Ermənistanın yeni hakimiyyəti tərəfindən sabiq rəhbərliyin təqib olunması rəsmi Moskvanın hiddətinə səbəb olub. Kollektiv Təhlükəsizlik Müqaviləsi Təşkilatının (KTMT) baş katibi Yuri Xaçaturovun məhkəməyə cəlb olunması xüsusilə Moskvanı qəzəbləndirib.
Baki-xeber.com “Sputnik Azərbaycan”a istinadən xəbər verir ki, bu barədə Rusiya dövlət strukturlarında olan mənbə "Kommersant" nəşrinə bildirib. Rusiyada Ermənistanın hazırkı rəhbərliyinin hərəkətləri hərbi blokun imicinə zərbə kimi qiymətləndirilib. Moskva hesab edir ki, KTMT-nin baş katibi postuna digər üzv ölkənin vətəndaşı seçiləcək.
Rəsmi İrəvan isə Yuri Xaçaturova qarşı irəli sürülən ittihamlardan sonra KTMT baş katibi kvotasını saxlamağı planlaşdırır. Ermənistan tərəfinin fikrincə, KTMT-ın yeni baş katibi bu ölkənin nümayəndəsi olmalıdır.
Jurnalistin “rəsmi İrəvan KTMT yeni baş katibinin Ermənistan nümayəndəsi olması məsələsində israr edəcəkmi" sualını Ermənistanın baş nazirinin mətbuat katibi Arman Eqoyan belə cavablandırıb: "Kvota 2020-ci ilə qədər Ermənistana məxsusdur".
"Kommersant"a açıqlama verən mənbə onu da əlavə edib ki, Rusiyanın Ermənistana 100 milyon dollar dəyərində silah tədarükünə dair razılaşma da sual altına düşüb. Mənbə bildirib ki, Ermənistan bu məbləğ dəyərində kredit alaraq Rusiya ilə müqaviləni uzatmalı idi: "Lakin hazırda bu ölkədə baş verənləri ümumiyyətlə anlamaq çətindir".
Bir neçə gün əvvəl isə Rusiya XİN başçısı Sergey Lavrov rəsmi İrəvanı tənqid edib. O bildirib ki, Ermənistandakı hadisələr ölkənin yeni rəhbərliyinin öz siyasi sələflərini təqib etməmək barədə bəyanatları ilə ziddiyyət təşkil edir.
"Rusiya İrəvanın müttəfiqi kimi həmişə erməni dövlətinin sabitliyində maraqlı olub, ona görə də orada baş verənlər bizi narahat etməyə bilməz. Bu narahatlıq, həmçinin, Ermənistanın iştirak etdiyi MDB məkanında fəaliyyət göstərən təşkilatların normal işinin təminatı baxımından da mövcuddur.
Son günlər biz öz narahatlığımızı bir neçə dəfə Ermənistan rəhbərliyinin nəzərinə çatdırmışıq. Ümid edirik ki, vəziyyət konstruktiv məcrada davam edəcək" — nazir əlavə edib.
Onun sözlərinə görə, Ermənistanda may ayında baş verən böhran zamanı Moskvada böyük məmnuniyyətlə bu böhranın həllinin bütün aparıcı partiyaların iştirakı ilə kompomis əsasında tapılmasını qeyd edirdilər: "Biz ümid edirdik ki, bu nəticədən çıxış edərək bütün siyasi qüvvələr, ilk növbədə Ermənistanın yeni rəhbərliyi, yeni iqtidar birləşdirici yanaşmanı davam etdirəcək, milli birliyi möhkəmləndirəcək".
"Lakin son günlərin olayları aşkar şəkildə belə müsbət başlanğıcı pozur, Ermənistanın yeni rəhbərliyinin öz siyasi sələflərini təqib etməmək barədə bu yaxınlarda verdiyi bəyanatları ilə ziddiyyət təşkil edir", - deyə Lavrov fikrini yekunlaşdırıb.
Lavrovun fikirlərinə münasibət bildirən Ermənistan Xarici İşlər Nazirliyinin mətbuat katibi Tiqran Balayan bildirib ki, ölkə daxilində baş verənlərin heç bir halda Ermənistanın xarici siyasəti ilə bağlılığı yoxdur.
Qeyd edək ki, Ermənistanın Xüsusi İstintaq Xidməti iyulun 26-da keçmiş prezident Robert Köçəryana qarşı ölkənin konstitusion quruluşunu dəyişmək ittihamını irəli sürüb. Köçəryan məhkəmə qərarı ilə iki aylığına həbs edilib. Keçmiş prezident ittihamların siyası xarakterli olduğunu bəyan edib.
Ondan əvvəl isə keçmiş müdafiə naziri Mikael Arutyunyan 2008-ci il 1 mart hadisələri ilə bağlı müqəssir qismində istintaqa cəlb olunub və barəsində axtarış elan olunub. KTMT baş katibi Yuri Xaçaturova da bu iş çərçivəsində ittiham irəli sürülüb. Xaçaturov təzminat qarşılığında zaminə buraxılıb.
