Ermənistanın sabiq prezidenti Robert Koçaryan dindirilmək üçün Xüsusi İstintaq Xidmətinə (XİX) çağırılıb (BBC).
Çərşənbə günü İrəvanda brifinq zamanı XİX-in rəisi Sasun Xaçatryan bəyan edib ki, Koçaryan "hələ ki" 2008-ci il 1 mart iğtişaşlarındakı ölüm halları ilə bağlı cinayət işləri üzrə "şahid qismində dəvət olunur".
2008-ci ilin 1 və 2 mart hadisələri zamanı Serj Sarkisyanın prezident seçkilərində qələbəsinin saxtakarlıqla əldə edildiyini iddia edən fasiləsiz kütləvi etiraz aksiyası iştirakçılarına qarşı güc strukturlarının əməliyyatları nəticəsində 10 nəfər, o cümlədən 2 polis əməkdaşı həlak olmuş, iki yüzdən çoxu xəsarət almışdı. Köçəryan 1998-2008-ci illərdə ölkə prezidenti kimi Ermənistan Silahlı Qüvvələrinin ali baş komandanı olub. Bu günədək həmin hadisələrin günahkarları məsuliyyətə cəlb edilməyib.
"1 mart" cinayət işi üzrə həmin dövrdə Ermənistan müdafiə naziri vəzifəsini tutan Mikayel Harutyunyan barəsində axtarış elan edilib. O, ölkənin dövlət quruluşunu devirmək cəhdində və mitinq iştirakçılarına qarşı qanunsuz olaraq güc tətbiq etməkdə şübhəli bilinir.
Həmin hadisələrin fəal iştirakçısı olan və Serj Sarkisyanın rəhbərlik etdiyi Respublikaçılar Partiyası hakimiyyəti tərəfindən iğtişaşlar təşkil etmək ittihamı ilə 2010-cu ildə 7 il həbsə məhkum edilib, 2011-ci ildə amnistiya nəticəsində azadlığa çıxmış Ermənistanın hazırkı baş naziri Nikol Paşinyan insan tələfatına səbəb olmuş bu hadisənin tam araşdırılmasına dair "ictimai tələbin" yerinə yetirilməsini vəd edib.
Çərşənbə günü səhərdən Ermənistan Milli Təhlükəsizlik Xidmətinin (MTX) əməkdaşları Serj Sarkisyanın ortancıl qardaşı, ictimaiyyətdə daha çox "Saşik" kimi tanınan Aleksandr Sarkisyanın İrəvandakı evində 9 saatadək davam edən "xüsusi əməliyyat"dan sonra Aleksandr Sarkisyanı və onun oğlu Hayk Sarkisyanı özləri ilə aparıblar. Jurnalistlərin suallarına MTX əməkdaşları cavab verməyib, MTX-nın mətbuat katibi Samson Qalstyan isə əməliyyat barədə xüsusi bəyanat veriləcəyini və Xidmətin rəsmi internet saytında əməliyyatın videosunun yerləşdiriləcəyini bildirib.
Axtarışdan sonra MTX əməkdaşları öz minik maşınlarına müəyyən əşyalar da yükləyiblər.
62 yaşlı Saşik Sarkisyan ötən həftə də polis tərəfindən saxlanmış və bir neçə saatdan sonra buraxılmışdı. Sonradan Ermənistan polis rəisi Valeri Osipyan jurnalistlərə demişdi ki, sabiq prezidentin qardaşı qanunsuz silah saxlamaqda şübhəli bilinib, lakin onun üstündəki silah qanuni olub.
Saşik Sarkisyan 2003-2011-ci illərdə Ermənistan Milli Məclisin üzvü olub. Mətbuatda onun müxtəlif bizneslərə sahib və ya bir çox başqalarının biznesində şərik olduğu bildirilir.
Serj Sarkisyanın kiçik qardaşı Levon Sarkisyanın ailəsi isə təxminən 7 milyon dollar mənimsəməkdə şübhəli bilinir.
Ermənistan Dövlət Gəlirlər Komitəsinin məlumatına görə, 59 yaşlı Levon Sarkisyan, onun oğlu Narek və qızı Ani qanunsuz varlanmaq və mülkiyyət haqqında deklarasiya verməkdən yayınmaqda ittiham olunur.
Narek Sarkisyanın mənzilində axtarış nəticəsində Levon Sarkisyan və onun övladları Narek və Aninin adlarına 6,8 milyon dollarlıq bank əmanəti haqqında sənədlər aşkar edilib, rəsmilər bildirib.
Fakt üzrə cinayət işi qaldırılıb.
Levon Sarkisyan 1998-ci ildən bir sıra ərəb ölkələrində, o cümlədən İordaniya, Tunis və Suriyada səfir olub. 2010-cu ildən o, xüsusi tapşırıqlar üzrə səfir təyin olunub.
