Rusiya prezidenti Vladimir Putin Aralıq dənizində vurulan rus təyyarəsi ilə bağlı açıqlama verib.
Baki-xeber.com xarici mediaya istinadən xəbər verir ki, Putin İsrailin rus təyyarəsini vurmadığını deyib və təyyarənin vurulmasını faciəli olayların zənciri kimi dəyərləndirib.
“Alınacaq tədbirlər hamını maraqlandırır. Tədbirlər Suriyadakı hərbi personalın təhlükəsizliyinə yönəlik olacaq. Onların təhlükəsizliyi artırılacaq və hər şeyə diqqət edəcəyik" - deyə Rusiya prezidenti bildirib.
Rusiyanın müdafiə naziri Sergey Şoyqu isə yenə də sərt açıqlamalar verib. Müdafiə naziri Suriyada Il-20 təyyarəsinin vurulmasının cavabsız qalmayacağını deyib.
“İsrailli həmkarlarımızı da məsələ ilə bağlı məlumatlandırdıq. Xüsusilə müdafiə nazirinə bu cür hərəkətlərin cavabsız qalmayacağını söylədim" – S.Şoyqu bildirib.
S.Şoyqu olayla bağlı araşdırmaların davam edəcəyini, günahkarların mütləq cəzalandırılacağını deyib.
Bu arada, İsrail baş naziri Binyamin Netanyahu ilə Rusiya prezidenti Vladamir Putin arasında telefon danışığı olub. Netanyahu, ölkəsinin Rusiyaya aid hərbi təyyarənin vurulması ilə bağlı əlindəki bütün məlumatları Rusiya ilə paylaşmağa hazır olduğunu ifadə edib.
Netanyahu Rusiyaya aid hərbi təyyarənin vurulmasına görə, Suriyadakı Bəşər Əsəd rejiminin məsuliyyət daşıdığını deyib.
Netanyahunun görüşdə ayrıca İsrailin Suriyadakı İran varlığını önləməkdə qərarlı olduğunu da dilə gətirib.
İsrail ordusundan verilən açıqlamada isə, Rusiyanın hərbi təyyarənin, İsrailin hava hücumları nəticəsində Suriyaya aid S-200 hava müdafiə sistemi tərəfindən vurulmasına görə, İsrailin məsuliyyət daşıması barədə ittihamları rədd edilir, hadisədən Suriyadakı Bəşər Əsəd rejimi, İran və Hizbullahın məsul olduğu deyilir.
İsrail rəhbərliyi Rusiyaya aid hərbi təyyarənin İsrailin hava hücumları nəticəsində Suriyaya aid S-200 hava müdafiə sistemi tərəfindən endirildiyi barədə ittihamı rədd etdi.
İsrail ordu xidmətində verilən yazılı məlumatda bildirilir:
“Suriya hökumətinə aid hava müdafiə sistemi tərəfindən vurularaq düşən təyyarədəki Rusiya əsgərlərinin həyatını itirməsindən kədərlənirik.
İsrailə aid döyüş təyyarələri sentyabrın 17-si axşam Suriya hökumətinə aid hərbi hissəni hədəfə aldı. Çünki bu obyektdə İranın Livandakı Hizbullaha göndərəcəyi və İsrailə qarşı təhlükə yaradan ağır silahların olduğu məlum olmuşdu.
Hadisə ilə bağlı aparılan qarşı araşdırmaya görə, Rusiya təyyarəsi Suriya qüvvələrinə aid hava müdafiə sistemi tərəfindən vurulub. O hava müdafiə sistemi raketi atəşləndiyi zaman hərbi təyyarələrimiz artıq İsrail hava sahəsində idi. İsrail reaktivləri Lazkiyədəki hava hücumunu təşkil etdiyi zaman da vurulan Rusiya təyyarəsi orada deyildi. Hava müdafiə sistemləri təsadüfən atəş açdı və havada Rusiya təyyarəsi olub-olmadığına cəhd göstərilmədi”.
İsrail Rusiya təyyarəsinin vurulması ilə əlaqədar Suriya hökumətini məsul tutur. Həmçinin bu hadisədə İran və Hizbullahın da məsuliyyəti olduğu bildirilir.
