Xəbər verildiyi kimi Ermənistan Milli Təhlükəsizlik Xidmətinin saxladığı deputat, general Manvel Qriqorya həbs olunub.
Ermənistan Milli Təhlükəsizlik Xidməti Qriqoryana məxsus evlərdə axtarışlarla bağlı məlumat və video görüntüsünü yayıb. Axtarışların Armavir vilayəti Arşaluys kəndindəki istirahət zonası və Eşmiadzin şəhərinin Alaverdyan küçəsindəki 46 nömrəli evdə keçirildiyi bildirilir.
"İstirahət zonası silah anbarı və onlarla köhnə və yeni markalı avtomobil parkına çevrilib. Daçanı həmçinin general ərzaq, gigiyena, dava-dərman, hərbi forma anbarı kimi istifadə edib. Əşyaların əksəriyyətinin üzərində "əsgərlər üçün" yazılmışdı", - məlumatda deyilir.
Qutuların içərisindən çıxarılan uşaq xətti ilə yazılmış məktublardan məlum olur ki, qutuların içindəki hələ 2016-cı ildə onlarla uşaq bağçası, məktəb, rayon və kəndlərdən "ön xətdə olan hərbçilər üçün" göndərilibmiş, məlumatda deyilir.
Burada çoxlu qatılaşdırılmış süd, makaron məmulatları, ət konservi, tərəvəz, gigiyena ləvazimatları, mayka, corab və sairə aşkar edilib. Bəzi ərzaq və əşyaların üzərinə yazılardan görünür ki, bunlar satış üçün deyil, sırf hərbçilər üçün istehsal olunub.
MTX-nin məlumatına görə, general Manvelin Arşaluys kəndindəki evində bir cəbbəxana silah müsadirə edilib.
Axtarış nəticəsində 18 ədəd "PQ-7" tipli tanka qarşı minaatan, 20 ədəd "F-1" tipli qumbara, 22 minə yaxın müxtəlif çaplı patron, 12 ədəd 400 qramlıq trotil partlayıcı maddə, 27 ədəd "KD" tipli partladıcı və s. silah və sursat növləri aşkar edilib.
Manvel Qriqoryana məxsus Eçmiadzindəki evdə 79 ədəd zavodda hazırlanmış tüfəng və 39 tapança, 12 mindən çox müxtəlif çaplı patron müsadirə edilib, məlumatda bildirilir.
Generalın istirahət zonasındakı evində onlarla bahalı müasir və retro modelli avtomobil kolleksiyası saxlanan "3 avtomobil parkı" aşkar edilib. Avtomobillərdən başqa burada müxtəlif növ motosiklet, "dördgünlük 2016-cı il aprel müharibəsində Qarabağ müdafiə ordusu üçün" bəxş edilən, o cümlədən, təcili yardım maşınları aşkar edilib. Rusiya erməni icması nümayəndələri tərəfindən bəxş edilən bu maşınları Manvel Qriqoryan öz qohumlarının adına yazıb və öz şəxsi qarajına gətirib.
General millət vəkilinin şəxsi zooparkı da var. O, pələng, ayı, dəvəquşu saxlayır. Bundan başqa Manvel Qriqoryanın öz cıdır meydanı vardır.
"Müəyyən edilən məlumata əsasən, aydın olur ki, dördgünlük aprel müharibəsi üçün nəzərdə tutulan ərzağı Manvel Qriqoryan şəxsi zooparkındakı heyvanlara yedizdirmək üçün sərf edib", - MTX bildirir.
Qriqoryanın evlərində axtarış videosu yayıldıqdan sonra generalın həmpartiyalıları onun təqibə məruz qaldığına dair mövqeləri dəyişib. Ermənistan Respublikaçılar Partiyası parlament fraksiyasının üzvü Armen Aşotyan generalın işi ilə bağlı məsələnin "sırf hüquq səpkisində" olduğunu deyib: "Video görüntülərə baxdıqdan sonra deyə bilərəm ki, aprel müharibəsinə dair bütün şübhə və ittihamlarla bağlı çox ağır ağrı və kədər yaşadım. Səsləndirilən ittihamların həqiqiliyi təsdiqlənərsə, bu, mənim üçün dərin şəxsi faciə olar".
Qriqoryanın vəkili Hrant Ananyan da ona hüquqi yardım göstərməkdən imtina edib: "Mən bu işə baş vuranda hələ hər şeyi bilmirdim... Onu deyə bilərəm ki, hazırda bu işi davam etməyi məqsədəuyğun bilmirəm".
Bu arada, Manvel Qriqoryanın oğlu Karen Qriqoryan mer vəzifəsindən istefa verib. Modern.az-ın Ermənistan KİV-nə istinadən məlumatına görə, Vaqarşapat şəhər meri Karen Qriqoryan özü Facebook sosial şəbəkəsindəki səhifəsində bu haqda yazıb: "Mən - Karen Qriqoryan, öz xahişimlə istefa verirəm".
Onu da qeyd edək ki, terrorçu erməni general Xocalı soyqırımının törədilməsi, Azərbaycanın Füzuli və Cəbrayıl rayonlarının işğalı zamanı azərbaycanlı sakinlərin mülkiyyətinin talan edilməsi, hərbi əsirlərə işgəncələrin verilməsi, kütləvi qətlə yetirilməsi, həmçinin mülki şəxslərin girov götürülməsi, işgəncələrə məruz qoyulması və öldürülməsi kimi çoxsaylı hərbi cinayətlərin törədilməsində iştrak edib.
