ABŞ Türkiyəni amerikalı keşişin azad edilmədiyi təqdirdə, sanksiyaların tətbiqi ilə hədələyib. Baki-xeber.com Türkiyə mediasına istinadən xəbər verir ki, ABŞ prezidenti Donald Tramp Türkiyəni, amerikalı din adamı Endrü Branson sərbəst buraxılmayacağı halda, geniş sanksiyalar başladacağı ilə təhdid edib.
Tramp Twitter hesabında "ABŞ, böyük bir xristian, ailə başçısı və möhtəşəm bir insan olan keşiş Endrü Bransonun uzun müddət həbsdə saxlanmasına görə Türkiyəyə geniş sanksiyalar tətbiq edəcək. Bu günahsız inanc adamı dərhal sərbəst buraxılmalıdır!" yazıb.
Bundan əvvəl isə ABŞ-ın vitse-prezidenti Mayk Pens Türkiyəni sanksiyalarla hədələyib.
"Əgər Türkiyə məsum din adamının azad edilməsinə dair lazımi addımlar atmasa və onu vətəni Ameikaya yola salmasa, ABŞ Türkiyəyə qarşı ciddi sanksiyalar irəli sürəcək" - deyə, vitse-prezident Mayk Pens Dövlət Departamentində keçirilən din azadlığı sammitində bildirib.
Türkiyədə terrorizm və casusluq ittihamları ilə həbs edilmiş amerikalı keşiş iki gün əvvəl ev dustağı edilib.
ABŞ-ın Şimali Karolina ştatından olan Endrü Branson iki il həbsdə saxlanılıb. Onun həbsi NATO üzrə müttəfiq olan ABŞ və Türkiyə arasında münasibətlərdə gərginliyin yaranmasına səbəb olub. Məhkəmənin Bransonun həbsxanadan ev dustaqlığına buraxılması haqda qərarından bir qədər sonra Türkiyənin DHA və NTV tele-kanalları onun İzmir şəhərində müşayiət altında həbsxanadan çıxarıldığını göstərən video görüntülər yayımlayıb.
ABŞ dövlət katibi Mayk Pompeo Endrü Bransonun həbsxanadan çıxarılaraq ev dustağı kimi saxlanması haqda qərarı məmmunluq hissi ilə qarşıladığını, lakin bu addımın kifayət etmədiyini bildirib: “Biz pastor Bransonun Türkiyədə həbsxanadan ev dustaqlığına buraxılması haqda uzun zamandır gözlədiyimiz qərarı alqışlayırıq, lakin bu, yetərli deyil. Biz cənab Bransona qarşı kifayət qədər dəlil olduğunu görmürük və Türkiyə rəsimlərini onun işini şəffaf və ədalətli şəkildə həll etməyə çağırırıq”.
Branson ABŞ-da yaşayan və Türkiyənin 2016-ci il çevriliş cəhdində təqsirləndirdiyi Fəthullah Güləni dəstəkləmək ittihamı ilə həbsdə saxlanılırdı.
Türkiyə Prezident Aparatının sözcüsü İbrahim Kalın isə ABŞ rəhbərliyinin Türkiyə ilə hədələyici dillə danışmasının qəbuledilməz olduğunu bildirib: "ABŞ rəhbərliyinin NATO müttəfiqi olan Türkiyə ilə hədələyici dillə danışması qəbuledilməzdir"
Türkiyənin Xarici İşlər naziri Mövlud Çavuşoğlu da ABŞ prezidenti Donald Trampın və vitse- prezident Mayk Pensin ev həbsinə alınan FETÖ şübhəlisi Endrü Bransonun azadlığa buraxılmayacağı halda Türkiyəni sanksiyalarla hədələməsinə "Twitter" vasitəsilə cavab verib. M.Çavuşoğlu heç kimin Türkiyəyə diktə edə bilməyəcəyini bildirib: “Heç kim Türkiyəyə nə edəcəyini diktə edə bilməz. Hüquqi qaydalar hamı üçün eynidir”.
Türkiyə Xarici İşlər Nazirliyinin mövzu ilə bağlı açıqlamasında isə deyilir: "Türkiyəyə heç kim əmr verə və hədələyə bilməz".
