İranda son vaxtlar gün üzünə çıxan iqtisadi çətinliklər paytaxt Tehran və digər şəhərlərdə sahibkarların küçələrə çıxmasına səbəb olub. Baki-xeber.com Türkiyə mediasına istinadən xəbər verir ki, Tehranda yüzlərlə etirazçı parlament binasına yürüş edib. Tehran Prokurorluğu isə nümayişçilərlə bağlı araşdırmalara başlayıb.
Bu arada, iranlı siyasətçi və akademik Elahe Kulayi xəbərdar edib ki, hər gün daha da ağırlaşan iqtisadi böhran aradan qaldırılması, ölkə Sovet İttifaqının taleyini yaşaya bilər: "Əgər biz Sovet İttifaqının aqibətində nəticə çıxarmasaq... Onların getdiyi yola doğru gedirik, vaxtımız azdır".
Kulayi hakimiyyəti Tehran Universiteti tərəfindən nəşr olunan "Sovet İttifaqının çökməsinin iqtisadi kökləri" adlı kitabı oxumağa çağırıb.
İranda iqtisadi çətinliklərə görə etirazlar davam edərkən parlamentdən prezident Həsən Ruhaniyə xəbərdarlıq edilib. Parlament Ruhanidən iqtisadiyyat üzrə məsul şəxslərin dəyişdirilməsini tələb edib.
İranın dini lideri Əli Xameneyi əvvəlki gün parlamentdən iqtisadiyyatdakı problemlərin həlli ilə bağlı hərəkətə keçməsini istəmişdi. Tehranda satıcılar da bahalaşmaya etiraz etmişdilər.
Digər tərəfdən, İran ABŞ-ın nüvə müqaviləsindən çıxıb sanksiyalarını artırmasından sonra nüvə proqramını yenidən canlandırıb. İran nüvə proqramı çərçivəsində İsfahanda uran istehsal kompleksi açıb. İran 9 il sonra yenidən istehsala başlayıb.
Bu arada, ABŞ Konqresində İranda demokratik keçid mövzusunda konfrans keçirilib. İran Milli Konqresi tərəfindən təşkil edilmiş konfransda İranda dəyişikliklərin mümkün perspektivləri və dünyəvi, plüralist və demokratik hökumətin yaradılması üçün imkanlar kimi məsələlər ətrafında fikir mübadiləsi aparılıb. İran Milli Konqresinin builki tədbirində İran daxilində azadlıq və demokratiya uğrunda hərəkatın dinamikası və ABŞ-ın nüvə sazişindən çıxmasından sonra ölkədə demokratiya tərəfdarlarına dəstəyi də daxil olmaqla İranla bağlı siyasi kursu gündəmdə olub.
Konqres seçkilərində namizəd, keçmiş hərbi dəniz qüvvələrinin elit birləşməsinin üzvü Dan Krinşau ABŞ-ın İranla bağlı siyasətinin əsas prioritetlərini göstərərək, Birləşmiş Ştatların İranın davranışlarına tolerantlıq göstərməyəcəyini bildirib: “Bizim Körfəz regionunda yanaşmamız tamamilə aydın olmalıdır və İranın aqressiv və təxribatçı davranışına sıfır dözümlülük prinsipini əks etdirməlidir. Biz heç bir halda İranın patrul gəmiləri tərəfindən narahat edilməməliyik.”
Onun bildirdiyinə görə, Birləşmiş Ştatların İranla bağlı prioritetlərindən biri ölkənin daxilində demoktratiya tərəfdarlarına dəstək verməkdən ibarətdir: “Biz İran daxilində müqaviməti dəstəkləməliyik. Elə dünən İranda böyük nümayişlər keçirilib və bəlkə bu gün də davam edir. İnsanlar bu tiraniya rejimindən tamamilə bezib. Müxalifətin uğuru İran xalqının əlaqə qurmaq, təşkil olunmaq və öz mesajını effektiv şəkildə çatdırmaq qabiliyyətindən asılı olacaq. Birləşmiş Ştatlar lazım olduğu halda dəstək verməyə hazır olmalıdır. Biz İran xalqının azadlığı və onların dünya ilə inteqrasiya arzusunun dəstəkçisi kimi hərəkət etməkdən çəkinməməliyik.”
Konfransa sponsorluq edən Amerika konqresmeni Daha Rohrabaker isə deyib ki, İran xalqı “kifayət qədər əziyyət çəkib”: “Biz çox məmnuq olmalıyıq ki, biz indi burada olduğumuz zaman İran xalqı ölkə boyu ayağa qalxır və biz burada danışdığımız zaman müxtəlif yerlərdə küçə nümayişləri keçirilir. Bu çox vacibdir ki, onlar küçələrdə olduğu zaman bilsinlər ki, burada Birləşmiş Ştatlarda insanlar onların arxasında durub sadəcə onları alqışlamır, həm də bu sistemdən keçidə hazırlaşır”.
