Ağ Ev, Rusiya prezidenti Vladimir Putinin Ukraynada referendum keçirilməsi təklifini rədd edib.
Baki-xeber.com xarici KİV-ə istinadən xəbər verir ki, Putinin Helsinki zirvəsində ABŞ prezidenti Donald Trampa Ukraynanın separatçıların nəzarətində olan şərq bölgəsində referendum keçirilməsini təklif edib. Rusiyanın ABŞ-dakı səfiri Anatoli Antonov da iki liderin Helsinki zirvəsində separatçı Şərq Ukraynanın gələcəyi ilə bağlı referendum keçirilməsi ehtimalını müzakirə etdiklərini deyib.
Ancaq Ağ Ev Putinin dəstəklədiyi referendum təklifini rədd edib. Prezident Trampın, Putinlə keçirdiyi mübahisəli sammitin ardından referendumu rədd etməsi iki lider arasında ortaya çıxan anlaşılmazlıqlardan biri kimi xarakterizə edilir.
Trampın milli təhlükəsizlik üzrə sözçüsü Garrett Marquis, Donbas bölgəsində münaqişəni həll etmək üçün Rusiya ilə Ukrayna hökumətləri arasındakı anlaşmalarını belə bir variantı ehtiva etmədiyini və "sözdə referendum" təşkil edilməsinə yönəlmiş hər hansı bir cəhdin də heç bir qanuna əsaslanmadığını bildirib.
Ağ Ev rəsmisi bəyan edib ki, növbəti Tramp-Putin sammiti təhlükəsizlik, xüsusilə də Rusiyanın seçkilərə müdaxiləsinə həsr olunacaq. Adının çəkilməsini istəməyən Ağ Ev rəsmisi danışıqların habelə Şimali Koreya, İran və Suriya məsələlərini, eləcə də onların nüvə silahı proqramını əhatə edəcəyini bildirib.
Ağ Ev, ABŞ prezidenti ilə Putin arasında noyabr ayında Vaşinqtonda keçirilməsi planlaşdırılan ikinci zirvə ilə bağlı hazırlıqların başladığını bildirib. Tramp isə öz milli təhlüksəzilik müşaviri Con Boltona Putini Vaşinqtona dəvət etməyi tapşırıb. Məqsəd Helsinkidə müzakirə olunan məsələlər üzərində mübadiləni davam etdirməkdir.
Trampın Putinə dəvətnaməsi prezidentin ən yüksək rütbəli kəşfiyyat rəsmisini təəcccübləndirib. Kolorado ştatında Aspen Təhlükəsizlik Forumunda çıxış edərkən planlaşdırılan görüş haqda məlumatlandırılan Milli Kəşfiyyat Direktoru Dan Kouts “Onu təkrar deyin” deyə təəccübünü ifadə edib. “OK,” o dərin nəfəs aldıqdan sonra davam edib: “Bu xüsusi bir şey olacaq.”
Qeyd edək ki, son on ildə heç bir Rusiya lideri Ağ Evə dəvət olunmamışdı.
Onu da xatırladaq ki, Trampın Helsinkidə Putinlə birgə mətbuat konfransı zamanı Rusiyanın seçkilərə müdaxilə etməsi haqda ABŞ kəşfiyyatının qənaətini paylaşmaması həm Respublikaçılar, həm də Demokratlar arasında sərt etirazlarla qarşılanıb. Prezident Tramp bir gün sonra yanlışlığa yol verdiyini etiraf edib.
