İllərdir Suriyada günahsız insanların qanını tökən və buna şərait yaradan Bəşər Əsəd rejimi Gürcüstanın separatçı bölgələri - Abxaziya və Cənubi Osetiyanın “müstəqilliyini” tanıdığını bəyan edib. Baki-xeber.com Gürcüstan KİV-inə istinadən xəbər verir ki, bu barədə Suriya mediası məlumat yayıb.
Suriyanın Xarici İşlər Nazirliyi də separatçı Abxaziya və Cənubi Osetiyanın “müstəqilliyini” tanıdığını təsdiqləyib. “Suriyaya qarşı terror hücumu fonunda, Suriya Ərəb Respublikası, Abxaziya və “Cənubi Osetiya” arasında qarşılıqlı münasibət haqqında müqavilə imzalanıb. Diplomatik əlaqələr səfirliklər səviyyəsində gücləndiriləcək” – deyə bəyanatda bildirilir.
Gürcüstanın Xarici İşlər Nazirliyi isə gözlənildiyi kimi məsələyə sərt reaksiya verib. Xarici işlər nazirinin müavini David Dondua beynəlxalq ictimaiyyəti Əsəd rejiminin Rusiyanın təsiri ilə qəbul etdiyi qanunsuz qərara reaksiya verməyə və buna qarşı tədbirlər görməyə çağırıb.
“Əsəd rejimi, Rusiya tərəfindən Gürcüstana qarşı edilən hərbi təcəvüzü dəstəklədi”, – Dondua deyib.
Bununla yanaşı, onun dediyinə görə, Gürcüstan Suriya ilə artıq diplomatik əlaqələrin kəsilməsi proseduruna başlayıb.
Məsələyə reaksiya verən NATO baş katibinin Qafqaz və Mərkəzi Asiya üzrə xüsusi nümayəndəsi Ceyms Apaturay bildirib ki, NATO və onun müttəfiqlərinin mövqeyi aydın və möhkəmdir. “Biz Gürcüstanın ərazi bütövlüyünü və suverenliyini dəstəkləyirik” deyə bildirib.
O, bildirib ki, Suriyanın “Cənubi Osetiya” və Abxaziyanın “müstəqilliyinin” tanınması haqqında qərarı beynəlxalq cəmiyyətin mövqeyinə heç bir təsir etməyəcək.
“NATO işğal edilmiş əraziləri tanımamaq siyasətini davam etdirir və Rusiyaya müraciət edir ki, beynəlxalq öhdəliklərini yerinə yetirsin” – deyə o bildirib.
Gürcü deputat Giya Volskinin fikrincə, Suriyanın Abxaziya və “Cənubi Osetiyanın” tanınması qərarı, başdan ayağa Rusiyanın təşəbbüsüdür. Volski deyib ki Suriyanın qərarı onunla əlaqədardır ki, Bəşər Əsədin sistemi və rejimi başdan ayağa Rusiyadan asılıdır.
“Gözlənilirdi ki, Suriya bu qərarı qəbul edəcək. Lakin əmin deyiləm ki, parlament və komitələrdə bu məsələnin müzakirəsi baş verib. Siyasi qərar bilavasitə Rusiyanın vasitəçiliyi ilə qəbul olunub. İkinci məsələdir ki, Rusiya onsuz da kifayət qədər zədələnmiş öz siyasi nüfüzunu, daha da ağır duruma salır. Rusiya çalışır ki, işğal olunmuş Abxaziya və Sxinvali bölgəsini müəyyən ölkələr tanısınlar. Əminliklə deyirəm ki, nəinki Bəşər Əsəd, ümumiyyətlə Suriya rejimində elə bir insan tapılmaz ki, bu münaqişə, yaranmış durum haqqında məlumatlı olsun. Qərar da bundan irəli gəlir. Bu başdan ayağa Rusiyanın təşəbbüsüdür. Rusiyadan asılı olan insanların qərarıdır”, – Volski bildirib.
