Avqustun 10-da Türkiyənin xəzinə və maliyyə naziri Berat Albayrakın “ölkə “Yeni iqtisadi Model”ə keçəcək” açıqlamasından dərhal sonra ABŞ prezidenti Donald Trampın “Twitter”də yazdığı mesajlar Türkiyə birjasını alt-üst edib.
Baki-xeber.com türk mediasına istinadən xəbər verir ki, Türkiyədən idxal olunan polad və alüminium üçün gömrük rüsumlarını iki dəfə artırdığını bəyan edən Tramp türk lirəsini də birbaşa hədəf alıb. "Onların valyutası, Türkiyə lirəsi bizim güclü dollarımız qarşısın sürətlə aşağı düşərkən, mən polad və alüminium tariflərinin ikiqat artırılmasına dair qərar verdim.
Artıq alüminium üçün gömrük rüsumu 20%, polad üçün isə 50% oldu. Bizim hazırda Türkiyə ilə münasibətlərimiz heç də yaxşı deyil” - Trampın tvitində deyilir.
Bu tvitdən sonra Türkiyə lirəsi dollar qarşısında sürətlə dəyər itirməyə başlayıb.
Trampın bu addımı, Türkiyədə olduğu qədər ABŞ-da da sərt reaksiya ilə qarşılanıb. “The Washington Post” qəzetinin yazarı, beynəlxalq siyasət üzrə mütəxəssis Brian Klaas bununla bağlı Trampa xəbərdarlıq edib. O, ABŞ prezidentinə Türkiyədəki İncirlik hərbi hava bazasındakı nüvə başlıqlarını xatırladıb.
“Ərdoğanın heyranı deyiləm, lakin Trampın addımı, lazımsız çıxışdır. Türkiyə NATO üzvüdür və Türkiyədəki ABŞ hərbi hava bazasında (İncirlik) 50 nüvə bombası var. Trampın tvitləri ciddi milli və beynəlxalq təhlükəsizlik risqləri yaratmağa davam edir”, - deyə Klaas Tvitter hesabında yazıb.
