ABŞ Suriyada Bəşər Əsəd rejimini yenidən təhdid edib. Baki-xeber.com xarici mediya istinadən xəbər verir ki, Rusiyanın Suriyada müxaliflərin nəzarətində olan İdlib şəhərini bombalamasından sonra Ağ Ev açıqlama yayıb.
ABŞ İdlibdəki prosesləri yaxından izlədiyini vurğulayaraq, Əsəd rejimi yenidən kimyəvi silahdan istifadə edəcəyi halda buna cavab veriləcəyilə bağlı təhdidini yeniləyib: "ABŞ, Rusiya və İranın dəstəklədiyi Əsəd rejiminin hücum təhdidi altında olan milyonlarla günahsız insanın yaşadığı Suriyanın İdlib bölgəsindəki prosesləri yaxından izləyir. Prezident Donald Tramp, bu cür bir hücumun bölgədə onsuz da ağır olan vəziyyəti daha da pisləşdirəcək və yüz minlərlə insanın həyatı təhlükə altına düşəcək xəbərdarlığı edib...
Açıq deyir, əgər Bəşər Əsəd yenidən kimyəvi silahdan istifadə edərsə, ABŞ və müttəfiqləri buna dərhal və və uyğun şəkildə cavab verəcək, bu barədə mövqeyimiz qətidir".
Bundan əvvəl ABŞ prezidenti Donald Tramp Twitter hesabından Suriya məsələsini dəyərləndirib. Tramp mesajında bir müddət əvvəl təhqir etdiyi Əsəd barəsində bu dəfə “dövlət başçısı” ifadəsini işlədib: "Suriya prezidenti Bəşər Əsəd Suriyanın İdlib şəhərinə düşünmədən hücum etməməlidir. Ruslar və iranlılar bu ehtimal olunan bəşəriyyət faciəsində iştirak edərək böyük səhv edirlər. Yüz minlərlə insan ölə bilər. Bunun baş verməsinə izn verməyin".
Dünən Trampın bu mesajından bir neçə saat sonra isə Rusiya qırıcıları İdlibi bombalayıb.
Rusiya bildirib ki, 4 qırıcı təyyarə ilə “el-Nusra” silahlı qruplaşmasına məxsus hədəflər bombalanıb. Rusiyanın hava əməliyyatına Əsəd rejimi artilleriya ilə dəstək verib. Rejimin ehtimal olunan yerüstü əməliyyatının qarşısını almaq üçün isə müxaliflər bölgədəki bir körpünü partladıblar. Bu gün isə müxaliflər onların mövqelərinə yaxınlaşan rejimə aid bir tankı vurub. Hazırda bölgədə gərginlik davam edir. Dəməşq rejimi, Rusiya və İranın dəstəyi ilə İdlib əməliyyatı üçün son hazırlıqlarını aparır. Yerüstü əməliyyata hazırlaşan Əsəd ordusunun qərbdən hücuma keçəcəyi və ilk mərhələdə Hələb-Hama və Lazkiyə dəhlizini ələ keçirməyi qarşısına məqsəd qoyduğu qeyd olunur.
İran xarici işlər naziri Məhəmməd Cavad Zərif xalqa zərər verməmək şərtilə terrorçuları İdlibdən çıxarmağa çalışdıqlarını deyib.
Bu arada, Türkiyə prezidenti Rəcəb Tayyib Ərdoğan da İdlib bölgəsinə hücumla bağlı açıqlama verib. "İdlibdə hazırda çox amansız bir proses həyata keçirilir. Bir fəlakət baş versə, bu insanların ilk qaçacağı yer Türkiyə olacaq. İndi bizim Rusiya ilə olan əməkdaşlığımız böyük əhəmiyyət daşıyır. ABŞ topu Rusiyaya, Rusiya isə ABŞ-a ötürür. Amma buralara raketlər yağdırılsa, çox ciddi bir qətliam baş verər. Elə bir vəziyyətdə oradan qaçanlar hara gedəcək? Böyük ehtimalla, yenə bizə gələcəklər. Bu, yeni bir çətinliyə səbəb ola bilər" – Ərdoğan deyib.
Sentyabrın 7-də İranın paytaxtı Tehranda ev sahibi İran prezidenti Həsən Ruhani və Rusiyanın dövlət başçısı Vladimir Putin ilə görüşəcəyini xatırladan Türkiyə prezidenti bu görüşə böyük əhəmiyyət verdiyini deyib: "Ümidvaram ki, Tehran toplantısını müsbət nəticələndirərək Suriya rejiminin ifrat davranışlarının qarşısını ala bilərik. Bu görüşə çox əhəmiyyət veririk".
Qeyd edək ki, Suriyada müxaliflərin son qalası - İdlibdə 4 milyona yaxın mülki vətəndaş Əsəd rejimi və onun havadarları tərəfindən aparıla biləcək əməliyyata görə narahatdır.
Strateji mövqedə yerləşən İdlibdə baş verəcək hər hansı bir qarşıdurmanın Türkiyə və Avropaya böyük köç dalğasına təkan verməsi ehtimal olunur.
