məlumatlar bazasına daxil olmaq üçün içərisi casus aparatları ilə dolu olan avtomobili təşkilatın binası yaxınlığında saxlayaraq, kəşfiyyat işi aparıb.
Məsələ ilə bağlı Rusiyanın Niderlanddakı müvəqqəti işlər vəkili Niderlandın Xarici İşlər Nazirliyinə çağırılıb.
Rusiya XİN-dən olan mənbə məsələyə münasibət bildirərək qeyd edib ki, heç bir sübutdan söhbət gedə bilməz.
Onun sözlərinə görə, Rusiya təşkilatın bütün strukturlarına üzvdür, onun bütün sənədlərə çıxışı var, ona görə də nəyəsə haker hücumu etməyə ehtiyac yoxdur: "Bu növbəti axmaqlıdır".
