Ermənistan müxalifətinin lideri Nikol Paşinyan baş nazir postunu tutmağa hazır olduğunu bildirib. APA-nın Ermənistan mətbuatına istinadən verdiyi xəbərə görə, N.Paşinyan baş nazir seçiləcəyinə əmin olduğunu vurğulayıb: “Əgər xalq bu məsuliyyəti üzərimə qoyarsa, baş nazir olmağa hazıram. Böyük ehtimalla, belə də olacaq”. Ermənistan müxalifətinin lideri seçicilərin 90 faizinin onu dəstəklədiyinə əmin olduğunu bildirib.
“Ermənistanın baş naziri Respublika partiyasının üzvü yox, xalqın nümayəndəsi olmalıdır”, - deyə Nikol Paşinyan qeyd edib.
Nikol Paşinyan ölkəsinin Rusiya ilə münasibətlərinin əhəmiyyətli olduğunu da bildirib. Paşinyan Rusiyanı qardaş ölkə hesab etdiyini vurğulayıb: “Rusiya ilə münasibətlər çox mühümdür, Ermənistan və Rusiya – dost, qardaş ölkələrdir. Lakin bu o demək deyil ki, onlarda problem yoxdur”.
Onun sözlərinə görə, müxalifət hakimiyyətə gələcəyi təqdirdə bu problemləri həll etmək niyyətindədir. Nikol Paşinyan əlavə edib ki, Ermənistan-Rusiya münasibətləri erməni xalqının maraqları üzərində qurulmalıdır.
"Ermənistan müxalifəti nə qərbyönlüdür, nə də rusiyayönlü. Başqa ölkələrlə münasibətlər digər dövlətlərin ziyanına inkişaf etməyəcək". "Report" "RİA Novosti"yə istinadən xəbər verir ki, bunu da Paşinyan bildirib.
"Biz nə qərbyönlüyük, nə Rusiya, nə də iranyönlü...Heç bir ölkə ilə münasibətləri digər dövlətlərlə əlaqələrə ziyan vurmaqla inkişaf etdirməyə hazırlaşmırıq. Avropa İttifaqı, Rusiya və ABŞ-la münasibətlər bizim üçün vacibdir. Lakin onların heç biri ilə münasibətlər digərlərinə ziyan vurmaqla inkişaf etməməlidir", - deyə Paşinyan bildirib.
Bu arada Ermənistanda müxalifət lideri Nikol Paşinyan və baş nazir səlahiyyətlərini müvəqqəti icra edən Karen Karapetyan arasında aprelin 25-nə planlaşdırılmış danışıqlar ləğv edilib. Bu barədə N.Paşinyanın rəhbərlik etdiyi “Vətəndaş sazişi” Partiyasının mətbuat katibi Tiqran Avinyan bildirib.
Onun sözlərinə görə, danışıqların keçiriləcəyi tarix hələlik məlum deyil.
Tiqran Avinyan “tert.am”-a müsahibəsində bildirib ki, müxalifət bundan əvvəl bəyan etdiyi müddəalar ətrafında danışıqların aparılmasını təkid edir. Qeyd edək ki, müxalifətçilər hakimiyyətin dinc ötürülməsini, Respublika partiyasının müvəqqəti hökumətin tərkibində əsas iştirakçı kimi təmsil edilməməsini və s. tələblər irəli sürürlər.
“Respublika partiyası məsələnin bu cür qoyulmasının əleyhinədir”, - deyə Avinyan qeyd edib.
Qeyd edək ki, Ermənistanın keçmiş prezidenti Serj Sarkisyanın baş nazir olması ilə bağlı etiraz aksiyaları aprelin 13-dən keçirilib. Aprelin 23-də Ermənistan hökuməti istefa verib. Ölkədə yeni baş nazir seçkiləri mayın 2-nə təyin edilib.
