Rusiyaya yeni sanksiyalar tətbiq etməyə hazırlaşan ABŞ-ın təhdidi ilə, İsveçrənin, dünyada tanınmış məşhur banklarından “Credit Suisse” rusiyalı müştərilərinə aid 5 milyard dollar dəyərində hesabları dondurub.
Baki-xeber.com Rusiya mətbuatına istinadən xəbər verir ki, bank hesabları dondurulanların kimlikləri açıqlanmır.
Digər tərəfdən, RBC bank səlahiyyətlilərinə istinadən, hesabların dondurulmadığını, sanksiyalarla bağlı aparılacaq araşdırmalara görə, statusunun dəyişdirildiyini bildirib. Bununla belə yenə də hesablamalarla bağlı məhdudiyyətlərin olduğu deyilir.
"Biz beynəlxalq tənzimləyici qurumlarla əməkdaşlıq edirik. Rusiyaya qarşı sanksiyalar da bura daxildir” - bankın sözçüsü bildirib.
Bu arada, iki İsveçrə bankı UBS və Julius Baer də, sanksiyalarla bağlı beynəlxalq əməkdaşlığa gedəcəklərini açıqlayıblar, amma onların bu addımının hesabların dondurulmasına səbəb olub-olmayacağı isə hələlik məlum deyil.
Ekspertlər ABŞ sanksiyalarının rus oliqarxları birbaşa hədəf almağa başladığını vurğulayırlar.
Rusiyadan 2017-ci ildə çıxarılan pulun 14 faizi, yəni 6,2 milyard dolları İsveçrəyə köçürüldüyü bildirilir.
“Kommersant” qəzeti, adıçəkilən üç bankın, iyun ayında Kremlə yaxınlığı ilə bilinən iş adamı Viktor Vekselberqə aid 1 milyard dollarlıq hesabı dondurduqlarını yazıb.
“Credit Suisse”, 2009-cu ildə İrana sanksiyaları pozduğuna görə, ABŞ tərəfindən 500 milyon dollar cərimələnib.
