Yunanıstan hökuməti Rusiyadakı səfirinin geri çağırılması ilə bağlı qərar qəbul edib.
Baki-xeber.com-un xəbərinə görə, bu barədə cümə günü ilk dəfə olaraq bu ölkənin ANT1 telekanalı özünün diplomatik dairələrdəki mənbəyinə əsasən xəbər verib. Daha sonra xəbəri RİA”Novosti”yə təsdiqləyən mənbə bu qərarı şəxsən Yunanıstanın XİN rəhbəri Nikos Kotziasın qəbul etdiyini deyib. Əlavə edib ki, səfir Andreas Friqanasın yerini başqa diplomat tutacaq.
Məsələ ondadır ki, avqustun əvvəlində Rusiya yunan diplomatlarının ölkədən çıxarılacağını elan edib. RF XİN-ə çağırılan Friqanasa isə “Afinanın qeyri-dost əməllərinə eynilə qarşılıq veriləcəyi” barədə nota təqdim edilib. Daha öncə isə - iyul ayında Yunanıstan iki rus diplomatının ölkədən çıxarılacağını bəyan edib. Daha iki rus diplomatının isə ölkəyə girişinə icazə verilməyib. Afina onları ölkənin daxili işlərinə qarışmaqda və dövlət qulluqçularını pulla ələ əlmaqda suçlayıb. Ardınca Rusiya XİN sözçüsü Mariya Zaxarova Britaniya və Amerika kimi müttəfiqlərin güclü təzyiqlərindən danışıb. Öz növbəsində, Yunanıstan XİN Rusiyanı “Yunanıstana hörmət etməməkdə və yunan siyasi dəyərlərini anlamamaqda” ittiham edib.
