Səudiyyə Ərəbistanı PKK terror təşkilatına 100 milyon dollar yardım ayırıb. Baki-xeber.com Türkiyə mətbuatına istinadən xəbər verir ki, bu barədə iyulun 12-də Brüsseldə keçirilən İŞİD-ə qarşı qlobal Koalisiyanın toplantısında açıqlama verilib.
Qeyd edilir ki, Səudiyyə, Suriyanın İŞİD terrorçularından alınan şimal-şərq bölgələri və Rakkanın yenidən bərpa edilməsi üçün 100 milyon dollar bağışlayıb.
Burada ən maraqlı məqam isə, sözügedən ərazilərin terror təşkilatı PKK-nın Suriya qolu YPG-nin əsas onurğasını təşkil etdiyi SDG-nin nəzarəti altında olmasıdır.
Qeyd edək ki, bir müddət əvvəl ABŞ prezidenti Donald Tramp Səudiyyə Ərəbistanına səfər etmişdi. Həmin vaxt Səudiyyə rəsmilərinin ABŞ əsgərlərinin Suriyada qalmasını istədiklərini öyrənən ABŞ prezidenti, "Səudiyyə Ərəbistanı bizim Suriyada qalmağımızı istəyirsə, pulunu ödəmək məcburiyyətində olacaq" demişdi.
Səudiyyə Ərəbistanın Vaşinqtondakı səfirliyi isə ölkəsinin ayırdığı 100 milyonla bağlı "bu məbləğ həyat qurtaracaq, yerindən, yurdundan olmuş suriyalıların geri qayıtmasını təmin edəcək və İŞİD-in Suriyanı və qonşularını təhdid edərək yenidən ortaya çıxmamasını, beynəlxalq hücumlar planlamamasını təmin edəcək" — deyə açıqlama yayıb.
ABŞ Dövlət Departamentinin sözçüsü Hizer Nauret isə Vaşinqtonun Səudiyyənin "comərd dəstəyindən" məmnun qaldığını deyərək, təşəkkür edib.
Dövlət Departamenti İŞİD-dən azad edilmiş bölgələr üçün ümumilikdə 300 milyon dollar toplandığını açıqlayıb.
Səudiyyənin ayırdığı məbləğin bölgədə kənd təsərrüfatı, təhsil, yolların salınması, dağıntıların aradan qaldırılması, kommunal və s. bu kimi sahələrə xərclənəcəyi bildirilir.
Səudiyyənin Rakka mövzusunda ABŞ və YPG terror təşkilatı ilə eyni mövqedən çıxış etməsi ilk hadisə deyil. Belə ki, Səudiyyə Ərəbistanının körfəz işləri naziri Samir əs-Səbhan 2017-ci ilin oktyabr ayında ABŞ-ın İŞİD-lə mübarizə xüsusi təmsilçisi Brett MakQerklə birgə Rakkanın Ayn İsa bölgəsi və bəzi kəndlərinə səfər edib.
Səudiyyə ilə yanaşı Birləşmiş Ərəb Əmirlikləri də iyulda Rakka üçün 50 milyon dollar yardım edəcəyini açıqlamışdı.
Onu da xatırladaq ki, İŞİD Rakkanı 2014-cü ildə ələ keçirərək 3 il əlində saxlayaraq paytaxt elan etmişdi. ABŞ-ın liderliyi ilə qurulan kürdlərdən ibarət SDG isə 2017-ci ilin iyununda Rakkada əməliyyata başlamış və bir neçə ayda ərazini nəzarəti altına almışdı.
YPG terror təşkilatının əsas hissəsi olan SDG bölgədə hakimiyyəti ələ aldıqdan sonra bölgədən insan haqlarının pozulmasına dair çoxsaylı məlumatlar gəlir.
