Rusiyanın xarici işlər naziri Sergey Lavrov Türkiyə prezidenti Rəcəb Tayyib Ərdoğan ilə Rusiya prezidenti Vladimir Putin arasında İdlib anlaşması ilə bağlı yeni açıqlama verib.
Sputnik Azərbaycan "Haber3"ə istinadla xəbər verir ki, Lavrov, Rusiya və Türkiyə hərbçilərinin Suriyanın İdlib şəhərində qurulacaq hərbsizləşdirilmiş zonanın sərhədləri ilə bağlı razılığa gəldiklərini açıqlayıb.
Baki-xeber.com xəbər verir ki, Rusiya və Türkiyənin İdlib qərarının əsas addım kimi dəyərləndirən Lavrov hərbsizləşdirilmiş bölgənin Suriya ordusuna və Hmeymim bazasına hücumların da qarşısını alacağını deyib.
Türkiyə, Rusiya və İranın Suriyanın ərazi bütövlüyü məsələsində razılaşdığını və bu məsələdə güzəştə getməyəcəyini dilə gətirən Lavrov, Suriyada ölkənin ərazi bütövlüyünü təhdid edən ünsürlərin olduğunu deyib.
Lavrov Suriyanın ərazi bütövlüyünə qarşı ən böyük təhdidin Fərat çayının şərq hissəsini idarə edən ABŞ-ın olduğuna bildirib.
ABŞ-ın bir çox ölkəyə tətbiq etdiyi sanksiyalara toxunan Lavrov tətbiq edilən son sanksiyaların dollara əsaslanan sistemin tamamilə etibarsız olduğunu bildirib.
Lavrov Rusiyanın dollar sistemindən asılı olmadan addımlar atmağa başladığını söyləyərək Türkiyə və Çin ilə milli pul vahidi ilə ticarət qərarını xatırladıb.
Dollardan imtina edən ölkələrin sayının artdığına diqqət çəkən Lavrov ABŞ-ın haqsız rəqabət apardığını vurğulayıb.
Bu arada “Amerikanın Səsi” yazır ki, Birləşmiş Ştatlar İraq və Suriyada İslam Dövləti qrupunu məğlub etməyə yaxın olduğunu bildirir, lakin rəsmilərin yaxın gələcəkdə ABŞ qoşunlarını bu ölkələrdən geri çəkməyə dair planları yoxdur. Ordu sözçüsü bildirib ki, ABŞ-ın missiyası terrorizm və münaqişənin viran etdiyi ərazilərdə sülhü təmin etməkdir. Bu açıqlama Rusiya və Türkiyə hökümət qüvvələri ilə Suriyanın İdlib vilayətindəki üsyançılar arasında buffer zonası yaratmaqla bağlı razılıq əldə etməsindən sonraya təsadüf edib.
Suriya hökumətinin Rusiyanın dəstəyi ilə yeddi il davam edən müharibədə itirdiyi ərazilərin nəzarətini geri almaq üçün apardığı hərbi kampaniyadan sonra İdlib Suriya müxalifətinin son istehkamı olaraq qalır. Hələb və üsyançıların nəzarət etdiyi digər ərazilərə hücumlar Suriyadakı humanitar böhranı dərinləşdirib.İdlibdə isə daha da pis fəlakətin baş verəcəyi təxmin edilir.
Birləşmiş Millət Təşkilatının Suriya üzrə xüsusi nümayəndəsi sülh zəmanətçiləri olaraq Rusiya ilə Türkiyə arasında əldə olunan razılığı alqışlayıb. “İndi ki, belə bir razılıq var, siyasi prosesi sürətli bir şəkildə irəlilətməmək üçün heç bir səbəb yoxdur” - deyə, Steffan de Mistura bildirib.
Rusiyanın BMT-dəki nümayəndəsi isə onunla razılaşmır. “Steffana demək lazımdır ki, zəmanətçilərə təzyiq göstərmək üçün Təhlükəsizlik Şurasından istifadə etməyə dəyməz. Onlar siyasi proses üçün bu palatadakı hər kəsdən daha çox iş görür. Siz prosesə başçılıq etməli deyil, onu asanlaşdırmalısınız”, - Vasili Nebenzya deyib.
ABŞ nümayəndəsi isə Rusiyanın Suriyadakı müharibəyə dinc həll yolu tapmaqda maraqlı olub-olmadığını sual edib. “Əgər Rusiya Suriyada sülhü bərpa etmək istəyirsə, İran və onun yarı-hərbi qüvvələrinin Suriyanı həmişəlik tərk etmələrini təmin etməlidir. Onların gedişi ilə regionda daha geniş münaqişənin baş vermə risqi də yox olacaq”, Ceyms Ceffri bildirib.
Hər kəsi maraqlandıran sual isə hazırkı razılığın nə qədər davam edəcəyidir. “Bu, edam hökmünün icrasının təxirə salınmasıdır, yoxsa hökmün ləğv olma prosesinin başlanğıcıdır?” - deyə, Mark Loukok sual edib.
Birləşmiş Ştatların Suriyanın şimal-şərqində yerləşən Menbic ərazisində təxminən 2 min qoşunu var. Ordu sözçüsü deyib ki, Birləşmiş Ştatlar orada üç rola sahibdir.
“İŞİD-i məhv etmək, yerli qoşunlara təlim keçmək ki, onlar nəzarəti ələ alsınlar. Bundan sonra isə ümid edirik ki, Cenevrə prosesi başlayar. Mən bilirəm ki, münaqişədəki tərəflər sentyabrın 14-də Cenevrədə görüş keçirib. Mən görüşün detallarını bilmirəm, amma hazırda gördüyümüz iş ona əsaslanır”, - Şon Rayan söyləyib.
ABŞ prezidenti isə ABŞ-ın Suriyadakı rolu il bağlı bunları deyib: “Biz Suriya və regionu İŞİD-dən təmizləmək üçün möhtəşəm işlər görmüşük və həmin işi başa çatdırmağa çox yaxınıq. Daha sonra isə biz ondan sonra nə edəcəyimizə qərar verəcəyik”.
Bu arada isə belə görünür ki, Suriyada yeddi ildir davam edən müharibəyə həll yolu tapmaq çox çətindir.
Baki-xeber.com
