Rusiya hərbi təyyarəsinin vurulmasından sonra Suriyaya S-300 zenit-raket komplekslərinin göndərilməsinə başlayıb. Baki-xeber.com xəbər verir ki, bu barədə Rusiya xarici işlər naziri Sergey Lavrov açıqlama verib.
Lavrov Soçi razılaşması və terror təşkilatı “əl-Nusra” üzvlərinin İdlibdən necə çıxacağı ilə bağlı verilən suala belə cavab verib: "Döyüşçülər və ağır silahlar İdlibdə silahlardan təmizlənmiş bölgədən başqa yerlərə transfer edilir. Türkiyə siyasi prosesdə iştirak edəcək müxalifətçiləri “əl-Nusra”dan ayırma məsuliyyətini üzərinə götürüb. Bu, asan bir iş deyil. Obama rəhbərliyi bizə bir neçə dəfə söz verdi, amma edə bilmədi, hazırki hakimiyyət də edə bilmədi. Türkiyənin mötədil müxalifləri “əl-Nusra”dan ayırmasına ümid edirik".
Rusiya, Türkiyə və İranın Suriya ilə bağlı tamamilə həmfikir olmasalar da, terrorla mübarizə və Suriyanın bütövlüyü məsələsində eyni mövqedə olduqlarını qeyd edən Lavrov Astana əməkdaşlıq formatının son dərəcə faydalı olduğunu bildirib.
Rusiya xarici işlər naziri Suriyada Rus təyyarəsinin vurulmasından sonra bu ölkəyə “S-300” havadan müdafiə sistemi göndərməyə başladıqlarını da deyib.
Bundan başqa, bir neçə gün əvvəl Rusiyanın Suriyadakı Hmeymim hərbi hava bazasına ilk radioelektron mübarizə sistemləri gətirilib. Rusiya KİV yazır ki, iİlk komplekslər sentyabrın 24-də "İl-76" təyyarələri vasitəsilə aviabazaya gətirilib. Radioelektron mübarizə sistemlərinin məqsədi Suriya ərazisində hücum əməliyyatları keçirəcək uçan aparatların idarə və əlaqə sistemlərinin qarşısını almaqdır. Komplekslər Suriya ərazisində, həmçinin bu ölkənin Aralıq dənizi sahillərində bir neçə yüz kilometr məsafədə radioelektron günbəz yaratmağa imkan verəcək.
Rusiyanın Suriyaya “S-300” havadan müdafiə sistemi göndərməsi və Hmeymim hərbi hava bazasına radioelektron mübarizə sistemləri yerləşdirilməsi İsrail qırıcılarının Suriyanı bombaladığı zaman bir rus təyyarəsinin Əsəd rejimi tərəfindən vurulmasından sonraya təsadüf edir
Hələ sentyabrın 24-i Rusiya müdafiə naziri Sergey Şoyqu bildirmişdi ki, onun ölkəsi iki həftə ərzində Suriyaya "S-300" raket əleyhinə kompleksləri təqdim edəcək. "Bu komplekslər 250 kilometrdən artıq məsafədə olan hava hücumu vasitəsini tutmaq və eyni zamanda bir neçə hava hədəfini vurmaq qabiliyyətinə malikdir" – deyə Şoyqu vurğulayıb.
Rusiya müdafiə nazirinin sözlərinə görə, "S-300" Suriya Hava Hücumundan Müdafiə qüvvələrinin imkanlarını artıracaq. Şoyqu xatırladıb ki, Rusiya 2013-cü ildə Dəməşqə "S-300" komplekslərinin çatdırılmasını dayandırsa da, vəziyyət artıq dəyişib və bu, Moskvanın günahı üzündən baş verməyib.
Xatırladaq ki, Suriyanın Hmeymim əyalətində yerləşən Rusiya hərbi bazasının komandanlığı sentyabrın 18-i 00:00 radələrində Hava-Kosmik Qüvvələrinin "İl-20" təyyarəsi ilə əlaqəni itirib. Ekipajla əlaqə Aralıq dənizində, Suriya sahillərindən 35 kilometr aralıda itib.
Rusiya Müdafiə Nazirliyi qeyd edib ki, "İl-20" təyyarəsi İsrailə məxsus 4 ədəd "F-16" qırıcısının Suriyanın Latakiya bölgəsində uçuşlar həyata keçirdiyi zaman yoxa çıxıb.
Rəsmi Moskva hadisənin İsrailin məsuliyyətsiz davranışı və təhlükəli vəziyyət yaratması ucbatından baş verdiyini bəyan edir. İsrail tərəfi isə təyyarənin Suriyaya məxsus raket tərəfindən vurulduğunu iddia edir. Hadisə Moskva ilə Təl-Əviv arasında diplomatik gərginlik yaradıb.
Rusiya həmçinin, İsrailə cavab vermə hüququnu özündə saxladığını bildirmişdi.
Hadisədən dərhal sonra Rusiya prezidenti Vladimir Putinlə İsrail baş naziri Benyamin Netanyahu arasında telefon danışığı olub. Hadisədən bir neçə gün sonra isə İsraildən bir qrup nümayəndə heyəti Moskvaya səfər edib. Danışıqlar zamanı İsrail tərəfinin rus təyyarəsinin vurulması ilə bağlı məlumatları Moskvanı qane etməyib. İsrail nümayəndə heyətinin məsələ ilə bağlı Putinlə görüşmək cəhdi də baş tutmayıb.
