Tehran rejiminin insanlara münasibəti heç də humanist deyil. Özünü "islam dövləti" elan etsə də, islamdakı humanizmə əməl etmir, insanların canına qəsd edir. İranda edam edilənlərin sayı günü-gündən artır və bu da sözügedən rejimin necə təhlükəli daxili siyasət yetirdiyini bir daha ortaya qoyur.
Azad İran Telegram kanalı yazır ki, İranda edam edilən insanların yeni statistikası açıqlanıb.
HRANA İranda insan haqlarının vəziyyəti ilə bağlı məlumat verib və bu ay ərzində ən azı 69 nəfərin edam cəzasına məhkum edildiyini açıqlayıb.
Məlumata görə, İranda həyata keçirilən edamların 75%-dən çoxu barədə hökumət və ya məhkəmə orqanı tərəfindən məlumat verilmir ki, insan haqları təşkilatlarları da bu halları gizli edamlar adlandırır.
Beynəlxalq təşkilatların məlumatına əsasən, İran adambaşına düşən edam nisbətinə görə dünyada birinci yerdədir.
"Rejim statistikanı ona görə gizlədir ki, gələcəkdə beynəlxalq məhkəmələrdən yayına bilsin"
BAO sədrinin müavini Babək Türkoğlu "Bakı-Xəbər"ə şərhində bildirdi ki, molla rejiminin insanlara qarşı qəddar davranışı 1979-cu ildən indiyə qədər davam edir və bu rejimin əli saysız insanın qanına batıb. "İranın adambaşına düşən edam nisbətinə görə dünyada birinci yerdə olması olduqca dəhşətli bir haldır. Bu, insan haqlarının kütləvi pozulmasıdır. Fars-molla rejimi artıq İran adlanan ölkədə yaşayan xalqların üzərində öz varlığını, hakimiyyətini edamlarla, təcavüzlərlə, işgəncələrlə, zindanlara, ağır-ağır cəzalarla, silah gücü ilə saxlamağa çalışır. Çünki bu rejim artıq insanların arasında öz hakimiyyətini, nüfuzunu itirmiş vəziyyətdədir. Hakimiyyətlərinin ömrünə çox az qaldığı üçün mollalar insanlardan qisas alır, onların canına qəsd edirlər. İnsanlara amansızcasına zülm etməklə, təhdid altında saxlamaqla öz ömürlərini uzatmaq istəyirlər. Camaata hədə-qorxu gəlirlər, insanları panika içində saxlayırlar. Məqsəd də insanların iradəsini qırmaqdır ki, baş qaldırmasınlar, etiraz etməsinlər".
B.Türkoğlu qeyd edir ki, fars molla rejiminin insan içində hər hansı nüfuzu qalmayıb. O bildirdi ki, düzdür, rejimin uzantlları, onun tərəfdarları da var, amma bu orada yaşayan xalqların mütləq əksəriyyətini təşkil etmir. "Onlar da o rejimdən qidalanırlar deyə onu sözdə müdafiə edirlər. Amma sabah çevriliş olarsa, mollalara ən böyük zərbəni o kəsim vuracaq. Hesab edirəm ki, beynəlxalq insan haqları təşkilatları molla rejiminin həyata keçirdiyi edamlara biganə qalmalı deyil. Edam edilən insanlar molla rejiminin zülmünə etiraz edənlər, azadlıq, demokratiya uğrunda mübarizə aparanlardır, onların edamı siyasi xarakter daşıyır. Bu da rejimin mahiyyətini, vətəndaş qatili olduğunu sübut edir"-deyə qeyd edən B Türkoğlu bildirdi ki, edam anlayışı panfarsistlərə xasdır və onlar nə vaxt hakimiyyətdə olublarsa kütləvi edamlar artıb. "Kim rejimə baş əymirsə, tabe olmursa onu dar ağacından asırlar. Mollaların edamı siyasi təzyiq vasitəsinə çevirdiyi ortadadır. 1979-cu ildən indiyə qədər minlərlə insanı qətl edib. Bu gün də o siyasəti davam etdirir. Rejim statistikanı ona görə gizlədir ki, gələcəkdə beynəlxalq məhkəmələrdən yayına bilsin" -deyə B. Türkoğlu vurğuladı.
Əli TURABOV
