Rusiyanın qadağan edilmiş kruiz raket sistemlərini gizli şəkildə modernləşdirdiyini iddia edən ABŞ Moskvanı hərbi hücumla hədələyib.
Baki-xeber.com xarici mediaya istinadən xəbər verir ki, bu barədə açıqlama verən ABŞ-ın NATO-dakı daimi nümayəndəsi Key Beyli Xatçison Moskvanı bu istiqamətdə fəaliyyətini dayandırmağa çağırıb. O bildirib ki, əks halda ABŞ sözügedən sistemləri hazır vəziyyətə gətirilmədən məhv edəcək.
ABŞ nümayəndəsi qeyd edib ki, bu sistem “Soyuq Müharibə” zamanı Moskva ilə Vaşinqton arasında imzalanan anlaşmaya zidddir.
Vaşinqtonun problemin diplomatik yolla həllinə sadiq olduğunu deyə ABŞ təmsilçisi, Rusiya orta mənzilli raket sistemlərini inkişaf etdirməyə davam edəcəyi halda, hərbi əməliyyata başlamaq variantını nəzərdən keçirməyə hazır olduqlarını bildirib: "Bu vəziyyətdə, hər hansı bir ölkəni vura builəcək rus raketini məhv etmək imkanını nəzərdən keçirə bilərik".
Ölkəsinin 1987-ci ildə ABŞ və SSRİ arasında imzalanmış “Orta və kiçik mənzilli raketlərin ləğvi haqqında” müqaviləni pozmadığını deyən Xatçison Rusiyaya görə, sözügedən anlaşmanı poza biləcəklərini vurğulayıb: "Gələcəkdə elə bir vəziyyət olacaq ki, ABŞ hazırda anlaşmanın izin vermədiyi bir inkişaf mərhələsinə keçməyə qərar verəcək".
Qeyd edək ki, ABŞ Rusiyanın, “Soyuq Müharibə” dövründə imzalanmış “Orta və kiçik mənzilli raketlərin ləğvi haqqında” razılaşmanı pozaraq, Avropa ölkələrinə qısa müddətdə nüvə hücumlarına imkan verəcək bir raket sistemi hazırladığını iddia edir. İddiaları rədd edən Rusiya isə, müqavilənin ABŞ-ın özü tərəfindən pozulduğunu deyir.
