Qərbin Ukrayna Silahlı Qüvvələrinin Krıma endirdiyi zərbələri dəstəkləməsi ilə bağlı Kiyevin açıqlamaları Rusiya üçün sirr deyil. Bu barədə Rusiya Xarici İşlər Nazirliyinin sözçüsü Mariya Zaxarova “İzvestiya”ya şərhində bildirib: “Ona görə də biz belə siyasəti rusofobiya, onun Qərb ideoloqlarını isə dost olmayan rejimlər adlandırırıq”.
Bundan əvvəl Ukrayna prezidentinin aparat rəhbərinin müşaviri Mixail Podolyak etiraf edib ki, Qərb tərəfdaşları Krım yarımadasına zərbələr endirməyə icazə veriblər: “Tərəfdaş ölkələr Kiyevə Krıma zərbələr endirməyə icazə verib. Bu gün artıq mütləq konsensus var ki, biz rusların, məsələn, Krımdakı, işğal olunmuş ərazilərdəki hər şeyini məhv edə bilərik”. Rusiya Federasiyası Təhlükəsizlik Şurasının sədr müavini Dmitri Medvedyev də bu sözləri şərh edərək xəbərdarlıq edib ki, Qərbin Krıma zərbələr endirməyə razılığı apokalipsisi yaxınlaşdırır: “Qərbin Kiyevin Krıma zərbə endirməsinə razılığı "casus belli"dir (latınca "müharibə səbəbi") və Moskvaya NATO-da hamıya və hər kəsə qarşı hərəkət etmək imkanı verir. Ukraynalılar Rusiyaya məxsus hər şeyə, məsələn, Krıma istənilən zərbəni endirməyə razı olduqlarını elan ediblər. Əgər bu doğrudursa və indi şübhə etmək üçün heç bir əsas yoxdursa, deməli, bu birbaşa hüquqi əhəmiyyətli sübutdur. Rusiyaya qarşı müharibədə Qərb Stepan Bandera dövlətinin tərəfində olub”. Medvedevin sözlərinə görə, bu, əsl “casus belli”dir və Rusiya üçün bu, “jus ad bellum” (latınca "müharibə hüququ") çərçivəsində NATO-da hamıya və hər kəsə qarşı hərəkət etmək imkanı vermək deməkdir. Təəssüf ki, apokalipsis ilə bağlı proqnozlar getdikcə yaxınlaşır”. Qeyd edək ki, Medvedyev daha əvvəl Qərbi və Ukraynanı nüvə silahının tətbiqi ilə hədələmişdi. Rusiya Dövlət Dumasının deputatı Mixail Şeremet də Qərbi hədələyənlər sırasındadır. O qeyd edir ki, Krıma qarşı təcavüzə görə Ukrayna ilə birlikdə Qərb dövlətləri də cavab verəcək. Şeremetin sözlərinə görə, bu, Qərb dövlətlərinin Rusiyaya qarşı müharibə apardığının və Ukrayna münaqişəsindən əsas faydalanan tərəf olduqlarının açıq etirafıdır: “Amma onlara xəbərdarlıq etmək istəyirəm ki, Krıma qarşı təcavüzə görə Ukrayna ilə yanaşı Qərb dövlətləri də cavab verəcəklər. Rusiyanın cavab verə və düşmənlərini təəccübləndirə biləcək güclü vasitələri var. Bəlkə də Rusiyanın bütün rus xalqının düşmənlərini nüvə silahı olmadan məhv etməyə qadir olan ən güclü ballistik raketlərini nümayiş etdirməsinin vaxtı çatıb. Kimlər ki, rusların həyat və sağlamlığını təhdid edir, onları yuvasında məhv etmək lazımdır”. Belə bir vaxtda diqqət çəkən məqamlardan biri odur ki, Rusiyanın Pskov şəhərinin hava limanına dron hücumu olub. Qeyd edək ki, sözügedən hava limanı Estoniyadan 35 kilometr, Ukraynadan isə təqribən 700 kilometr məsafədə yerləşir. Pskov vilayətinin aerodromuna dron hücumu nəticəsində 4 hərbi təyyarə vurulub. Hərbi aerodroma dron hücumundan sonra dörd İl-76 təyyarəsi zədələnib. Pilotsuz təyyarələrin hücumu nəticəsində təyyarələrlə yanaşı, neft anbarı və hərbi hissə məhv edilib. Rusiyada hesab edilir ki, bütün bu məsələlərdə Qərbin rolu var. Elə bu səbəbdən Rusiya Qərbi strateji silahlar, o cümlədən nüvə raketləri ilə getdikcə daha çox təhdid edir.
Pentaqon rəhbərinin keçmiş müşaviri, polkovnik Duqlas Makqreqorun açıqlamarı da Rusiya üçün əlavə əsas yaradır. O qeyd edir ki, Ukrayna münaqişəsinin gərginləşməsi ABŞ-ın Rusiya Federasiyasını məhv etmək üçün uğursuz cəhdidir. Onun sözlərinə görə, ABŞ hakimiyyəti Rusiya Federasiyasının qoşunları Ukrayna ərazisinə daxil olanda çox sevinib, çünki onlar səhvən bunun Rusiyanı məhv etmək şansı olduğuna inanırdılar. Makqreqor qeyd edib ki, Qərb dövlətləri Rusiya tərəfinin məğlub olacağına ümid bəsləyərək böyük səhvə yol veriblər. O xatırladıb ki, Kiyevin tərəfdaşları Ukrayna lideri Vladimir Zelenskini sülh danışıqları ideyasından imtina etməyə məcbur edəndə Rusiya Federasiyası genişmiqyaslı müdafiəyə keçib, nəticədə Ukrayna Silahlı Qüvvələri böyük itki verib. Bu fonda ABŞ-nin icazəsi ilə Danimarka və Niderland Ukraynaya F-16 qırıcı təyyarələrini verməyə hazırlaşması vəziyyəti daha da çətinləşdirir. Moskva ehtiyat edir ki, Ukrayna F-16-lara yiyələnsə, hava sahəsində böyük imkanlar qazanacaq və müharibədə hərbi-taktiki üstünlüklər əldə edəcək. Rusiya Xarici İşlər Nazirliyinin nümayəndəsi Mariya Zaxarova qeyd edir ki, Avropa ölkələrinin Ukraynanı F-16 qırıcıları və Mi-24V helikopterləri ilə təchiz etmək planları onların Ukrayna ətrafındakı münaqişədə artan iştirakını təsdiqləyir: "Çexiya ordusu ABŞ-a məxsus döyüş helikopterlərini aldıqdan sonra Rusiya istehsalı olan Mi-24V helikopterlərini Kiyevə təhvil verməyə hazırlaşır. Bundan başqa, Zelenskinin bir sıra Avropa ölkələrinə səfərindən sonra Danimarka, Norveç və İsveçin F-16 qırıcılarını Kiyevə təhvil verməyi planlaşdırdığı məlum olub. Bütün bu hərəkətlər qərblilərin Rusiyaya qarşı düşmən münasibətini, onların Ukrayna münaqişəsində artan iştirakını təsdiqləyir”
Tahir TAĞIYEV
