Fransanın nəhəng neft şirkəti “Total” İranı rəsmən tərk edir. Şirkət artıq İranın Cənub Pars layihəsindəki iştirakını da dayandırıb. Fəaliyyətini dayandıracağını iki ay əvvəl açıqlayan Fransa şirkətini İranda Çinin dövlət konsorsiumu əvəzləyəcək.
Baki-xeber.com xəbər verir ki, bu barədə açıqlama verən İranın neft naziri bildirib ki, Fransanın neft şirkəti “Total” ölkənin Cənub Pars ofşor təbii qaz yataqlarının istismarına dair 20 il müddətinə 5 milyard dollarlıq kontrakı ləğv etdikdən sonra İranı tərk edir. Neft naziri Bijan Zanganenin bildirdiyinə görə, şirkətin qərarı ABŞ sanksiya təhdidlərilə bağlıdır.
Nazir “Total”ı əvəzləyəcək başqa bir şirkətlə danışıqlar apardıqlarını deyib. İran parlamentinin veb səhifəsində də “Total” şirkətinin qərarını verməsindən sonra Tehran başqa alternativlər axtardığını deyən neft nazirinin açıqlamasına istinad edilib.
Iarn rəsmiləri Cənub Pars layihəsində “Total”ı Çinin dövlətə məxsus neft konsorsiumunun ala biləcəyini deyiblər. Bu ayın əvvəli İran Çin konsorsiumunun layihədə 80 faiz pay aldığını bildirib. CNPC əvvəlcə layihədə aksiyaların 30 faizini aldığını bildirmişdi.
Qeyd edək ki, ABŞ-ın İrana qarşı sanksiyaları Birləşmiş Ştatların may ayında İranla 2015-ci ildə imzalanmış nüvə sazişindən çıxdığını elan etməsindən sonra avqust ayında yenidən qüvvəyə minib.
ABŞ prezidenti Donald Tramp 2015-ci ildə İranla dünya qüdrətləri arasında Tehranın nüvə proqramının məhdudlaşdırılması müqabilində ölkə iqtisadiyyatına böyük zərər vuran iqtisadi tədbirlərin yüngülləşdirilməsini nəzərdə tutan razılaşmaya əsasən aradan qaldırılmış sanksiyaları yenidən bərpa edib.
Sanksiyalar İranın avtomobil sektoru, qızıl və digər qiymətli metallar ticarəti, İranın milli valyutası rialı və digər maliyyə transaksiyalarını hədəf alıb.
Tramp İranı noyabrın 5-də ölkənin enerji transaksiyaları və xarici maliyyə qurumlarının İranın Mərkəzi Bankı ilə keçirdiyi əməliyyatları hədəf alan yeni sanksiyalarla təhdid edib.
